ءىس-شارا باعدارلاماسىنا سايكەس ءۇش كۇن ىشىندە TRIP يكاو ستراتەگياسىنىڭ بەس ەلەمەنتىمەن تىكەلەي بايلانىستى 10 پانەلدىك سەسسيا وتكىزۋ جوسپارلانعان. اتاپ ايتقاندا, سايكەستىكتى راستاۋ, ماشينامەن وقىلاتىن جول ءجۇرۋ قۇجاتتارى, قۇجاتتاردى بەرۋ جانە باقىلاۋ, تەكسەرۋ جۇيەلەرى مەن قۇرالدارى, ءبىرىن-ءبىرى تولىقتىراتىن اقپاراتتىق جۇيەلەر.
ءىس-شارانىڭ نەگىزگى باعىتى تەحنولوگيا مەن يننوۆاتسيا ارقىلى جولاۋشىلاردىڭ ۇتقىرلىق دەڭگەيىن ارتتىرۋعا باعىتتالعان. ازاماتتىق اۆياتسيانى دامىتۋدىڭ باسىم باعىتتارىنىڭ ءبىرى تسيفرلىق ترانسفورماتسيا بولىپ تابىلاتىنىن اتاپ ءوتۋ قاجەت. كولىك مينيسترلىگى قازاقستان اۋەجايلارىندا جولاۋشىلارعا قىزمەت كورسەتۋ جانە سايكەستەندىرۋ بويىنشا جاڭا تەحنولوگيالاردى قولدانۋعا, سونداي-اق اۋە تاسىمالى كەزىندەگى فورمالدىلىقتى جەڭىلدەتۋ ماسەلەلەرىنە ەرەكشە نازار اۋدارادى. TRIP ICAO ايماقتىق سيمپوزيۋمى تاجىريبە الماسۋ جانە جولاۋشىلاردى سايكەستەندىرۋ بويىنشا جالپى پروبلەمالىق ماسەلەلەردى تالقىلاۋ ءۇشىن بىرەگەي پىكىرتالاس الاڭى بولادى.
TRIP ICAO ايماقتىق سيمپوزيۋمىنىڭ سپيكەرلەرى كانادا, امەريكا قۇراما شتاتتارى, فرانتسيا, ۇلىبريتانيا, تۇركيا, جاڭا زەلانديا, شۆەيتساريا سياقتى ەلدەردىڭ فورمالدىلىقتى جەڭىلدەتۋ ماسەلەلەرى بويىنشا حالىقارالىق ساراپشىلارى بولادى. سونىمەن قاتار ءىس-شاراعا حالىقارالىق ازاماتتىق اۆياتسيا ۇيىمىنىڭ (ICAO), حالىقارالىق اۋەجايلار كەڭەسىنىڭ (ACI), حالىقارالىق كوشى-قون ۇيىمىنىڭ (IOM), حالىقارالىق اۋە كولىگى قاۋىمداستىعىنىڭ (IATA), بىرىككەن ۇلتتار ۇيىمىنىڭ بوسقىندار ءىسى جونىندەگى جوعارعى كوميسسارىنىڭ باسقارماسىنىڭ (UNHCR), ينتەرپول باس حاتشىلىعىنىڭ, حالىقارالىق قىلمىستىق پوليتسيا ۇيىمىنىڭ, سونداي-اق ەۋروپالىق شەكارا جانە جاعالاۋ كۇزەتى اگەنتتىگىنىڭ (FRONTEX) قىزمەتكەرلەرى قاتىسادى.
قازاقستاننىڭ سپيكەرلەرى رەتىندە مەملەكەتتىك ورگانداردىڭ (قر ۇقك شق, ءتسدياوم, ءىىم كققك, كم ااك), قازاقستاننىڭ اۆياتسيالىق اكىمشىلىگىنىڭ, استانا جانە الماتى قالالارىنىڭ اۋەجايلارىنىڭ, وتاندىق اۋە كومپانيالاردىڭ (Air Astana, SCAT, Qazaq Air, FlyArystan) جانە ازاماتتىق اۆياتسيا اكادەمياسىنىڭ وكىلدەرى ءسوز سويلەيدى. ءىس-شارانىڭ تولىق باعدارلاماسى قازاقستاننىڭ اۆياتسيالىق اكىمشىلىگىنىڭ سايتىندا https://caa.gov.kz جاريالانعان.
