جۇمابەك بۇگىنگى قىزمەتىنە قول جەتكىزۋ ءۇشىن ول قىزمەتتىڭ ءتۇرلى ساتىسىنان ءوتتى. سەرجانت جۇمابەك راحىموۆ – سولتۇستىك قازاقستان وبلىسىنىڭ تۋماسى. بالا كەزدەن ۇلتتىق ونەرىمىز ايتىسقا قىزىعۋشىلىق تانىتىپ ءوستى.
– ءالى ەسىمدە, بالا كۇنىمىزدە تەلەديداردان ايتىس كورەتىن ەدىك. وتباسىمىزبەن كوك جاشىككە قادالامىز. اكەمىز ەكەۋمىز وتىرىپ, تالقىلايمىز, سويلەسەمىز. «قاپ, مىنا اقىن مىنا جەردە بىلاي دەۋى كەرەك ەدى. مىنا ۇيقاسى بىلاي بولعاندا» دەگەن قىزۋ اڭگىمە. انام – الماتى وبلىسىنىڭ تۋماسى. ناعاشىلارىمنىڭ كوبى ونەرگە جاقىن. دومبىرا تارتۋ, اقىندىق بويلارىندا بار. اكەمنىڭ ءوزى بايان, دومبىرا وينادى. اۋىلدىڭ بىردە-ءبىر تويى اتا-انامنىڭ ءانىنسىز وتپەيتىن. مەن دە بالا كەزىمنەن تويعا شىعىپ, ءان ورىندايمىن. ءوزىمنىڭ ولەڭدەرىمدى ايتامىن. قىسقاسى سول كەزدەن-اق اقىندىق جولدى تاڭداۋعا بەل بۋدىم, – دەپ اڭگىمەسىن باستادى ۇلاندىق سارباز.
اقىن بولام دەپ ارمانداعان كەيىپكەرىمىز مەكتەپتە قازاق ءتىلى مەن ادەبيەتىن, قازاقستان تاريحى ءپانىن تەرەڭدەتە وقيدى. وڭىردەن شىققان جىراۋ, اقىنداردىڭ شىعارماشىلىعىمەن جاقىنىراق تانىسادى. بەرىلگەن ءبىلىمدى بويىنا بارىنشا سىڭىرەدى. ناتيجەسىندە, پەتروپاۆل قالاسىنداعى دارىندى بالالارعا ارنالعان وقۋ گيمنازياسىنا شاقىرىلىپ, ويداعىداي اياقتايدى. مەكتەپتە بالا اقىن اتانىپ, ەلىمىزدىڭ بۇكىل وڭىرىنە جارىسقا بارعان.
– ارينە, ءومىر تاقتايداي تەگىس ەمەس. بارلىعى سەن ايتقانداي بىردەن بولا بەرمەيدى ەكەن. العاشىندا اۋدانارالىق, وبلىستىق ايتىستارعا شىقتىم. «جەڭىلىسسىز جەڭىستىڭ ءدامىن بىلمەيسىڭ» دەمەكشى, سۇرىنگەن كەزدەر دە بولدى. اعاتتىقتارىمنان ساباق الىپ, كەلەسى ايتىستارعا دايىندالاتىنمىن. اسىرەسە ماعان اۋىلى ارالاس, قويى قورالاس كوكشەتاۋ وبلىسىنىڭ تۋماسى بايانعالي اعا ءالىمجانوۆ كوپ ىقپال ەتتى. ونى تەليديداردان كورىپ, كەيىن اڭگىمەلەسىپ, ارالاسا ءجۇرىپ اعالى-ءىنىلى قارىم-قاتىناسقا كوشتىك. كوپ ىزدەنە ءجۇرىپ, وبلىستىڭ نامىسىن قورعايتىن ايتىسكەرلەردىڭ قاتارىن تولىقتىردىم. بۇرىن پەتروپاۆل قالاسىنداعى ايتىسقا قاتىساتىنمىن. سول كەزدە ۇلتتىق ۇلان اسكەري ينستيتۋتىنىڭ اتىنان مەدەت جەكسەناي قاتىسىپ ءجۇردى. ول دوسىم ءبىر توپ كومانداسىن ەرتىپ, كورەرمەندى كۋرسانتتارمەن تولتىرىپ, ءوز اۋديتورياسىمەن كەلەتىن. سوندا دا مەنى ۇتا المادى. كەيىن ونى ءوزى دە مويىنداعان. ءومىردىڭ قىزىعىن قاراشى, قازىر ءوزىم وسى ۇلتتىق ۇلان اكادەمياسىنىڭ نامىسىن ايتىستا قورعاپ ءجۇرمىن, – دەپ اعىنان جارىلدى جۇمابەك.
