وقۋ-اعارتۋ مينيسترلىگىنىڭ مالىمەتىنشە, ەلىمىزدەگى وقۋشى ورىندارىنىڭ تاپشىلىعىن, اپاتتى مەكتەپتەردى جويۋ جانە ءۇش اۋىسىمدى مەكتەپتەردىڭ ماسەلەلەرىن شەشۋ باعىتىندا ۇكىمەت تاراپىنان جىل سايىن مەكتەپتەردى سالۋعا جانە جاڭعىرتۋعا قارجى ءبولىنىپ كەلەدى. ماسەلەن, كەيىنگى 3 جىلدىڭ وزىندە 340 مىڭ ورىندىق 626 مەكتەپ پايدالانۋعا بەرىلگەن. وسى جىلدىڭ سوڭىنا دەيىن 137 700 وقۋشىنى قامتيتىن 165 مەكتەپتى پايدالانۋعا بەرۋدى جوسپارلانعان. بۇل – ءبىلىم ينفراقۇرىلىمدارىن قولداۋ قورىنىڭ, رەسپۋبليكالىق جانە جەرگىلىكتى بيۋدجەتتەردىڭ, الەۋمەتتىك باعدارلامالار مەن جەكە ينۆەستورلاردىڭ ەسەبىنەن سالىنىپ جاتقان نىساندار. بۇل تۋرالى «سامۇرىق-قازىنا» قورىنىڭ ءباسپاسوز قىزمەتى الاڭىندا وتكەن ءباسپاسوز ءماسليحاتىندا وقۋ-اعارتۋ ۆيتسە-ءمينيسترى ەدىل وسپان ايتتى.
وقۋشى ورنى تاپشىلىعى, اسىرەسە, استانا, الماتى, تۇركىستان, الماتى, ماڭعىستاۋ, قىزىلوردا وبلىستارىندا وزەكتى. سوندىقتان 2023-2024 جىلدارى ۇلتتىق جوبا اياسىندا سالىناتىن 208 جايلى مەكتەپتىڭ باسىم بولىگى اتالعان وڭىرلەردە بوي كوتەرەدى.
«وقۋشى ورىندارىنىڭ تاپشىلىعىنا بايلانىستى ماسەلەلەردى جۇيەلى تۇردە شەشۋگە «جايلى مەكتەپ» جوباسى ىسكە قوسىلدى. ۇلتتىق جوبا اياسىندا 740 مىڭ وقۋشىنى قامتيتىن 369 جاڭا مەكتەپ سالىنادى. مەكتەپتەردىڭ جوبالىق قۋاتى 300-دەن 2 500 ورىنعا دەيىن بولادى. بۇل مەكتەپتەر ەڭ الدىمەن وقۋشى ورنى تاپشى جانە اسا وزەكتى اپاتتى مەكتەپتەردىڭ ورنىنا سالىنادى. جاڭا مەكتەپتەردى سالۋ كەزىندە مينيسترلىك اكىمدىكتەرمەن بىرگە ءاربىر ءوڭىردىڭ, ءاربىر ەلدى مەكەننىڭ بالا سانىنىڭ ءوسۋ قارقىنىنا, كوشى-قون ۇدەرىستەرىنە تالداۋ جۇرگىزىپ, سونىڭ ناتيجەسىنە ارقا سۇيەپ وتىرادى. سوندىقتان جوسپارلانعان جايلى مەكتەپتەردىڭ باسىم بولىگى استانا, الماتى قالالارىندا, تۇركىستان, الماتى, ماڭعىستاۋ, قىزىلوردا وبلىستارىنا تيەسىلى. بۇل وڭىرلەردە وقۋشى سانىنىڭ ۇدايى ءوسۋ تەندەنتسياسى بار», دەدى ەدىل وسپان.
