ەلىم, جۇرتىم, قازاقستانىم تاۋەلسىزدىك العانداي سەزىمدە بولدىم. دەكلاراتسيادان كەيىن كوپ ۇزاماي وتانىمىز دەربەس رەسپۋبليكا رەتىندە تاۋەلسىزدىگىن جاريالادى.
بۇرىن تاۋەلسىزدىك كۇنى رەتىندە اتالىپ كەلگەن ەلدىك تويىنىڭ ءمان-ماڭىزى ەرەكشە. حالىق پەن ۇلت بولۋدىڭ ەڭ وزىق, جەتىلگەن ۇلگىسى – رەسپۋبليكاعا اينالۋ. ءتۇبى ەلدىك پەن تەڭدىكتى كوكسەگەن حالىق ەركىندىگى مەن ەلدىك مۇددەسى, ادامدارىنىڭ قادىر-قاسيەتى زاڭمەن قورعالاتىن رەسپۋبليكا بولماي قويمايتىنىن ۋاقىت دالەلدەدى. ادامدارى تەڭ قۇقىلى دەموكراتيالى مەملەكەت بولعانعا نە جەتسىن! دەمەك, ەلدىكتىڭ كەمەل ۇلگىسى رەتىندە رەسپۋبليكانى ايگىلەپ, رەسپۋبليكا بەكىگەن كۇندى توبەمىزگە تۇتپاي نە كورىنىپتى؟ مەرەكەنىڭ ءمانى مەن سالماعى وسىدان-اق بەلگىلى.
قازاق ەلدىگى مەن مەملەكەتى بەلگىلەنگەن اتاۋلى كۇن بارشا جۇرتتىڭ ۇلتتىق مەرەكەسى بولىپ بەلگىلەنگەندە, مەنىڭ دە كەۋدەمدى ماقتانىش سەزىمى كەرنەدى. مەنىڭ رەسپۋبليكام, وتانىم, جۇرتىم دەپ تەبىرەنبەگەن جان ەشقاشان تولىق ادامعا اينالماق ەمەس. وندايلاردىڭ سايدا سانى, قۇمدا ءىزى قالمايتىنىن تاريح الدەقاشان دالەلدەگەن. ءبىزدىڭ رەسپۋبليكا, ۇلى وتان, ۇلان-بايتاق قازاقستان كوزىمىزدىڭ قاراشىعى, كەۋدەمىزدەگى جۇرەگىمىز بولىپ سوعىپ تۇرۋعا ءتيىس. سوندا عانا تاتۋلىق پەن بىرلىك, ەلدىك پەن تەڭدىك ءورىس جايادى. ەلدىگى بار ىنتىماقتى جۇرتتىڭ ىرگەسى قاشاندا بەرىك. رەسپۋبليكا كۇنى – ۇلت مەرەكەسىن سولاي ءتۇسىنۋىمىز كەرەك. رەسپۋبليكامىزدىڭ داڭقى اسا بەرسىن!
توقتار اۋباكىروۆ,
قازاقتىڭ تۇڭعىش عارىشكەرى