جۇمابەك ايتىس ونەرىنىڭ شىڭىن باعىندىرۋ جولىندا جۇرگەندە اسكەرگە شاقىرتۋ الادى. جەل وتىندەگى, ەل شەتىندەگى كۇرشىم شەكارا جاساعىنان ءبىر-اق شىعادى. ەلىمىزگە ايگىلى كاتونقاراعاي وڭىرىندە ازاماتتىق بورىشىن اتقارادى. «القابەك», «قاراشىلىك» شەكارا زاستاۆالارىندا ءجۇرىپ كينولوگ ماماندىعىن مەڭگەرەدى.
اسكەردەن كەلگەن سوڭ ۇلتتىق ۇلاننىڭ اسكەري بولىمدەرىنە جاس جىگىتتەردى كەلىسىمشارت نەگىزىندە جۇمىسقا قابىلداپ جاتقانىن ەستيدى. اسكەري بيلەت قالتاسىندا, بىرجىلدىق دايىندىعى بار جۇمابەك كوپ ويلانباي ەل اراسىندا «جامانسوپكا» اتالىپ كەتكەن قاج مەكەمەلەرىن كۇزەتەتىن 6637 اسكەري ءبولىمنىڭ ءۇشىنشى جەكە اتقىشتار روتاسىنا قىزمەتكە ورنالاسادى. سول جەردە بولىمشە كومانديرى بولىپ قىزمەتىن باستايدى ءارى قاراي ءوزى قىر-سىرىن مەڭگەرگەن كينولوگ ماماندىعى بويىنشا ەڭبەك ەتەدى. قاراكەمەردەگى وقۋ قۇراماسىندا ماماندىعى بويىنشا ءبىلىمىن جەتىلدىرەدى. كەيىن 6636 اسكەري ءبولىمىنىڭ دەرجاۆينسكتەگى جەكە اتقىشتار روتاسىنا اۋىسادى. ول بولىمشە جابىلعان سوڭ, 6637 اسكەري ءبولىمىنىڭ جەدەل ماقساتتاعى روتاسىنا اۋىسادى. قانداي قىزمەت اتقارسىن ءوزىن جاۋاپتى اسكەري قىزمەتكەر رەتىندە كورسەتەدى.
– مەرزىمدى قىزمەتتى اتقارعاندا اسكەري سالانىڭ قىر-سىرىن تانىپ-ءبىلدىم. جارعىعا ساي جاۋاپ بەرۋدى مەڭگەردىم. كەيىن كەلىسىمشارتپەن قاراۋىل قىزمەتىنە كىرىسكەندە ءتىپتى اسكەري ادامعا اينالدىم. ويتكەنى قاراۋىل قىزمەتى ۇلكەن جاۋاپكەرشىلىكتى تالاپ ەتەدى. قاراۋىل قىزمەتىنەن كەيىن قوعامدىق ءتارتىپ پەن قاۋىپسىزدىكتى قامتاماسىز ەتۋ بويىنشا قىزمەت تۇرىنە اۋىستىم. سوندا دا ءوزىمنىڭ اقىندىق ونەرىمدى بىرگە الىپ ءجۇردىم. باسشىلىق ونى بايقاسا كەرەك, كەيىن ماعان ۇلتتىق ۇلان اكادەمياسىنداعى جۇرگىزۋشى قىزمەتىن ۇسىندى. بۇگىندە تولىق ءبىر مۇراجايدى باسقارۋدى سەنىپ تاپسىردى. بۇل دا وتە قىزىق ءارى جاۋاپتى قىزمەت, – دەيدى ول.
جوعارىدا ايتىپ وتكەندەي, كەيىپكەرىمىز اكادەميا اتىنان, جالپى سولتۇستىك قازاقستان وبلىسىنىڭ اتىنان ايتىستارعا قاتىسادى. بالا كەزىندە ارمانداعان ماقساتىنا قول جەتكىزدى. ءبىرجان سال قوجاعۇل ۇلىنا ارنالعان رەسپۋبليكالىق ايتىستا 1-ورىندى يەلەندى. ەلىمىزدىڭ تۇكپىر-تۇكپىرىنەن كەلگەن كىل مىقتى اقىنداردىڭ اراسىنان جەڭىمپاز اتاندى. الماتىدا وتكەن «اسىل دومبىرا» كوماندالىق ايتىسىندا سولتۇستىك قازاقستان وبلىسىنىڭ نامىسىن جىرتىپ, جاقسى جەتىستىكتەرگە قول جەتكىزدى.
– ارتىڭدا ەلىڭ تۇرعاندا, ەلدىڭ اماناتى تۇرعاندا اقىنعا قاتەلەسۋگە بولمايدى. اسكەري قىزمەتتە دە سولاي. ادام بالاسى ارتىندا ەلى, جەرى تۇرعانىن سەزىنگەنى دۇرىس. جاۋاپكەرشىلىك بار جەردە ناتيجە بار. جاۋىنگەرلىك رۋحىمىز مىقتى بولعاندا ءسوزىمىز سالماقتى بولادى, – دەپ ءوز ويىن اياقتادى جۇمابەك.
دارىن سەيىتوۆ
