ماڭعىستاۋ وبلىسى اكىمدىگىنە قاراستى جاستار ساياساتى ماسەلەلەرى جونىندەگى باسقارما مەن «وتباسى بانك» اراسىندا قول قويىلعان مەموراندۋم اياسىندا «ماڭعىستاۋ جاستارى» تۇرعىن ءۇي باعدارلاماسى ىسكە قوسىلادى. ەكىجاقتى كەلىسىمگە سايكەس ءوڭىر جاستارى باستاپقى جارناسى 10 پايىز, ال جىلدىق مولشەرلەمەسى 5 پايىز (جتسم 5,2%) نەسيەمەن تۇرعىن ءۇي ساتىپ الۋ مۇمكىندىگىنە قول جەتىزە الادى.
باعدارلاماعا دارىگەرلەر, مۇعالىمدەر, مادەنيەت جانە سپورت قىزمەتكەرلەرى, جوعارى وقۋ ورىندارىنىڭ وقىتۋشىلارى, عىلىمي قىزمەتكەرلەر, جۋرناليستەر, الەۋمەتتىك سالا, مەملەكەتتىك جانە كوممۋنالدىق كاسىپورىن قىزمەتكەرلەرى, سونداي-اق تجد, ازاماتتىق قورعانىس قىزمەتكەرلەرى مەن اۋىل شارۋاشىلىعى سالاسىنىڭ وكىلدەرى قاتىسا الادى.
ء«بىز جاستار تاراپىنان باسپانامەن قامتۋ ماسەلەسى جونىندەگى ۇسىنىس-پىكىرلەردى ەستىپ ءجۇرمىز. اتالعان قاجەتتىلىك پەن سۇرانىستى ورىنداۋ ماقساتىندا بيىل ماڭعىستاۋ وبلىستىق ءماسليحاتىنىڭ قولداۋىمەن جەرگىلىكتى بيۋدجەتتەن 500 ملن تەڭگە كولەمىندە قارجى قاراستىرىلدى. نەگىزگى ماقسات – ءوڭىر جاستارىن تۇرعىن ۇيمەن قامتاماسىز ەتۋ ارقىلى مەملەكەتتىك سەكتور سالاسىنداعى جاس مامانداردى ىنتالاندىرۋ. اتالعان باعدارلامانى ىسكە اسىرۋ وسى ايدىڭ ورتاسىنا جوسپارلانعان. بۇگىنگى كۇنى «وتباسى بانك» اق ماڭعىستاۋ وبلىستىق فيليالىمەن بىرلەسكەن جۇمىس ناتيجەسىندە بىرقاتار كەلىسىمگە كەلدىك», دەدى ماڭعىستاۋ وبلىسىنىڭ جاستار ساياساتى ماسەلەلەرى جونىندەگى باسقارماسىنىڭ باسشىسى مۇقاش ورالباي.
«وتباسى بانك» اق باسقارما ءتورايىمىنىڭ ورىنباسارى نۇرلان اقشانوۆتىڭ ايتۋىنشا, جاستارعا ارنالعان مۇنداي باعدارلاما ەلىمىزدىڭ 16 وڭىرىندە ىسكە قوسىلعان.
