مايرا راباتقىزى بۇل ماراپاتتى بارشا ۇستاز قاۋىمىنا كورسەتىلگەن زور قۇرمەت دەپ باعالايتىنىن جەتكىزدى.
– مەملەكەت تاراپىنان ۇزاق جىلعى ەڭبەگىمنىڭ ەلەنىپ جاتقانى جۇرەك قالاۋىممەن تاڭداعان ماماندىعىمنىڭ ناتيجەسى دەر ەدىم. وسىناۋ جاۋاپكەرشىلىگى جوعارى كاسىپتى تاڭداي وتىرىپ, ءاربىر ۇستاز ساپالى ءبىلىم بەرۋدى ماقسات تۇتادى. كەيىنگى ۋاقىتتا پەداگوگ مارتەبەسى ءوسىپ, مۇعالىم ماماندىعىنىڭ قۇرمەتى ارتتى. پەداگوگيكالىق ماماندىقتارعا باراتىن ستۋدەنتتەر قاتارى كوبەيدى. سوندىقتان ەل مەكتەپتەرىندە بىلىكتى, ءبىلىمدى, وسكەلەڭ ۇرپاقتىڭ كەلەشەگىنە بەيجاي قارامايتىن مۇعالىمدەردىڭ كوپ بولعانىن قالايمىن, – دەيدى مايرا راباتقىزى.
مايرا راباتقىزى مەكتەپ پارتاسىندا ماتەماتيكا پانىنە باۋلىعان ۇستازى گەورگي پوپوۆتان كوپ ءتالىم العانىن جەتكىزدى. «مۇعالىمىمىز ەسەپ شىعارۋعا سەلقوستىقتى مۇلدەم قالامايتىن. سوندىقتان دا بولار ماتەماتيكا پانىنە قىزىعۋشىلىعىمىز وتە جوعارى بولدى. وسىنداي ىزدەنىمپاز, تالاپشىل مۇعالىمدەرىمىزدىڭ ارقاسىندا مەكتەپتى التىن مەدالمەن ءبىتىرىپ, قىزدار پەداگوگيكا ينستيتۋتىنىڭ فيزيكا-ماتەماتيكا فاكۋلتەتىنە وقۋعا ءتۇستىم. ەڭبەك جولىمدى «اينابۇلاق» شاعىن اۋدانىنداعى ورىس مەكتەبىنەن باستادىم», دەيدى ول.
1997 جىلى قازاق مەكتەبىنە اۋىسىپ, قالاداعى كوپتەگەن سەمينارعا قاتىسا ءجۇرىپ, ءوز كاسىبىندە جاڭا ءبىر بەلەستى باعىندىرعان مايرا راباتقىزى العاشقى كەزدە قازاق تىلىندەگى تەرميندەردى مەڭگەرۋدىڭ وڭاي بولماعانىن ەسكە الدى. بىرتە-بىرتە ونى دا جىلدام ۇيرەنىپ, اۋداندىق سەمينارلاردىڭ بىرىندە ەلىمىزگە ەسىمى بەلگىلى ۇستاز ەسمۇقان قاناعاتوۆتان قالاداعى №161 مەكتەپكە جۇمىسقا شاقىرتۋ الادى. «بىلىكتى ۇستازدان شاقىرتۋ الۋ ۇلكەن مارتەبە بولدى ءارى مەن وتكىزگەن سەميناردى جوعارى باعالاعانىنا سونداي قۋانعان ەدىم. كەيىننەن ديرەكتور رەتىندە وسى مەكتەپتەگى ءبىراز مۇعالىمدى ۇبت سۇراقتارىن قۇراستىراتىن ساراپتامالارعا, اپپەلياتسياعا كوپ قاتىستىردى. ناتيجەسىندە, بىلمەگەنىمدى ۇيرەنىپ, كوپ شىڭدالۋىما تۋرا كەلدى», دەپ اتاپ ءوتتى.
قازىرگى كەزدە ۇبت-عا دايىندايتىن «بولاشاق» قوسىمشا ءبىلىم ورتالىعىندا ماتەماتيكالىق ءبىلىمنىڭ سان تاراۋىنا باۋلىپ جۇرگەن ۇستاز بالالاردى بىلىمگە قىزىقتىراتىن قادامنىڭ كوپ قاجەت ەكەنىن العا تارتتى.
