وسى اۋىلدا ەكى مىڭىنشى جىلدارى «حالىق» اتتى فەرمەرلىك قوجالىق قۇرىلدى. كەزىندەگى كەڭشاردان بۇلارعا تيگەنى 2 «بەلارۋس» تراكتورى مەن 2 «ەنيسەي» كومباينى ەدى. قوجالىققا بىرىككەن 42 ءتۇتىننىڭ ادامدارى توزىعى جەتكەن وسى تەحنيكانى قولدا بارمەن جاماپ-جاسقاپ ەگىسكە شىعاردى. سول جىلى ايتارلىقتاي ءونىم الىپ, قاتارعا قوسىلىپ سالا بەردى.
– قازىر قولدا بار تەحنيكانىڭ سانى 20-دان اسادى. ونىمدىلىگى جوعارى ماگدون, دجون دير سەكىلدى زاماناۋي تۇرلەرىن الاتىن جاعدايعا جەتتىك. وسىنىڭ ءبارى ەلدىڭ بىرلىگىنىڭ ارقاسى, – دەيدى قوجالىق باسشىسى حالىقبەردى مىحانوۆ.
قازىر 600-گە جۋىق ءتۇتىنى بار اۋىلدىڭ 80 پايىزى وسى شارۋاشىلىققا بىرىككەن. شارۋاشىلىق توراعاسى جىلداعى پاي ۇلەسىنەن بولەك اۋىل اقساقالدارىنا قوسىمشا جەمشوپ جەتكىزىپ, الەۋمەتتىك دەمەۋ كۇتەتىن وتباسىلارعا قولداۋ كورسەتىپ وتىرادى. اۋىلدان بولەك, اۋدان ورتالىعىنداعى قايىرىمدىلىق شارالارىنان سىرت قالىپ كورگەن كەزى جوق. ءبىز شارۋاشىلىق توراعاسىنىڭ تالايلارعا دەمەۋ بولىپ, تىرشىلىك كوشىنە ىلەسىپ كەتۋىنە سەپ بولعانىن اۋىل اكىمى مەن ونى كوپ جىلداردان بەرى بىلەتىندەردەن ەستىدىك. «وڭ قولىڭنىڭ بەرگەنىن سول قولىڭ كورمەسىن» دەگەندى ۇستاناتىن ازامات بىزبەن بۇل تاقىرىپتا ساراڭ اڭگىمەلەسىپ, سيرەك مالىمەتپەن شەكتەلگەن ەدى.
– اۋىلدا مۇمكىندىگى شەكتەۋلى 22 بالا بار. سولاردىڭ جاڭا جىل قارساڭىنداعى سىي-سىياپاتىن وسى اعامىز جىلدا ەشكىم مىندەتتەمەي-اق تاراتىپ شىعادى. قوسىمشا تاپسىراتىن ازىق-ت ۇلىگى جانە بار. جۋىردا اۋىلدىڭ ورتالىق كوشەسىن قورشاۋلاپ بەردى. ءتىپتى كەيدە سىرتتان كەلىپ, كومەك سۇرايتىندار كەزدەسەدى. شارشاپ كەلگەن ادامدى دەمەپ, شيراتىپ جىبەرەتىن شارۋا ادامى ولاردىڭ دا كوڭىلىن جىققان ەمەس. ناۋقان قورىتىندىسىمەن جىل سايىن ۇزدىك شىققاندارعا كولىك مىنگىزىپ, ءۇي ساتىپ الىپ بەرىپ جاتىر, – دەيدى كەردەلى اۋىلدىق وكرۋگىنىڭ اكىمى عالىمجان ىحانوۆ.
جالپى, اۋىلعا ينۆەستور بولۋ وڭاي ەمەس. قازىر تىرشىلىگى تۇزەلىپ قالعان اۋىلداردىڭ كوپشىلىگى كەزىندە تالاي وتكەلەكتەن ءوتتى. ءتىپتى جارىلقايمىز دەپ كەلىپ, اۋىلدىڭ بار جەرىن بانككە كەپىلگە قويىپ, قالتاسىن تولتىرىپ تايىپ تۇرعاندار دا كەزدەسكەنى وتىرىك ەمەس. ماڭداي تەرى توپىراققا سىڭبەگەن وسىنداي الاياقتارعا جەم بولعان جۇرتتىڭ جانايقايىن تالاي مارتە ەستىدىك تە.
– ءوزى قينالىپ وتىرعان جۇرتتىڭ قالتاسىن قاعىپ كەتكەن مۇنداي ارەكەتتى سىرتتان كەلگەندەر جاسايدى, – دەيدى شارۋاشىلىق توراعاسى. تۋعان جەرگە كىندىگىنەن بايلانعان جان مۇندايعا بارماق ەمەس. جاسىراتىنى جوق, سوڭعى جىلداعى سۋ تاپشىلىعى تابىسىمىزعا ايتارلىقتاي اسەر ەتىپ وتىر. سوندا دا ءبىز وسىعان دەيىنگى جاساپ كەلگەن قولداۋدى جالعاستىرا بەرەمىز. الدا ارتاراپتاندىرۋعا دەن قويىپ, وسىعان دەيىن ەگىپ كەلگەن بيداي مەن جوڭىشقانى ۇلعايتىپ, كۇرىش كولەمىن ءسال ازايتۋىمىز دا مۇمكىن. بىراق جۇمىسشى جاعدايى, ەلدىڭ تۇرمىسى ءبىرىنشى ورىندا تۇرادى. ويتكەنى قارا جەردىڭ نەسىبەسى – ەلگە ورتاق, – دەيدى قوجالىق توراعاسى.
وسى كۇنى اۋىلشارۋاشىلىق سالاسىنا باراتىن جاستار قاتارى ازايىپ بارادى. بۇل «حالىق» فەرمەرلىك قوجالىعىنا دا ءتان ماسەلە بولىپ وتىر. قۇرىلىم باسشىلىعى اۋىل اراسىنان وقۋعا بەيىل بالا شىقسا, قولداۋعا ءازىر. دەگەنمەن دە ازىرگە تالاپتىلار تابىلماي تۇر.
قازىر 2 مىڭ گەكتار جەرى بار شارۋاشىلىقتا 40 ادام جۇمىس ىستەيدى. بيىلعى ناۋقان دا مارەگە تايادى, ەندى 2-3 كۇندە ديقانداردىڭ الا جازدايعى بەينەتى بەزبەنگە تۇسەدى. مەرەيلى ساتتە ءبىر سەرپىلىپ قالاتىن ەلدەگىلەر كوپ ۇزاماي كەلەر جىلدىڭ قامىنا قايتا كىرىسەدى.
ويتكەنى اۋىلدا تىرشىلىك توقتامايدى.
قىزىلوردا
