تۇراقتىلىقتى, ەتنوسارالىق كەلىسىمدى قامتاماسىز ەتۋ – مەملەكەتتىك ساياساتتىڭ ماڭىزدى باسىمدىقتارىنىڭ ءبىرى. بۇل رەتتە ەلىمىزدەگى جوعارى وقۋ ورىندارى عىلىمي بازا بولىپ سانالادى. وسىلايشا, ەتنوسارالىق تاتۋلىق پەن كەلىسىمدى نىعايتۋدا, ەتنوساياساتتى ناسيحاتتاۋ باعىتىندا قازاقستان حالقى اسسامبلەياسى كافەدرالارىنىڭ قاۋىمداستىعى قۇرىلعان ەدى.
– قحا كافەدرالارى 10 جىل ىشىندە عىلىمي-ءبىلىم بەرۋ, وقۋ-ادىستەمەلىك, الەۋمەتتىك-تاربيەلىك, قوعامدىق-ماڭىزدى جانە عىلىمي-ساراپتامالىق باعىتتاردى قامتيتىن بىرىڭعاي جۇيە قۇردى. قازاقستان بىرلىگىن نىعايتۋدىڭ جاڭا پارمەندى قۇرالدارىن قۇرۋ ەتنوسارالىق كەلىسىم سالاسىنداعى مەملەكەتتىك ساياساتتى ءتيىمدى ىسكە اسىرۋ ءۇشىن ينستيتۋتسيونالدىق جانە ينفراقۇرىلىمدىق بازانى كۇشەيتۋگە مۇمكىندىك بەرەدى, – دەدى اسسامبلەيا توراعاسىنىڭ ورىنباسارى مارات ءازىلحانوۆ.
فورۋمدا قوعامدىق كەلىسىم مەن جالپىۇلتتىق بىرلىكتىڭ وتاندىق مودەلىن, سونداي-اق ستۋدەنتتەر اراسىندا تولەرانتتىلىق پەن بىرلىكتى ناسيحاتتاۋدا بىرىڭعاي عىلىمي جانە وقۋ-ادىستەمەلىك تاسىلدەردى ازىرلەۋ ماسەلەسى كەڭىنەن ءسوز بولدى. وسىعان بايلانىستى پلەنارلىق سەسسيا بارىسىندا باق-تا قحا كافەدرالارىنىڭ مارتەبەسىن كوتەرۋ, عىلىمي-ساراپتامالىق, ءبىلىم بەرۋ جانە اعارتۋشىلىق باعىتىندا اقپاراتتىق-ءتۇسىندىرۋ جۇمىستارىن ىلگەرىلەتۋ سۇراقتارى جان-جاقتى تالقىلاندى. سونداي-اق «ەتنوساياساتتانۋشى» كوۋچ-پلاتفورماسىن قۇرۋ يدەياسى ۇسىنىلدى.
