«وبلىس بويىنشا 31 گاز جەلىسى ۇيىمى بار. 226 اۆتوگاز قۇيۋ بەكەت ارقىلى سۇيىتىلعان مۇناي گازى ساتىلىپ جاتىر. قازىرگى كەزدە تاراز قالاسىنداعى كەيبىر اۆتوگاز قۇيۋ بەكەتتەرىندە سۇيىتىلعان مۇناي گازىن ليميتپەن نەمەسە تالونمەن ساتۋ ءۇردىسى قالىپتاسقان.
بۇگىنگى تاڭدا جامبىل وبلىسىندا سۇيىتىلعان گازعا دەگەن سۇرانىس – 8000-10000 توننا. قاجەتتىلىكتى وتەۋ ماقساتىندا وڭىردە اۋقىمدى جۇمىستار اتقارىلىپ جاتىر.
ەنەرگەتيكا مينيسترلىگىنىڭ ىقپال ەتۋىمەن جامبىل وبلىسى ءۇشىن «پەتروقازاقستانويلپروداكتس» جشس-نان 2023 جىلدىڭ قاراشا ايىنا 5218 توننا سۇيىتىلعان مۇناي گازى قاراستىرىلعان. قازىرگى تاڭدا قاراشا ايىنا بولىنگەن سۇيىتىلعان مۇناي گازىنا «پەتروقازاقستان ويل پروداكتس» جشس مەن كاسىپكەرلەر اراسىندا كەلىسىمشارت جاسالعان, قاراشا ايىنا قاجەتتى كولەم جاقىن كۇندەرى وبلىسقا جونەلتىلمەك», دەيدى وبلىس اكىمدىگى ەنەرگەتيكا جانە تۇرعىن ۇيكوممۋنالدىق شارۋاشىلىق باسقارما باسشىسى ورىنباسارىنىڭ مىندەتىن اتقارۋشى ماۋلەن قوجاقوۆ.
م.قوجاقوۆ كەلتىرگەن دەرەككە سۇيەنسەك, جاقىن كۇندەرى «پكوپ» جشس 12 ۆاگون-تسيستەرنامەن 432 توننا مۇناي گازىن جەتكىزبەك. سۇيىتىلعان گاز جەتكىزىلگەن ساتتە جانارماي قۇيۋ بەكەتتەرىنە تەڭدەي ۇلەستىرىلەدى. سونداي-اق جامبىل وبلىسى بويىنشا 322 توننا سۇيىتىلعان مۇناي گازىنىڭ قالدىعى بار.
جاۋاپتى ماماننىڭ ايتۋىنشا, 2023 جىلدىڭ 30 ماۋسىمىندا باسەكەلەستىكتى قورعاۋ جانە دامىتۋ اگەنتتىگىنىڭ №8 بۇيرىعىنا سايكەس سۇيىتىلعان گازدىڭ نارىقتاعى باعاسى بەكىتىلگەن. قازىرگى تاڭدا وبلىس ورتالىعى تاراز قالاسى مەن وعان جاقىن اۋداندارداعى اۆتوگاز تولتىرۋ بەكەتتەرىندە سۇيىتىلعان مۇناي گازىنىڭ 1 ءليترى 71 تەڭگەدەن ساتىلىپ جاتىر. ال شالعايدا ورنالاسقان اۋدانداردا گاز باعاسى – 76 تەڭگە.
