سۋرەتتى تۇسىرگەن – تىلەۋبەك شاياحمەت
جۇگىرۋدەن ءوزىن سىناپ كورەمىز دەگەن وسكەمەندىكتەر بيىگىندە كوك بايراعىمىز جەلبىرەگەن «قازاقستان» تاۋىنىڭ ەتەگىنە جينالعان. مۇندا قاتىسۋشىلار مەن كورەرمەندەر تاڭعى جاتتىعۋ جاسادى, ءدامدى پالاۋ مەن ىستىق شايدان ءدام تاتىپ, جۇرەك جالعادى. سودان كەيىن بارىپ توپ-توپقا ءبولىندى.
قاتىسۋشىلاردىڭ الدىنا شىعىپ, تاجىريبەسىمەن بولىسكەن بەلگىلى سپورتشىلاردىڭ ىشىندە اۋىر اتلەتيكادان ريو وليمپياداسىنىڭ قولا جۇلدەگەرى دەنيس ۋلانوۆ, پاۋەرليفتينگتەن وبلىس چەمپيوناتىنىڭ جۇلدەگەرى انگەلينا ۋستينوۆيچ, كوركەم گيمناستيكادان حالىقارالىق دارەجەدەگى سپورت شەبەرى, ازيا چەمپيونى رەناتا جولدينوۆا جانە 200 مەترگە كانوە ەسۋدە ازيا ويىندارىنىڭ كۇمىس جۇلدەگەرى مارگاريتا تورلوپوۆالار بولدى.
ۇيىمداستىرۋشىلاردىڭ ايتۋىنشا, بۇعان بارلىعى 200-دەن اسا سپورتشى قاتىسقان. ولاردىڭ اراسىندا رەسپۋبليكالىق, حالىقارالىق بايگەلەردە جەڭىس تۇعىرىنان كورىنىپ جۇرگەندەر دە بار. بۇل باستامانى اۋەلدە وبلىس اكىمى ەرمەك كوشەرباەۆ كوتەرىپ, قالا باسشىلىعى مەن سپورت ماماندارى ءبىراۋىزدان قولداعان.
– بۇل جارىستى جىل سايىن وتكىزىپ تۇرساق دەگەن ويىمىز بار. بيىل رەسپۋبليكا كۇنىنە وراي العاش رەت قولعا الىپ وتىرمىز. سپورتتى سەرىك ەتكەندەر ءۇشىن جارىستار جۇگىرۋمەن عانا شەكتەلمەيدى, باسقا تۇرلەرىن قولعا الىپ جاتىرمىز, – دەدى وسكەمەننىڭ اكىمى جاقسىلىق ومار.
جارىس جولىنا العاش بولىپ قىزدار شىقتى. ۇنەمى تاۋعا جۇگىرىپ جۇرگەندەردىڭ ءوزى مارەنى باعىندىرۋ وڭاي ەمەس ەكەنىن ايتىپ جاتتى. راس, جاتتىعۋ كەزىندە جاراۋ اتتاي ويناقتاپ جۇرگەن سپورتشىلار تاۋدىڭ يىق تۇسىنا جەتە بەرە قوڭىر اياڭعا باسقان. قارا ۇزە جۇگىرگەندەر دە بولدى. دەسە دە, تاۋ باسىنا دەيىن ءبىر دەممەن جۇگىرىپ شىققاندار نەكەن-ساياق ەدى. قىزدار توبى مارەگە جەتكەن سوڭ سورەگە جىگىتتەر تۇرعان. ولار دا ورگە قاراي جۇگىرۋ – جازىقتاعى جۇگىرىستەن الدەقايدا اۋىر ەكەنىن ءا دەگەندە تۇسىنگەن. اياق بۇلشىق ەتتەرى بۇلتىلداپ تۇرعان اتلەتتەر دە اسىققان جوق. بيىگىنە جەتە بەرە عانا باسەكەلەستەرىن سەزدى مە, جۇلقىنا العا ۇمتىلعان. جىگىتتەر جاعى ورتاشا ەسەپپەن 6-8 مينۋت ارالىعىندا تاۋعا كوتەرىلگەن ەكەن. جەڭىمپازداردى ماراپاتتاۋ ساتىندە كوپشىلىك كۇتپەگەن جەڭىمپازدىڭ ەسىمىن اتاعاندا قۋانىشتان توبەمىز كوككە ءبىر ەلى جەتپەي قالدى. وسكەمەندەگى №19 مەكتەپتىڭ 11-سىنىپ وقۋشىسى ايان قاسىموۆ, فەدور سۋحونوسوۆ, دانيل كۋزنەتسوۆ سىندى سۇڭعاق بويلى اتلەتتەردى شاڭ قاپتىرىپ, 6 مينۋت 8 سەكۋند ىشىندە مارەگە جەتكەن. ماراپاتتاۋدان كەيىن جەڭىمپازدى سوزگە تارتىپ ەدىك, جۇگىرۋمەن مۇلدەم اينالىسپايتىنىن ايتتى.
– نەگىزىنەن ۆەلوشاباندوزبىن. ۆەلوجارىستاردا العان جۇلدەلەرىم بار. ال تاۋعا جۇگىرۋگە ارنايى دايىندالعان دا جوقپىن. ءبىرىنشى رەت جۇگىرىپ شىقتىم, – دەدى وسكەمەننىڭ تۋماسى ايان.
اسىقتاي ۇل قازىردىڭ وزىندە بىرقاتار سپورتتىق جەتىستىكتەرگە جەتكەن, ەرتەڭگى كۇنى ەلىمىزدىڭ كوك بايراعىن بيىكتەن جەلبىرەتەرى انىق. رەسپۋبليكا كۇنىنە ارنالعان ءىس-شارالار بۇدان كەيىن كونتسەرتتىك باعدارلامالارمەن جالعاسىن تاپقان.
وسكەمەن
