اۋدان بويىنشا 40 134 ادام داۋىس بەرۋ قۇقىعىنا يە, ولار ءۇشىن بارلىعى 30 سايلاۋ ۋچاسكەسى جۇمىس ىستەدى. 17 ۋچاسكە اۋدان ورتالىعى بەينەۋدە, قالعان 13 ۋچاسكە اۋىلدىق جەرلەردە ورنالاسقان.
داۋىس بەرۋشىلەر اراسىندا بيىل 18 جاسقا تولىپ, سايلاۋعا تۇڭعىش قاتىسىپ وتىرعاندار دا, عاسىر جاسىنان اسقان اجە مەن ەڭبەك ارداگەرلەرى دە بار. «مەرەيلى وتباسى» اتانعان تاستەمىروۆتەر اۋلەتى سىڭعىرلاۋ اۋىلىندا ورنالاسقان سايلاۋ ۋچاسكەسىندە داۋىس بەردى. وتاعاسى 94 جاستاعى شالاباي اقساقال مەن وتاناسى 85 جاستاعى ءورىس انا بۇگىندە 13 بالا, 45 نەمەرە, 58 شوبەرە تاربيەلەپ وتىر. ولار اۋدان ءۇشىن ماڭىزدى كۇندە بالالارىمەن بىرگە كەلىپ, ءوز تاڭداۋىن جاسادى. تاستەمىروۆتەر اۋلەتى ۇلكەندەرىنىڭ ايتۋىنشا, بۇگىنگى سايلاۋ اۋداننىڭ الداعى بولاشاعىن جارقىن ەتىپ, جاڭا تىنىس سىيلايدى.
«اۋدانىمىزدىڭ ءوسىپ-وركەندەۋى, جاستارىمىزدىڭ تاربيەلى دە ءبىلىمدى بولۋى ءاردايىم ماڭىزدى. سايلاۋ بەرەكەلى اۋدانىمىزدىڭ ودان ءارى دامۋىنا سەرپىن بەرەدى دەپ سەنەمىز. ەڭ باستىسى, ەلدىڭ تىنىشتىعىن تىلەيمىز», دەدى ولار.
اۋدان اكىمدىگىنە 3 ادام ۇمىتكەر رەتىندە تىركەلگەن ەدى. سايلاۋ قورىتىندىسى بويىنشا نۇرتاس ساليگە – 2 178, ەسەت حايرۋللينگە – 213, راحىمجان شالباەۆقا 8 556 داۋىس بەرىلگەن. ال «بارىنە قارسىمىن» بەلگىسى بار بيۋللەتەندەر سانى – 202. سايلاۋ قورىتىندىسى بويىنشا بەينەۋ اۋدانىنىڭ اكىمى بولىپ اۋدان اكىمىنىڭ ورىنباسارى قىزمەتىن اتقارعان راحىمجان شالباەۆ سايلاندى.
ماڭعىستاۋ وبلىسى
