ەكى مىڭعا جۋىق مۇرا توپتاستىرعان مۋزەيدىڭ نەگىزى 1973 جىلى قالانىپتى. وسى جىلى قازاق كسر-ءى وقۋ ءىسىنىڭ ۇزدىگى, مەتوديست مۇعالىم قاراجان قوجاباەۆتىڭ باستاماسىمەن № 29 مەكتەپتەگى قازاق ءتىلى مەن ادەبيەتى ءپانى كابينەتىنەن «سىر ەلى – جىر ەلى» دەپ اتالاتىن بۇرىش اشىلادى. مۇعالىمدەر مەن وقۋشىلاردىڭ ىزدەنىستەرى ارقىلى ەڭ العاش وسى بۇرىشقا جەرگىلىكتى اقىن-جىرشىلار شىعارمالارى, ءومىر دەرەكتەرى جيناقتالىپتى. كەيىننەن مالىمەتى مولىققان بۇرىش مۇراجايعا اينالىپ شىعا كەلەدى. وسى ءىستىڭ باسى-قاسىندا جۇرگەندەر تۇرماعامبەت شايىردىڭ 100 جىلدىعىنا وراي مالىمەتتەر تولىقتىرىلىپ, زەرتتەۋ جۇمىستارى جاندانا تۇسكەنىن ايتادى. 1989 جىلى بالا سانىنىڭ وسۋىنە وراي مەكتەپ جانىنان قوسىمشا مەكتەپ عيماراتى بوي كوتەرىپ, مۇراجاي جاڭا مەكتەپتىڭ ءبىر بولمەسىنە كوشىرىلىپتى.
«ول كەزدە مەكتەپ ديرەكتورى داريحا امزەبەكوۆا اپاي بولاتىن. جاڭا عيماراتتاعى مۋزەيدىڭ اشىلۋ سالتاناتىندا تۇرماعامبەت اتامىزدىڭ بالاسى ابدىراۋىق اكەمىز سىر سۇلەيى كيگەن شاپان مەن تاقيانى تابىستاعان ەدى. سول ساتتە مۇراجايداعى جادىگەرگە اينالعان زاتتار قاتارىندا شايىر ۇستاعان پىشاق پەن ونىڭ قىنى, كوزاينەگى بولدى. تۇرماعامبەت اتامىزدىڭ شىعىستىڭ شوق جۇلدىزى فەردوۋسيدىڭ «شاحناماسىن» 10 ايدا 11 بۋىنمەن تارجىمالاعانىن بىلەسىزدەر. «شاحنامانىڭ» ماشينكاعا العاش باسىلعان نۇسقاسى دا ەكى كىتاپ بولىپ وسى مۋزەيدە ساقتالىپ تۇر», دەيدى كەزىندە مەكتەپ باسقارىپ, زەينەتكە شىققان ۇلاعاتتى ۇستاز زاريپا تاسىموۆا.
بەس بولىمنەن تۇراتىن مەكتەپ مۋزەيىندە سوقپاعىن جيەنباي جىراۋ سالعان جىر مەكتەبىنىڭ ۇزدىك وكىلى كوشەنەي رۇستەمبەكوۆكە, سىرداعى سال ونەرىنىڭ كورنەكتى تۇلعاسى ەشنياز سالدان باستاپ كۇنى بۇگىنگە دەيىنگى جەرگىلىكتى جىراۋلارعا, شەجىرەشى ءۇبىسۇلتان اياپوۆ, الياكبار جۇماتاەۆ, زاپا داۋلەتباەۆقا ارنالعان بولىمدەر بار. وسى توپىراققا قاتىستى تاريح پەن كەڭەس وداعىنىڭ باتىرى تايىمبەت كومەكباەۆ, سوتسياليستىك ەڭبەك ەرى, باتىر انا ءساليما جۇمابەكوۆا جايلى دەرەكتەردى دە وسى جەردەن تاباسىز.
مەكتەپ ديرەكتورلىعىنان بۇرىن ۇزاق جىلدار تاربيە ءىسى جونىندەگى ورىنباسار بولعان زاريپا جاپپارقىزى وقۋشىلار مەن مۇعالىمدەردىڭ بىرلەسىپ زەرتتەۋى ارقىلى مۋزەي مۇراعاتتارى جىل سايىن تولىعا تۇسكەنىن ايتادى. مەكتەپ ديرەكتورى بولعان جىلدارى ءوز قاراجاتىمەن مۋزەيدى تولىق قايتا جابدىقتاپ شىعىپتى.
سىرتتان ارنايى كەلىپ, مۇنداعى مۇراعاتتار دەرەگىن ديپلوم, عىلىمي جوبا جازۋعا پايدالاناتىندار كوپ. ولكەتانۋ ساباقتارى, ايتىس, ءتۇرلى جىر بايقاۋلارى وسىندا وتەدى.
ولكە تاريحى قاتتالعان مەكتەپ مۇراجايى وسىلايشا كوپ قازىناسىنا اينالىپ وتىر.
قىزىلوردا