«Samruk-Kazyna Construction» اق باسقارما توراعاسىنىڭ ءبىرىنشى ورىنباسارى عابيت مالعازداروۆتىڭ ايتۋىنشا, ەل بويىنشا ءبىرىنشى كەزەكتە سالىناتىن 208 مەكتەپتىڭ قۇرىلىسىنا قاتىستى كونكۋرستىق ءراسىم اياقتالعان. «پيلوتتىق رەجىمدەگى ۇلتتىق جوبانى ىسكە اسىرۋ اياسىندا مەكتەپتەردى جوبالاپ, سالىپ, جاراقتاندىرىپ, دايىن كۇيدە تاپسىرۋ بويىنشا مەردىگەرلەرمەن 204 شارت جاسالدى. قالعان 4 مەكتەپ بويىنشا شارت جاسالىپ جاتىر», دەدى ول.
وقۋ-اعارتۋ ۆيتسە-ءمينيسترى ە.وسپان اتاپ وتكەندەي, ۇلتتىق جوبانىڭ نەگىزگى مىندەتتەرى, ەڭ الدىمەن, قالالار مەن بولاشاعى بار ەلدى مەكەندەردە مەكتەپتەردىڭ ۋاقتىلى ىسكە قوسىلۋىن قامتاماسىز ەتۋ, وقۋشىلار مەن پەداگوگتەرگە قولايلى ءارى قاۋىپسىز جاعداي جاساۋ, ءبىلىم بەرۋ قىزمەتتەرىنىڭ ساپاسىن ارتتىرۋ. وسى رەتتە ە.وسپان مۇددەلى تاراپتار مەن قوعامدىق ۇيىمداردىڭ بەلسەندى مۇشەلەرىن «جايلى مەكتەپ» ۇلتتىق جوباسىن ىسكە اسىرۋ بارىسىن بىرلەسە قاداعالاۋعا شاقىردى.
«مينيسترلىك تاراپىنان «جايلى مەكتەپ» ۇلتتىق جوباسىن ساپالى ىسكە اسىرۋ بويىنشا بىرقاتار ماڭىزدى ءىس-شارا قولعا الىنىپ جاتىر. ءبىز بالالار مەن وقىتۋشىلاردىڭ كوڭىلىنەن شىعاتىن جاڭا مەكتەپتەر سالۋدى جوسپارلاپ وتىرمىز. وسى جۇمىستى اكىمدىكتەرمەن, بىرىڭعاي وپەراتورمەن جانە وتاندىق تاۋار وندىرۋشىلەرمەن بىرلەسە ۇيىمداستىرۋىمىز قاجەت. بۇل جۇمىسقا بارىنشا قولداۋ كورسەتۋگە, ادىستەمەلىك سۇيەمەلدەۋگە دايىنبىز. ءبىز قوعامدىق مونيتورينگتى ىسكە قوسۋدى جوسپارلاپ وتىرمىز», دەدى ۆيتسە-مينيستر.
سونداي-اق ع.مالعازداروۆ بۇقارالىق اقپارات قۇرالدارى مەن الەۋمەتتىك جەلىدە تارالعان كومپانيانىڭ وتاندىق وندىرۋشىلەردىڭ جوباعا قاتىسۋىنا كەدەرگى كەلتىرىپ وتىر دەگەن اقپاراتتى جوققا شىعاردى.
