كوشپەلى كەڭەسكە قازاقستاننىڭ ەڭبەك ەرى, ءماجىلىس دەپۋتاتى, رەسپۋبليكالىق ارداگەرلەر ۇيىمىنىڭ توراعاسى باقتىقوجا ىزمۇحامبەتوۆ باستاعان ورتالىق كەڭەستىڭ تورالقا مۇشەلەرى, وبلىس اكىمى قۇمار اقساقالوۆ, استانا, الماتى, شىمكەنت قالالارى مەن وڭىرلىك فيليالداردىڭ باسشىلارى قاتىستى.
باقتىقوجا سالاحاتدين ۇلى الدىمەن جينالعانداردى رەسپۋبليكا كۇنىمەن قۇتتىقتاپ, ارداگەر ارىپتەستەرىنە جوعارى مەملەكەتتىك ناگرادالار تاپسىردى.
«پرەزيدەنتىمىز ءادىل ءارى وزىق مەملەكەت قۇرۋدى كوزدەيدى. ەل ومىرىندە بولىپ جاتقان وڭ وزگەرىستەر دە از ەمەس. «حالىق ۇنىنە قۇلاق اساتىن مەملەكەت» تۇجىرىمداماسى ءساتتى جۇزەگە اسىپ كەلەدى. ءبىزدىڭ باستى مىندەتىمىز – پرەزيدەنت رەفورمالارىن جۇزەگە اسىرۋ باعىتىنداعى جۇمىستارعا بەلسەنە اتسالىسۋ, ەلىمىزدە بولىپ جاتقان تۇبەگەيلى بەتبۇرىستاردى ءوڭىر تۇرعىندارىنا بارىنشا بايىپتى, تۇسىنىكتى جەتكىزۋ. بۇگىنگى باسقوسۋىمىز ادىلەتتى مەملەكەتتى قۇرۋ جولىنداعى كوشەلى ءىستى قولدايتىن, الداعى جوسپارىمىزدى ايقىندايتىن اسا ماڭىزدى كەڭەس», دەدى باقتىقوجا ىزمۇحامبەتوۆ.
بۇدان ءارى جەرگىلىكتى ارداگەرلەر ۇيىمدارىنىڭ الداعى جۇمىس جوسپارىنىڭ باسىم باعىتتارى جونىندە اڭگىمە ءوربىپ, كەلەشەكتە جولداۋدا ايتىلعان بىرنەشە ماسەلە باستى نازارعا الىناتىن بولدى.
ۇيىم توراعاسىنىڭ ايتۋىنشا, ارداگەرلەر ادىلەتتى قوعام قۇرۋ جولىنداعى ورتاق ىسكە اتسالىسىپ, مەملەكەتتىڭ ىشكى ماسەلەلەرىنە بەلسەندى تۇردە قولداۋ كورسەتىپ وتىرۋعا ءتيىس. وسى ماقساتتا پرەزيدەنت باستامالارىن جۇرتشىلىققا تۇسىنىكتى جەتكىزىپ, كوپشىلىك كوكەيىنە سىڭىرە الاتىن, جالپى الەمدەگى احۋالدان حابارى مول, ەلگە بەدەلدى, ايتارى بار ارداگەرلەردەن تۇراتىن ءموبيلدى توپتار قۇرىلماق.
اتالعان ۇيىمنىڭ جۇمىس جوسپارىن پىسىقتاۋ بارىسىندا ۇلتتىق ءداستۇردى, مادەني-رۋحاني قۇندىلىقتاردى دارىپتەيتىن ءىس-شارالارعا كوبىرەك اتسالىسۋ, جاستاردىڭ بويىنا وتانسۇيگىشتىك قاسيەتتەردى ۇيالاتاتىن رۋحاني دۇنيەلەردى كوپتەپ ناسيحاتتاۋ سەكىلدى ماڭىزدى ماسەلەلەر ءسوز بولدى.
«بۇل ماسەلەدە بىزگە قىزىلوردا, جامبىل, تۇركىستان, الماتى وبلىستارى جاقسى ۇلگى بولا الادى. اتالعان وڭىرلەردە «اكەلەر مەكتەبى», «انالار مەكتەبى» سياقتى قوعامدىق ينستيتۋتتار جۇمىس جۇرگىزىپ جاتقانىن بىلەمىز. وسىنداي قوعامعا تيەتىن پايداسى زور يگى جۇمىستاردى وزگە وڭىرلەر دە قولعا الۋى كەرەك. سونىمەن قاتار كەيىنگى جىلدارى ءدىن توڭىرەگىندە دە نەشە ءتۇرلى ۇشقارى وي-پىكىرلەر ءجيى ايتىلىپ ءجۇر. وكىنىشكە قاراي, ءتۇرلى اعىم وكىلدەرى ءدىن جايىندا اڭگىمە ايتامىز دەپ, قازاقتىڭ سالت-ءداستۇرىن ىسىرىپ, ءوزىنىڭ تەرىس يدەولوگياسىن تىقپالاعىسى كەلەدى. ءدىن مەن ءداستۇردى ەشۋاقىتتا ءبىر-بىرىنە قارسى قويۋعا بولمايدى. حالقىمىز ءداستۇردى ەرەكشە قادىرلەگەن, قاستەرلەگەن, ساقتاي بىلگەن. جالپى, ءدىن تاقىرىبى وتە نازىك دۇنيە ەكەنىن ەسكەرىپ, وسى ماسەلەگە مۇقيات بولۋلارىڭىزدى سۇرايمىن», دەدى باقتىقوجا ىزمۇحامبەتوۆ.
جيىن سوڭىندا ارداگەرلەر ەل ىرگەسىنىڭ بەرىكتىگىنە ۇلەس قوسۋ, مەملەكەت باسشىسىنىڭ رەفورمالارىن جۇزەگە اسىرۋعا بەلسەندى اتسالىسۋ تۋرالى ورتاق بايلامعا كەلدى.
قوستاناي وبلىسى
