مادەنيەت جانە اقپارات مينيسترلىگى مەن «ازاماتتىق باستامالاردى قولداۋ» ورتالىعى باستاماسىمەن جەر-جەردە جۇمىسسىز جاستارعا ۇيىمداستىرىلىپ جاتقان وسى الەۋمەتتىك جوبانىڭ تيىمدىلىگى وتە زور. قازان ايىنىڭ باسىندا 18-دەن 35 جاسقا دەيىنگى جۇمىسسىزدارعا قايتارىمسىز گرانت بەرىلەتىنى تۋرالى اقتوبە وبلىستىق جاستار رەسۋرستىق ورتالىعى سايتىندا حابارلاما جاريالاندى. باستى تالاپ – قاتىسۋشى enbek.kz سايتىنا جۇمىسسىز رەتىندە تىركەلۋى كەرەك. ءبىر ايدىڭ ىشىندە 300-دەن اسا جاس كەڭەس الدى, 160 ءوتىنىم ءتۇستى. الەۋمەتتىك جەلىلەردە ۇيىمداستىرىلعان تىكەلەي ەفيرلەردە گرانت قارجىسىن تۇرعىن ءۇي قۇرىلىسىنا, جەر تەلىمى مەن اۆتوكولىك ساتىپ الۋعا, قورشاعان ورتاعا زيانىن تيگىزەتىن جوبالارعا سالۋعا, قايىرىمدىلىق شارالارعا جۇمساۋعا بولمايتىنى ايتىلدى. وتىنىمدەردى ىرىكتەي كەلە, بايقاۋ تالاپتارىنا ساي كەلگەن 48 كوميسسيا قاراۋىنا ۇسىنىلدى.
وبلىستىق ىشكى ساياسات باسقارماسى جاستارمەن جالپى جۇمىس ءبولىمىنىڭ باسشىسى ەلەۋسىز نۇرعاليەۆتىڭ ايتۋىنشا, «Zhas Project» جوباسىنا كەيىنگى التى ايدا جۇمىس ىستەمەگەن جاستار قاتىستى.
«وبلىستىق ءماسليحات دەپۋتاتتارى, «اتامەكەن» وڭىرلىك كاسىپكەرلەر پالاتاسى, باق وكىلدەرى, سىبايلاس جەمقورلىققا قارسى قىزمەتتىڭ ەرىكتىلەرىنەن قۇرالعان كوميسسيا مۇشەلەرى جوبانىڭ الەۋمەتتىك ماڭىزىنا نازار اۋداردى. ماسەلەن, مۇگەدەكتىگى بار جاس كوميسسيا مۇشەلەرى الدىندا ءوز جوباسىنىڭ ومىرشەڭدىگىن دالەلدەپ شىقتى. ونىڭ دەنساۋلىق جاعدايىنا قاراماستان ءوز ءىسىن باستاۋعا دەگەن ەرەكشە قۇلشىنىسى ءوز قاتارلاستارىنا ۇلگى بولارلىقتاي. كوميسسيا مۇشەلەرى تاعى ءبىر قاتىسۋشىنىڭ قىسقامەرزىمدى وقىتۋ جوباسىنا نازار اۋداردى», دەيدى ە.نۇرعاليەۆ.
تەمىر اۋدانى شۇبارقۇدىق كەنتىنىڭ 23 جاستاعى تۇرعىنى دانيار ساكەنوۆ اۋىل جاستارىن فوتو-بەينە ءتۇسىرىلىم جاساۋعا ۇيرەتىپ, گرافيكالىق ديزاين, موبيلوگرافيا كۋرستارىنا ەكى اي تەگىن وقىتپاقشى. ول گرانت قاراجاتىنا قاجەتتى جابدىقتار ساتىپ الاتىنىن ايتتى. ءۇمىت بوجىمبەتوۆا مۇمكىندىگى شەكتەۋلى بالالاردىڭ انالارى ءۇشىن كۋلينارلىق تاعامدار ءپىسىرۋدى ۇيرەتەتىن كۋرس ۇيىمداستىرادى. ويتكەنى مۇگەدەك بالانى باعىپ وتىرعان انالار ۇيدەن تىسقارى جەردە جۇمىس ىستەي المايدى. سول ءۇشىن دە جاس انالاردىڭ ۇيلەرىندە وتىرىپ-اق بەلگىلى ءبىر كاسىپ ءتۇرىن ۇيرەنگەنى ابزال. تۇرسىناي بورانباەۆا وسى كەزگە دەيىن تاپسىرىسپەن قۇراق كورپەلەر تىگىپ, ەسكى جۇمساق جيھازداردىڭ ماتاسىن جاڭارتىپ اقشا تاۋىپ ءجۇر.
