جامبىل وبلىسىنىڭ اۋىل شارۋاشىلىعى وندىرۋشىلەرى بيىل سۋارمالى سۋ تاپشىلىعى مەن تەمپەراتۋرانىڭ قالىپتان تىس بولۋىنا بايلانىستى قاتتى زارداپ شەكتى. بۇل داقىلداردىڭ ونىمدىلىگىنە اسەر ەتكەنى ءسوزسىز. بيىلعى جىلدىڭ تامىز ايىندا «قازاگروقارجى» اگرارشىلارعا ەگىننىڭ وسپەۋىنەن تۋىنداعان قارجىلىق قيىندىقتاردى ەڭسەرۋگە كومەكتەسۋ ماقساتىندا قارجى ليزينگى شارتتارىن قايتا قۇرىلىمداۋعا جانە ۇزارتۋعا وتىنىمدەر قابىلداۋدى قولعا الدى.
جامبىل وبلىسى بويىنشا «قازاگروقارجى» اق فيليالىنىڭ ديرەكتورى جانار يسمايلوۆا-ەسجانوۆا قازىرگى كليماتتىق جاعدايدا اگرارشىلاردى قولداۋدىڭ ماڭىزدىلىعىن اتاپ ءوتتى. ء«بىز قولايسىز اۋا رايىنان زارداپ شەككەن كليەنتتەرىمىزگە وزدەرىنىڭ قارجىلىق ليزينگ شارتتارىن قايتا قۇرىلىمداۋعا جانە ۇزارتۋعا مۇمكىندىك بەرەمىز. بۇل – وڭىردەگى اۋىل شارۋاشىلىعىن قولداۋ جولىنداعى ماڭىزدى قادام», دەدى ج.يسمايلوۆا-ەسجانوۆا.
قازىرگى جاعداي بويىنشا جامبىل وبلىسى فيليالىنا شارتتاردى قايتا قۇرىلىمداۋعا جانە ۇزارتۋعا 15 ءوتىنىم كەلىپ ءتۇستى, ونىڭ 6-اۋى ماقۇلداندى. 1 ءوتىنىم مەدياتسيا بويىنشا ماقۇلدانعان, ال قالعاندارى قارالىپ جاتىر. بۇعان دەيىن «قازاگروقارجى» تۇراقسىزدىق ايىبىن ەسەپتەن شىعارۋ جونىندەگى اكتسيانى ىسكە قوسقان, سونداي-اق ء«وز جەمشوبىمىز» باعدارلاماسى شەڭبەرىندە 2024 جىلعى 1 ناۋرىزعا دەيىن اۆانستى تولەۋدى كەيىنگە قالدىرۋ مۇمكىندىگىن بەرىپ, جەم ءوندىرۋ ءۇشىن اۋىل شارۋاشىلىعى تەحنيكاسىن ليزينگتەۋ جونىندەگى ارنايى شارتتاردى ۇسىنعان بولاتىن. بۇل شارالار اگرارلىق سەكتوردى قولداۋعا باعىتتالعان جانە اۋىل شارۋاشىلىعى وندىرۋشىلەرىنە ءوڭىردىڭ اگروونەركاسىپتىك كەشەنىنىڭ تۇراقتى دامۋىن قامتاماسىز ەتە وتىرىپ, ۋاقىتشا قارجىلىق قيىندىقتاردى جەڭۋگە كومەكتەسەدى.