– تاۋەلسىزدىك جىلدارىنا دەيىنگى بالالاردا بىلىمگە قۇشتارلىق زور بولسا, قازىرگى كەزدە بىلىمگە دەگەن كوزقاراس باسقاشا. كوپ بالاعا اتا-انالارى قولداۋ كورسەتەدى. ولار ماماندىق تاڭداۋدا دا ءوز كەڭەستەرىن بەرە وتىرىپ, بالاسىنىڭ ساپالى ءبىلىم الۋىنا ينۆەستيتسياسىن اياپ جاتقان جوق. سونىڭ ناتيجەسىندە بالالاردىڭ دا بىلىمگە زەيىنى ارتىپ كەلەدى. جالپى ءبىلىم بەرەتىن مەكتەپتەردە دەڭگەيى جوعارى بالالاردىڭ دەنى قوسىمشا ورتالىقتاردا ءبىلىمىن ۇشتاپ, ۇبت-دا وتە جاقسى ناتيجەگە جەتىپ جاتىر. ال ەندى بىرىندە وزدىگىنەن ىزدەنۋ جاعى باسىم. مەكتەپتە پانگە قىزىقپاعانىمەن, قوسىمشا ءبىلىمنىڭ ناتيجەسىندە ءپاندى جىلدام مەڭگەرىپ كەتەتىن وقۋشىلار دا بار, – دەيدى مايرا راباتقىزى.
تاجىريبەلى ۇستاز اتاپ وتكەندەي, بۇگىندە وقۋلىقتاردىڭ ساپاسىنا دا ءمان بەرۋ ۋاقىت كۇتتىرمەيدى. وسى ورايدا مايرا راباتقىزى «ساپالى ءبىلىمنىڭ وزەگى وقۋلىقتا دەسەك, كەيبىر وقۋلىقتا بەرىلگەن تاپسىرما جاۋابىمەن سايكەس كەلمەي جاتاتىنى قىنجىلتادى. سوندىقتان وقۋلىق اۆتورلارى بىرنەشە ساراپتامادان ءوتىپ, وزىق تاجىريبەلەرگە زەر سالا وتىرىپ, تىپتەن بۇگىنگى وقۋلىقتاردا كەزدەسپەي جاتاتىن كەڭەستىك كەزەڭدە جازىلعان ءتيىمدى تاسىلدەردى دە قاپەرگە السا», دەگەن پىكىرىن العا تارتتى.
كەيىنگى ۋاقىتتا بالالارعا قازىرگى زامانعا ساي ساپالى ءبىلىم بەرۋدە وزدىگىنەن ىزدەنىپ, رەسپۋبليكا ايماقتارىنان دا ونلاين ساباق الىپ, بىلگەنىن جەتىلدىرىپ جاتاتىن مۇعالىمدەر قاتارى كوبەيىپ كەلەدى. پەداگوگتەر سەزىندە دە ايتىلعان ماسەلەنىڭ ءبىرى مۇعالىمدەردىڭ بىلىكتىلىگىنە قاتىستى بولدى. بۇگىندە تسيفرلىق مۇمكىندىكتەردىڭ جاڭاشىل تاسىلدەردى يگەرۋدەگى يگىلىگى زور دەسەك, ءبىلىم پلاتفورمالارىنىڭ مۇعالىمدەر ءۇشىن قولجەتىمدىلىگى, اسىرەسە شالعاي اۋدانداردا زاماناۋي قۇرالداردىڭ جەتكىلىكسىزدىگى تولعاندىرادى.
وسى ورايدا مايرا راباتقىزى: «مۇعالىم – جۇرەك قالاۋىمەن تاڭدالاتىن ماماندىق. ءاربىر ۇستاز بالا جۇرەگىنە جول تاۋىپ, ساپالى ءبىلىم بەرۋمەن قاتار ءوز ەلىنە قىزمەت ەتەتىن تۇلعا قالىپتاستىرۋدى ماقسات ەتكەندە عانا بۇل كاسىپتىڭ مارتەبەسى ارتادى. ول ءۇشىن ۇلتتىق قۇندىلىقتاردى قۇرمەتتەيتىن, جاڭا زامان تالاپتارىنا بەيىم, كاسىبي مۇعالىمدەر لەگى قالىپتاسۋى قاجەت. سوندا عانا ءبىز جاھاندانۋ زامانىنا بەيىم ءبىلىمدى جاستار تاربيەلەيمىز», دەيدى.
الماتى
