فوتو: ن.بايبۋلين.
«ەگەمەندىك تۋرالى دەكلاراتسيا قابىلدانعان داتا ەلىمىز ءۇشىن تاريحي كۇن. بۇل ەلىمىزدىڭ ەركىندىك جولىندا جاساعان اسا ماڭىزدى قادامى بولدى. سول سەبەپتى, وسى كۇندى مەرەكە رەتىندە قايتا قالپىنا كەلتىرىپ, وعان ۇلتتىق مارتەبە بەرۋدى تاريحي ادىلەتتىلىكتىڭ جارقىن كورىنىسى دەپ قابىلدايمىز. دەكلاراتسياعا سايكەس قازاقستان ءوزىن حالىقارالىق قۇقىقتىڭ دەربەس سۋبەكتىسى رەتىندە بەكىتتى. قۇجاتتا ەل تەرريتورياسىنىڭ تۇتاستىعى, وعان قول سۇعىلمايتىندىعى تۋرالى ستراتەگيالىق نورما دا ناقتى بەلگىلەندى. سونداي-اق ەلىمىز دەموكراتيالىق قۇقىقتىق مەملەكەت قۇرۋ جولىمەن جۇرەتىنىن مالىمدەدى», دەدى ماۋلەن اشىمباەۆ.
سونىمەن قاتار سەنات توراعاسى ەلىمىزدە مەملەكەت باسشىسىنىڭ باستاماسىمەن ادىلەتتى قازاقستان قۇرۋ باعىتىندا ىسكە اسىرىلىپ جاتقان رەفورمالارعا نازار اۋداردى. ونىڭ ىشىندە ەكونوميكالىق ساياساتتىڭ جاڭا ۇلگىسىن قالىپتاستىرۋدىڭ ماڭىزدى ەكەنىنە باسا ءمان بەردى.
«سەنات پرەزيدەنتىمىزدىڭ باستاماسىمەن قولعا الىنعان جانە ەلىمىزدى ودان ءارى جاڭعىرتۋعا ارنالعان رەفورمالاردى زاڭنامالىق تۇرعىدا قامتاماسىز ەتۋ ءۇشىن جۇيەلى جۇمىس جۇرگىزىپ كەلەدى. قازىرگى تاڭدا الدىمىزدا تۇرعان باستى مىندەتتەرىمىزدىڭ ءبىرى – ەكونوميكالىق ساياساتتىڭ جاڭا مودەلىن قالىپتاستىرۋ. مەملەكەت باسشىسى ءوز جولداۋىندا بۇل سالاداعى نەگىزگى باعداردى بەلگىلەپ بەردى. سوعان سايكەس زاڭ شىعارۋ قىزمەتىندە وسى باعىتقا باسىمدىق بەرەمىز. مۇنىڭ ءبارى بارشامىزدىڭ ورتاق ماقساتىمىز – ادىلەتتى قازاقستان قۇرۋ جولىنداعى ماڭىزدى قادامدار», دەگەن ماۋلەن اشىمباەۆ سەنات دەپۋتاتتارى مەن اپپارات قىزمەتكەرلەرى بۇل سالادا ۇيلەسىمدى جۇمىس ىستەپ كەلە جاتقانىن تىلگە تيەك ەتتى.
ءىس-شارا بارىسىندا سەنات سپيكەرى قاتىسۋشىلاردى مەرەكەمەن قۇتتىقتاپ, بىرقاتار سەناتور مەن اپپارات قىزمەتكەرىنە مەملەكەتتىك ناگرادالاردى تاپسىردى.
بيىل مەملەكەت باسشىسىنىڭ جارلىعىمەن سەناتورلار ءالي بەكتاەۆ ءىى دارەجەلى «بارىس» وردەنىمەن, اقمارال ءالنازاروۆا, ءلاززات قالتاەۆا جانە بەكبولات ورىنبەكوۆ «پاراسات» وردەنىمەن ماراپاتتالدى.
سونداي-اق تاعى ءبىر توپ سەناتورلارعا جانە اپپارات قىزمەتكەرلەرىنە مەملەكەتتىك ناگرادالار جانە حالىقارالىق پارلامەنتارالىق ۇيىمداردىڭ ماراپاتتارى سالتاناتتى تۇردە تاپسىرىلدى.
