جيىرما ءۇش جىلدان بەرى دالا توسىندە شارۋاسىن كۇيتتەگەن قوجالىقتا بۇگىندە 70 باس جىلقى, 200 باس قوي-ەشكى, 40 تۇيە, 20 سيىر بار. مال-جان جەراستى سۋىن وندىرەتىن فونتان ارقىلى سۋارىلادى. «قالاۋىن تاپسا, قار جانار» دەمەكشى, شارۋاشىلىق يەلەرى مال وسىرۋمەن بىرگە ەگىن ەگۋدى دە قولعا الىپ, ءتاپ-ءتاۋىر ءونىم الىپ كەلەدى. ءتىپتى ەكى جىلدان بەرى سۋ كوزى جانىنان سالىنعان الاڭدا موڭكە بالىعىنىڭ 1 500 شاباعى ءوسىرىلىپ-باپتالىپ وتىر.
بۇل شارۋاشىلىق ماڭعىستاۋ دالاسىنىڭ تابيعاتىنا كەز كەلگەن وسىمدىك ءتۇرى وسە بەرمەيدى دەگەن سىڭارجاق پىكىردى جارتىلاي بولسا دا جوققا شىعاردى دەۋگە بولادى. ولار ەگىن شارۋاشىلىعى بويىنشا جالپى 35 گا جەرگە قورشاۋ جاساپ, 2022 جىلى اشىق توپىراقتا 2 گا قاۋىن-قاربىز ەگىپ, 50 توننا كولەمىندە ءونىم جيناپ, اۋىل-ايماقتى جەرگىلىكتى تاڭسىق داممەن قامتامسىز ەتۋگە ءوز ۇلەستەرىن قوستى. سونداي-اق 2019 جىلى 1,5 گا جەرگە جوڭىشقا ەگىلىپ, كۇنى بۇگىنگە دەيىن ءونىم الىنىپ كەلەدى, قوسىمشا 150 ءتۇپ جەمىس اعاشىن دا وتىرعىزدى.
كليماتى قۇرعاق ماڭعىستاۋ وڭىرىندە كەيبىر جىلدارى جاۋىن-شاشىننىڭ تاپشىلىعى ۇشىراسىپ تۇرادى. سول سەبەپتى شارۋاشىلىقتا 2022 جىلدان باستاپ ديامەترى 548 م (25 گا) جەردى قامتيتىن, تۇركيا ەلىنەن اكەلىنگەن شەڭبەرلى جاڭبىرلاتقىش قۇرىلعىسى ورناتىلدى. وتكەن جىلدان باستاپ وبلىستىق «بوتانيكالىق ەكسپەريمەنتالدىق باعى» ءۇش جىل مەرزىمگە شارۋا قوجالىعىندا شوپتەسىن وسىمدىكتەردى وسىرۋگە تاجىريبە جۇرگىزىپ باستادى. شارۋاشىلىق يەلەرى «نىساپ» جەرى ماڭىنان شابىندىققا الىنعان 2 500 گا جەردەن 8 000 تۇك ءشوپ دايىنداپ, جارمىش, شەتپە حالقىنا قول جەتىمدى باعادا ساتىپ وتىردى.
– شارۋاشىلىعىمىزدىڭ جۇمىسىن جەتىلدىرە جۇرگىزۋ باستى نازاردا. ءوزىمىزدىڭ كۇشىمىزبەن بىرگە مەملەكەتتىك قولداۋلار دا بىزگە دەمەۋ بولىپ وتىر. 2022 جىلى 1 تراكتور, 1 شوپشاپقىش, 1 تىرما, 1 شوپتايلاعىش, 1 سوقانى ليزينگكە الىپ, مەملەكەتتەن 5 ملن تەڭگە كولەمىندە سۋبسيديا بەرىلدى. 2021 جىلى قۋاڭشىلىققا بايلانىستى جەمشوپكە ۇكىمەت رەزەرۆىنەن بولىنگەن قارجىدان 1 070000 تەڭگە كومەك قاراجات بەرىلدى, بۇل – ءبىز ءۇشىن كومەك, – دەيدى شارۋاشىلىق باسشىسى ىبىراي قۇلجانوۆ.
ماڭعىستاۋ وبلىسى