ء«بىز ماڭعىستاۋ جاستارىنىڭ بولاشاعىنا ۇلكەن قادام جاساپ وتىرمىز. ويتكەنى باسپانا ماسەلەسى – جاستار ءۇشىن وتە وزەكتى. بۇل اجىراسۋدىڭ الدىن الۋعا سەپتىگىن تيگىزەدى دەپ ويلايمىن. پايىزدىق مولشەرلەمە وتە ىڭعايلى – 5 پايىز. باستاپقى جارنا دا وسى سانات ءۇشىن 10 پايىزدى قۇرايدى. جاستار اۋدانداردان ءۇي ساتىپ الاتىن بولسا, 10 ملن تەڭگەگە دەيىن, ال اقتاۋ قالاسىنان ساتىپ السا, 15 ملن تەڭگەگە دەيىن نەسيە الا الادى. بۇل باعدارلاما جاستارعا بىرقاتار جەڭىلدىك تۋدىرادى دەگەن ويدامىن. وتىنىمدەر رەسمي سايتتا قابىلدانادى. 15 قاراشا – ۇلتتىق ۆاليۋتا كۇنى ءوتىنىم قابىلداۋ باستالادى. الداعى ۋاقىتتا قارجىلاندىرۋ مولشەرى وسەدى. تۇرعىن ءۇيدى العاشقى جانە ەكىنشى نارىقتا ساتىپ الۋعا بولادى. وسىنداي شارتپەن ماڭعىستاۋ جاستارى وزدەرىنىڭ ماسەلەسىن شەشەتىن بولسا, ماڭعىستاۋ وبلىسى اكىمدىگى مەن وبلىستىق ءماسليحاتتىڭ باستاماسىن قۇپتاۋ كەرەك», دەدى ن.اقشانوۆ.
جاڭا باعدارلامانىڭ ەرەجەسىن ازىرلەۋ ماقساتىندا قۇرامىندا ماڭعىستاۋ وبلىستىق ءماسليحات دەپۋتاتتارى, وڭىرلىك قوعامدىق كەڭەس مۇشەلەرى, جاستار ۇيىمدارىنىڭ وكىلدەرى مەن جاستار ساياساتى ماسەلەلەرى جونىندەگى باسقارما وكىلدەرى بار ارنايى جۇمىس توبى قۇرىلدى. جۇمىس توبىنىڭ كۇن تارتىبىندەگى ەڭ نەگىزگى ماسەلە – وسى تۇرعىن ءۇي باعدارلاماسىنىڭ اشىقتىعىن جانە جاستار اراسىنداعى قولجەتىمدىلىگىن ارتتىرۋ.
ء«بىز جۇمىس توبىمەن بىرلەسىپ, ەلىمىزدە جۇزەگە اسىرىلعان جاستارعا ارنالعان مەملەكەتتىك باعدارلامالاردىڭ كەمشىلىكتەرى مەن ارتىقشىلىقتارىن سارالادىق. سايكەسىنشە, وڭىردەگى جاستاردىڭ سۇرانىسىنا وراي, مەيلىنشە قولجەتىمدى باعدارلاما جاساۋعا تىرىستىق. ونىڭ ەرەجەسىن ءتيىستى جۇمىس توبى ماقۇلداپ, ءوڭىر باسشىسى نۇرلان نوعاەۆ ءوز قاۋلىسىمەن بەكىتتى. ەندى «ماڭعىستاۋ جاستارى» رەسمي سايتىندا قۇجات قابىلداۋ باستالماق», دەيدى م.ورالباي.
«ماڭعىستاۋ جاستارى» باعدارلاماسى بويىنشا الەۋەتتى نەسيە الۋشىلاردىڭ ءتىزىمىن جەرگىلىكتى اكىمدىك قالىپتاستىرادى. وتىنىشتەر ارنايى سايتتا, قاشىقتان قابىلداناتىن بولادى. وتىنىشتەر قابىلدانعاننان كەيىن وبلىس اكىمدىگىنىڭ قىزمەتكەرلەرى جينالعان ۇپايعا قاراي قاتىسۋشىلاردى تاڭدايدى. ۇپايلارعا نەكەدە تۇرعان جىلدار سانى, بالالارىنىڭ بولۋى, مامانداعى بويىنشا ۇزدىكسىز جۇمىس ءوتىلى اسەر ەتەدى.
جاعىمدى جاڭالىقتى ەستىگەن جاستاردىڭ قىزىعۋشىلىعى جوعارى. جاڭا باعدارلاما باسپانا الۋدا تىعىرىققا تىرەلىپ جۇرگەن جاس ازاماتتاردىڭ ارمانىنا قول جەتكىزۋىنە سەپ بولادى دەپ ويلايمىز.
ماڭعىستاۋ وبلىسى
