زاڭ وتاندىق جانە حالىقارالىق ساراپشىلارمەن بىرلەسىپ ازىرلەنگەن. قۇجات ەلىمىزدە قوعامدىق باقىلاۋدى ۇيىمداستىرۋعا جانە جۇزەگە اسىرۋعا بايلانىستى قوعامدىق قاتىناستاردى رەتتەۋگە باعىتتالىپ وتىر.
«حالىقارالىق ساراپشىلاردىڭ قاتىسۋىمەن 50-دەن اسا جۇمىس توپتارىنىڭ وتىرىسى ءوتتى. حالىقارالىق تاجىريبە بارىنشا تالقىلاندى», دەدى د.قادىروۆ. سپيكەردىڭ ايتۋىنشا, قوعامدىق باقىلاۋدىڭ نەگىزگى قاعيداتتارى رەتىندە زاڭدىلىق, جاريالىلىق, اشىقتىق جانە قوعامدىق باقىلاۋ سۋبەكتىلەرىنىڭ ەرىكتى قاتىسۋى مەن تاۋەلسىزدىگى بەكىتىلگەن. سونداي-اق قۇجاتتا ازاماتتار قوعامدىق باقىلاۋدى جۇزەگە اسىرا الاتىن قوعامدىق باقىلاۋ وبەكتىلەرىنىڭ تىزبەسى ايقىندالعان. ولارعا بارلىق جەرگىلىكتى اتقارۋشى جانە ورتالىق اتقارۋشى ورگان, سونىمەن بىرگە كۆازيمەملەكەتتىك سەكتور, ورتالىق جانە جەرگىلىكتى اتقارۋشى ورگانداردىڭ فۋنكتسيالارىن ورىنداۋشىلار, سونداي-اق دەربەس ءبىلىم بەرۋ ۇيىمدارى كىرگەن.
بۇدان بولەك, زاڭدا قوعامدىق باقىلاۋعا قاتىسۋ شارتتارى دا ايقىندالعان. قوعامدىق باقىلاۋدى ىسكە اسىرۋعا 18 جاسقا تولماعان, وتەلمەگەن سوتتىلىعى بار, ناركولوگيالىق نەمەسە پسيحونەۆرولوگيالىق ديسپانسەردە ەسەپتە تۇرعان ادامدار جىبەرىلمەيدى.
ايتا كەتۋ كەرەك, قوعامدىق باقىلاۋ جانە اكىمشىلىك راسىمدەر ماسەلەلەرى بويىنشا ەلىمىزدىڭ 3 كودەكسى جانە 10 زاڭىنا وزگەرىستەر ەنگىزىلدى. قازىر وسى زاڭداردى ىسكە اسىرۋعا باعىتتالعان 16 نورماتيۆتىك قۇقىقتىق اكتى دايارلانىپ, قۇزىرەتتى مەملەكەتتىك ورگاندارمەن كەلىسۋ جۇرگىزىلىپ جاتىر. سونىڭ ىشىندە پەتيتسيا ينستيتۋتى زاڭمەن رەتتەلگەن العاشقى پلاتفورما بولعالى وتىر. زاڭدا وتانداستارىمىزدىڭ ەلەكتروندى فورماتتا جانە جازباشا تۇردە دە پەتيتسيا بەرۋ مۇمكىندىكتەرى قاراستىرىلماق.
«اكىمشىلىك-راسىمدىك كودەكستە پەتيتسيا بەرۋ جانە قاراۋدىڭ راسىمدەرى جەكە قوسىمشامەن رەتتەلەدى. رەسپۋبليكالىق باسقارۋ نىسانىن, اكىمشىلىك-اۋماقتىق قۇرىلىمى جانە شەكارالاردى وزگەرتۋ, سوت تورەلىگى, راقىمشىلىق, ۇلتتىق قاۋىپسىزدىك جانە باسقا ماسەلەلەر بويىنشا پەتيتسيالار بەرۋگە مۇمكىندىك بولمايدى», دەپ ناقتىلادى د.قادىروۆ. سونداي-اق پەتيتسيالاردى قاراۋ تارتىبىنە دە توقتالىپ وتكەن ول: «پەتيتسيانى اۋداندىق جەردە قاراستىرۋ ءۇشىن 2,5 مىڭ ادامنىڭ قولداۋى كەرەك بولادى. ال ۇكىمەت قارايتىن بولسا, ول جەردە 50 مىڭنان اسا قولداۋشىسى بولۋى كەرەك. پەتيتسيانى قاراۋ بارىسىندا مەملەكەتتىك ورگان بىرقاتار ءىس-شارا جۇرگىزىپ, جۇمىس توپتارىن قۇرادى. قوعامدىق تالقىلاۋ جاسايدى. حالىقارالىق تاجىريبەنى زەردەلەيدى. سودان كەيىن شەشىم شىعارادى», دەدى. بۇل رەتتە پەتيتسيا بويىنشا شەشىمدى مەملەكەتتىك ورگاننىڭ ءبىرىنشى باسشىسى عانا بەرە الادى. الايدا قاجەتتى قولداۋ كولەمىن جيناي الماعان پەتيتسيالار دا نازاردان تىس قالمايدى. ونىڭ ايتۋىنشا, شەكتى مانگە جەتپەگەن پەتيتسيالار ۇندەۋ رەتىندە قاراستىرىلىپ, اكىمشىلىك-راسىمدىك كودەكس بويىنشا قارالماق.