«بۇگىندە قىزۋ تالقىعا ءتۇسىپ تۇرعان نەگىزگى ماسەلەگە توقتالا كەتەيىن. ول – جوباعا وتاندىق تاۋار وندىرۋشىلەردىڭ قاتىسۋى. الەۋمەتتىك جەلىدە ءبىزدى «وتاندىق تاۋار وندىرۋشىلەردىڭ قاتىسۋىنا كەدەرگى كەلتىرىپ وتىر» دەگەن اقپارات تاراپ جاتىر. مۇنىڭ ءبارى وسەك-اياڭ ەكەنىن, شىندىققا ساي كەلمەيتىنىن مالىمدەيمىن. «Samruk-Kazyna Construction» وتاندىق تاۋار وندىرۋشىلەردى قولداۋعا مىندەتتەمە الادى. «جايلى مەكتەپ» ۇلتتىق جوباسى رەسپۋبليكالىق بيۋدجەت جانە ۇلتتىق قور قاراجاتى ەسەبىنەن جۇزەگە اسىرىلىپ جاتقانىن جاقسى بىلەسىزدەر. سوندىقتان بۇل قارجى ەل ەكونوميكاسىنا جۇمىس ىستەۋى كەرەك. ءبىز مۇنى تولىعىمەن قولدايمىز. بىزدەن «قانداي كەپىل بار؟» دەپ سۇرايدى. ەڭ الدىمەن ۇكىمەتتىڭ قاۋلىسىندا «Samruk-Kazyna Construction» مىندەتى «Samruk-Kazyna», «اتامەكەن» پالاتاسى تىزىلىمىنە ەنگەن جانە ست-KZ سەرتيفيكاتى بار وتاندىق تاۋار وندىرۋشىلەردەن عانا جيھاز ونىمدەرىن ساتىپ الۋى كەرەكتىگى ناقتى بەلگىلەنگەن. دايىن ءتىزىم «اتامەكەننىڭ» قاراۋىنا ۇسىنىلاتىن بولادى. كاسىپكەرلەر پالاتاسى ۇلتتىق جوبانىڭ تالاپتارىنا سايكەس كەلەتىن ساپالى جيھاز جاساۋعا قاۋقارلى وتاندىق وندىرۋشىلەردى انىقتاپ, بىزگە ءتىزىمىن ۇسىنادى. كەيىن ءتىزىم وڭىرلىك ءبىلىم باسقارمالارىنا جىبەرىلەدى, وندا ۇسىنىلعان نۇسقالاردىڭ ىشىنەن ەڭ جاقسى جيھاز تۇرلەرى تاڭدالادى», دەدى ع.مالعازداروۆ.
ە.وسپاننىڭ ايتۋىنشا, مەكتەپ جيھازدارى 100 پايىز وتاندىق ءونىم بولادى. سونداي-اق مەكتەپ جيھازدارى وتاندىق تاۋار وندىرۋشىلەردىڭ تىزىمىندە تىركەلگەن جەكە جانە زاڭدى تۇلعالاردان ساتىپ الىنادى. جايلى مەكتەپتەردى سالۋ بويىنشا جيھازدارعا قويىلاتىن تالاپتار «اتامەكەن» ۇلتتىق كاسىپكەرلەر پالاتاسى جانە قازاقستاننىڭ جيھاز قاۋىمداستىعى وكىلدەرىمەن بىرلەسىپ كەلىسىلگەن.
«اتالعان ۇلتتىق جوبا اياسىندا بۇكىل جايلى مەكتەپ ەرگونوميكا تالاپتارىنا ساي جابدىقتالادى. بۇل جەردە قاۋىپسىزدىك ماسەلەسى دە نازارعا الىنادى. جايلى مەكتەپتەردىڭ اتىنا زاتى ساي بولۋىن قامتۋ ماقساتىندا مينيسترلىك جانىنان ارنايى جۇمىس توبى قۇرىلدى. ونىڭ قۇرامىنا دەنساۋلىق ساقتاۋ مينيسترلىگى, ونەركاسىپ جانە قۇرىلىس مينيسترلىگى, «اتامەكەن» ۇلتتىق كاسىپكەرلەر پالاتاسى جانە جيھاز قاۋىمداستىعىنىڭ وكىلدەرى بار. بۇگىندە تالاپتار جايلى مەكتەپتەر سالۋعا جاۋاپتى وپەراتور «سامۇرىق-قازىنا» ۇلتتىق كومپانياسىنا جىبەرىلدى», دەدى ول.
«Samruk-Kazyna Construction» مالىمەتىنشە, جايلى مەكتەپتەرگە قاجەتتى وقۋشى جيھازىن – 91, زەرتحانالىق جيھازدى – 48, كورپۋستىق جيھازدى – 98, وتىرۋعا ارنالعان جيھازدى – 34, مەتالل جيھازدى – 47, اسحاناعا ارنالعان جيھازدى – 79, مەكتەپ تاقتالارىن – 24, جۇمساق جيھازدى 36 وتاندىق كاسىپورىن وندىرەدى.
