– بۇگىن اۋا رايى كەرەمەت, كۇن دە جاقسى. سايلاۋ ءوتىپ جاتقان ءۇش اۋداندا بارلىعى 63 سايلاۋ ۋچاسكەسى بار. تاڭعى ساعات 6-دا سايلاۋ كوميسسيالارى مۇشەلەرى كەلىپ, سول جەردە سايلاۋعا دايىندىقتى سوڭعى مارتە پىسىقتاپ, بيۋللەتەندەردى ۇلەستىردى, كەلگەن بايقاۋشىلاردى تىركەدى. ءسويتىپ, تاڭعى ساعات 7-دە ءانۇران وينالىپ, بارلىق ۋچاسكە سايلاۋشىلارعا ەسىگىن ايقارا اشتى. بارلىق سايلاۋ ۋچاسكەلەرىندە سايلاۋشىلاردىڭ داۋىس بەرۋىنە بارلىق مۇمكىندىك جاسالعان. وسى جولى دوداعا ءار اۋداننان ءۇش ادام قاتىسىپ وتىر. سونىڭ ىشىندە «اmanat» پارتياسى مەن قازاقستان حالىق پارتياسىنان ۇسىنىلعان كانديداتتار بار. قالعانى ءوزىن-ءوزى ۇسىنعان ۇمىتكەرلەر. ولار وسى كۇنگە دەيىن سايلاۋشىلارمەن كەزدەسىپ, ۇگىت-ناسيحاتىن جۇرگىزىپ, باعدارلامالارىن تانىستىرىپ, كوپ جۇمىس اتقاردى, – دەدى باتىس قازاقستان وبلىستىق اۋماقتىق سايلاۋ كوميسسياسىنىڭ توراعاسى عايسا قاپاقوۆ.
ايتا كەتەيىك, ساياسي ناۋقانعا قۇرامىندا 378 مۇشەسى بار 1 وبلىستىق اۋماقتىق, 3 اۋداندىق اۋماقتىق, 63 ۋچاسكەلىك سايلاۋ كوميسسياسى قىزمەت ەتىپ جاتىر.
بوكەي ورداسى اۋدانىندا 9 141 سايلاۋشى تىركەلگەن. سايلاۋ ۋچاسكەلەرىنىڭ بارلىعى كەرەكتى قۇرال-جابدىق, ينتەرنەت جەلىسى قامتىلعان. مۇمكىندىگى شەكتەۋلى 366 سايلاۋشى ارنايى جاساقتالعان كابينالاردا داۋىس بەرە الادى. اۋداندىق اۋماقتىق سايلاۋ كوميسسياسى بەرگەن مالىمەتكە قاراعاندا, بوكەي ورداسىنداعى سايلاۋشىلاردىڭ ەڭ ۇلكەنى 97 جاستا بولسا, 107 سايلاۋشى العاش رەت داۋىس بەرەدى. عايسا حاميدوللا ۇلى سايلاۋ ۋچاسكەلەرىندە ازىرگە ەشقانداي قۇقىق بۇزۋشىلىق تىركەلمەگەنىن ايتادى.
تاسقالا اۋدانىندا دا سايلاۋ قالىپتى جاعدايدا ءوتتى. اۋدانداعى 22 سايلاۋ ۋچاسكەسىنىڭ بەسەۋى اۋدان ورتالىعى تاسقالا كەنتىندە ورنالاسقان. مۇندا 11 مىڭعا جۋىق سايلاۋشى ءوز تاڭداۋىن جاسايدى. اۋداندىق اۋماقتىق سايلاۋ كوميسسياسى تاراتقان مالىمەتكە قاراعاندا, مۇنداعى سايلاۋ بارىسىن «اmanat» پارتياسىنان – 22, رەسپۋبليكالىق «داۋىس» قوعامدىق بىرلەستىگىنەن – 22, «نامىس» قوعامدىق ۇيىمىنان – 20, «اقجول» پارتياسىنان 8 وكىل باقىلايدى.
اۋدانداردان جەتكەن مالىمەتكە قاراعاندا, اكىم سايلاۋى كوپ جەردە مەرەكەلىك كوڭىلمەن, جايماشۋاق وتكەن. مىسالى, بوكەيوردالىقتار سايلاۋعا ۇلتتىق كيىممەن, سالت ات ءمىنىپ سالتاناتپەن بارعان. تاسقالا اۋدانىنا قاراستى مەرەي اۋىلىنىڭ 17 كەلىنى سايلاۋعا ءبىر مەزەتتە ۇلتتىق كيىممەن بارىپ, داۋىس بەردى. ال داۋىس بەرۋ ەڭ بەلسەندى, ۇيىمشىلدىقپەن ءوتىپ جاتقان قاراتوبە اۋدانىندا 98 جاستاعى ءنازيما مىرزاگەرەەۆا اجەمىز سايلاۋ ۋچاسكەسىنە ءوز اياعىمەن كەلىپ, تاڭداۋىن جاساعان. اجەمىز «ەلدىڭ تىنىشتىعى, ءوڭىر مەن اۋداننىڭ تۇراقتى دامۋى ءۇشىن داۋىس بەردىم», دەيدى.
باتىس قازاقستان وبلىسى
