ۇكىمەت باسشىسى ءوز سوزىندە ەاەو 10 جىل ىشىندە وڭىردەگى بەدەلدى ينتەگراتسيالىق بىرلەستىك رەتىندە تانىلعانىن اتاپ ءوتتى.
«بۇگىنگى تاڭدا ەاەو – 190 ملن-عا جۋىق حالقى, 93 ملن-نان استام ادامنان تۇراتىن ەڭبەك نارىعى بار جانە ءىجو-ءسى 2,7 ترلن دوللاردى قۇرايتىن سۇرانىسقا يە جانە ءتيىمدى ىنتىماقتاستىق فورماتى. مۇشە مەملەكەتتەردىڭ ءوزارا ساۋداسى 2015 جىلدان 2022 جىلعا دەيىن 2 ەسەگە ءوسىپ, شامامەن 85 ملرد دوللارعا جەتتى. مۇنىڭ ءبارى – ءبىزدىڭ بىرلەسكەن كۇش-جىگەرىمىز بەن جەمىستى جۇمىسىمىزدىڭ, سونداي-اق ەلدەر اراسىنداعى جوعارى دارەجەدەگى ارىپتەستىك قارىم-قاتىناستاردىڭ ناتيجەسى», دەدى ءاليحان سمايىلوۆ.
پرەمەر-ءمينيستردىڭ ايتۋىنشا, ينتەگراتسيالىق بىرلەستىكتى ودان ءارى دامىتۋدىڭ وزەكتى ماسەلەلەرىنىڭ ءبىرى – ورتامەرزىمدى كەزەڭگە ارنالعان دەكلاراتسيا جوباسى.
«بۇل قۇجات ناقتى ەكونوميكالىق ناتيجەسى بار سالالارداعى ينتەگراتسيالىق ۇدەرىستەردىڭ دامۋىنا جاڭا سەرپىن بەرەتىنىنە سەنىمدىمىن. بۇل رەتتە ەاەو-نىڭ بازالىق قاعيداتتارى مەن ماقساتتارى, اتاپ ايتقاندا, ونىڭ ەكونوميكالىق باعىتى ينتەگراتسيانىڭ مىزعىماس نەگىزى بولىپ قالۋى كەرەك», دەدى ءاليحان سمايىلوۆ.
ۇكىمەت باسشىسى ەاەو-نىڭ ساۋدا-ەكونوميكالىق سالانى دامىتۋدا پايدالانىلماي كەلگەن زور الەۋەتى بار ەكەنىنە توقتالدى. الايدا تىڭ جەتىستىكتەرگە جەتۋ ءۇشىن ينتەگراتسيانىڭ قازىرگى قالىپتاسقان جاعدايىنا شىنايى باعا بەرۋ قاجەت.
«وسى ماقساتتا بيىلعى مامىر ايىندا قازاقستان پرەزيدەنتى قاسىم-جومارت توقاەۆ قابىلدانعان مىندەتتەمەلەردىڭ ورىندالۋىن باعالاۋدى تاپسىردى. ۇسىنىلعان بايانداما جوباسىن ساپالى دەڭگەيدە پىسىقتاۋ قاجەت دەپ سانايمىز», دەدى ۇكىمەت باسشىسى.
سونىمەن قاتار ءاليحان سمايىلوۆ ساۋدا-ساتتىقتىڭ ۇلعايۋىنا ترانزيتتىك الەۋەتتى ءتيىمدى پايدالانۋ مەن دامىتۋ ىقپال ەتەتىنىن اتاپ ءوتتى. ماسەلەن, قازىرگى ۋاقىتتا ەاەو اياسىندا تاۋارلار اينالىمىن باقىلاۋدىڭ بىرقاتار جاڭا تەتىكتەرى, ونىڭ ىشىندە ناۆيگاتسيالىق پلومبالار قولدانىلىپ كەلەدى.
«مۇشە مەملەكەتتەردىڭ اۋماعى بويىنشا بارلىق جۇك تاسىمالى باقىلاناتىن بولادى. بۇل رەتتە بيزنەس ءۇشىن ناۆيگاتسيالىق پلومبالاردى كەزەڭ-كەزەڭمەن جانە بارىنشا «اۋىرتپالىقسىز» ەنگىزۋگە ءتيىسپىز. كوميسسياعا بۇل جۇمىستى بيزنەستىڭ پىكىرىن ەسكەرە وتىرىپ جۇرگىزۋدى ۇسىنامىن», دەدى پرەمەر-مينيستر.
وعان قوسا ۇكىمەت باسشىسى تابىستى ەكونوميكالىق ينتەگراتسيانىڭ باستى ولشەمى جاڭا وندىرىستەر, تەحنولوگيالار مەن جۇمىس ورىندارى ەكەنىن ايتتى. قازىرگى ۋاقىتتا كوميسسيا الاڭىندا دارىلىك زاتتار مەن مەديتسينالىق بۇيىمداردىڭ ورتاق نارىقتارىن ودان ءارى دامىتۋ تۇجىرىمداماسى ازىرلەنىپ جاتىر.
قازاقستان وسى سالالارداعى ىنتىماقتاستىقتىڭ كوكجيەگىن دەنساۋلىق ساقتاۋ سالاسىنداعى بىرىڭعاي ساياسات ارقىلى ەمەس, جوعارى تەحنولوگيالىق ءدارى-دارمەكتەر مەن مەديتسينالىق بۇيىمداردى ءوندىرۋ ءۇشىن جاعداي جاساۋ ارقىلى ودان ءارى كەڭەيتۋدى ۇسىنادى.
«بۇل تۇرعىدا ءبىز وندىرىستىك قۋاتتاردى دامىتۋدى ىنتالاندىرىپ, سونداي-اق تەحنولوگيالار ترانسفەرتى ءۇشىن قولايلى جاعدايلار جاساۋىمىز كەرەك. كوميسسيادان تۇجىرىمدامانى تۇزەتۋ كەزىندە وسىنى ەسكەرۋىن سۇرايمىن», دەدى ۇكىمەت باسشىسى.