«بولمەنىڭ ينتەرەرىنە ساي كورپەلەر تىگۋگە تاپسىرىستار الىپ ءجۇرمىن. تىگۋدى ءوزىم ۇيرەندىم. مەن – دامۋى تەجەلگەن بالانىڭ اناسىمىن. بالام كوپكە قوسىلعاندى ۇناتپايدى. ول وزىمەن قاتارلاس بالالارمەن ەركىن ويناي المايدى, جالعىز تاستاپ تا كەتە المايسىڭ. قازىر ارنايى بالاباقشاعا بارىپ ءجۇر. ءبىر جاعىنان بالامدى قاراپ, ەكىنشى جاعىنان تابىس تا تاپقىم كەلەدى. 1 ملن تەڭگە مەملەكەت قارجىسى ماعان ۇلكەن قولداۋ بولدى. وعان تىگىن ماشينالارىن ساتىپ الامىن», دەيدى 33 جاستاعى تۇرسىناي.
مارتوك اۋدانىنىڭ 32 جاستاعى تۇرعىنى ناۋرىزبەك ەرباتىروۆ كىرسابىن جاساۋدى قولعا الا باستادى.
«وتكەن جىلدان بەرى ويىمدا جۇرسە دە, قاراجاتىم بولماعان سوڭ جۇمىس باستاي المادىم. «Zhas Project»-كە بيزنەس-جوبامدى ۇسىنىپ جەڭىسكە جەتتىم. ەندى مارتوك اۋىلىنداعى ءبىر بوس عيماراتتى جالعا الىپ, تسەح اشىپ, كىرسابىن جاسايتىن قۇرال-جابدىق ساتىپ الماقشىمىن. وعان شيكىزات اۋىلدان تابىلادى. كىرسابىنعا مالدىڭ توڭ مايى مەن وسىمدىك مايىنىڭ قالدىقتارى كەرەك. ەڭ باستىسى, مەن تازا, تابيعي, باعاسى ارزان سابىندار جاساپ, اۋدانىمىزداعى دۇكەندەرگە ارزان باعامەن وتكىزۋدى جوسپارلاپ وتىرمىن. جابدىقتار كەلسە, ءبىر ايدا ءونىم شىعارا باستايمىن. سابىن جاسايتىن قۇرىلعىلار ءارتۇرلى بولادى. شيكىزاتى جەتكىلىكتى بولسا, كۇنىنە 1 500-2 000 دانا سابىن شىعاراتىن جابدىقتار بار. بىراق مەن ونداي كولەمدە شىعارا المايمىن. كۇنىنە 500 دانا سابىن دايىنداپ ساتىلىمعا جىبەرە السام, وتە جاقسى بولار ەدى. وسى جۇمىستى جولعا قويعان سوڭ سۇيىق سابىن ءوندىرىسىن باستايمىن», دەيدى ول.
قايتارىمسىز قارجىعا قول جەتكىزگەن گرانت يەگەرلەرى ەكى اي قارجىلىق باسقارۋ, ەسەپ جۇرگىزۋ كۋرستارىنان وتەدى. جۇمىسسىز اۋىل جاستارىنا ارنالعان وسىنداي ناقتى قولداۋ اۋىلداعى كاسىپ تۇرلەرىن كەڭەيتۋگە جول اشادى ءارى سالىق بازاسىن دا مولايتادى.
اقتوبە وبلىسى
