استانالىق قورعانىس ىستەرى جونىندەگى دەپارتامەنتى مەن قالا اكىمدىگى ۇيىمداستىرعان سالتاناتتى ءىس-شاراعا قورعانىس مينيسترلىگىنىڭ, قورعانىس ىستەرى جونىندەگى دەپارتامەنتىنىڭ باسشىلىعى, قالا اكىمىنىڭ ورىنباسارى ەسەت بايكەن, اقمولا وڭىرلىك گارنيزونىنىڭ اسكەري قىزمەتشىلەرى, قارۋلى كۇشتەردىڭ جانە باسقا مەملەكەتتەردىڭ اۋماعىنداعى ۇرىس قيمىلدارىنا قاتىسقان ارداگەرلەر, «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى, اسكەرگە شاقىرىلۋشىلار مەن ولاردىڭ اتا-انالارى قاتىستى.
– اسكەري ماماندىق قاشاندا قۇرمەتكە يە, ايتسە دە ونىڭ وزىندىك قيىندىقتارى بار. اسكەري قىزمەتشىنىڭ مىندەتى – سىندارلى ساتتە ەل قورعاۋعا دايىن بولۋ. بۇگىندە قارۋلى كۇشتەر قاتارىندا وزدەرىڭ سياقتى كوپتەگەن جاس قىزمەت ەتەدى. ولار اسكەري ءىستى يگەرە وتىرىپ, كۇش-قۋات تۇرعىسىنان شىڭدالىپ, نىعايدى. وزدەرىنە دەگەن سەنىمى ارتتى. ەلىمىزگە وسىنداي بەلسەندى, ومىرلىك ۇستانىمى قالىپتاسقان جاستار قاجەت. ارقاشان ەستەرىڭدە بولسىن, سەندەردىڭ جەتىستىكتەرىڭ – اتا-انالارىڭنىڭ, تۋىستارىڭنىڭ, وتباسىلارىڭنىڭ جەتىستىگى, دەمەك ول ەلىمىزدىڭ جەتىستىگى, – دەپ اتاپ ءوتتى قورعانىس ءمينيسترىنىڭ ورىنباسارى, گەنەرال-لەيتەنانت سۇلتان قامالەتدينوۆ.
وتكەن جىلدان باستاپ قورعانىس مينيسترلىگى جاستاردىڭ مەرزىمدى اسكەري قىزمەتكە دەگەن ىنتاسىن ارتتىرۋ ماقساتىندا نەسيەلىك دەمالىستار مەن اسكەري قىزمەتتەن كەيىن ۇبت تاپسىرماي, جوعارى ءبىلىم الۋعا مۇمكىندىك بەرەتىن جەڭىلدىكتەردى ىسكە اسىرىپ كەلەدى. جيىندا مەرزىمدى قىزمەتتەن زاپاسقا شىعارىلعان اسكەري قىزمەتشىلەرگە جوعارى وقۋ ورىندارىنا ءتۇسۋ قۇقىعىن بەرەتىن سەرتيفيكاتتار سالتاناتتى جاعدايدا تابىس ەتىلدى. سونداي-اق ءىس-شارا بارىسىندا «امانات» ءراسىمى ءوتىپ, زاپاسقا شىعارىلعان ساربازدار اسكەرگە شاقىرىلۋشىلارعا ابىروي مەن باتىلدىقتى بەينەلەيتىن قالقان مەن قىلىش تارتۋ ەتتى.
«قارۋلى كۇشتەردىڭ ارداگەرلەرى» رقب توراعاسىنىڭ ورىنباسارى, وتستاۆكاداعى گەنەرال-مايور مارات ناعۇمانوۆ ءسوز الىپ, جاستارعا اق باتاسىن بەردى. ول اسكەرگە شاقىرىلۋشىلارعا جاڭا ورتاعا تەز بەيىمدەلىپ, اسكەري ءىستى يگەرۋدە ساتتىلىك تىلەدى. اكتسيا اياسىندا استانالىقتار ءۇشىن اسكەري تەحنيكا مەن قارۋ-جاراق, اسكەري كيىم ۇلگىسى مەن جابدىقتار كورمەسى ۇيىمداستىرىلدى. سونداي-اق «Smart Sarbaz» ۇيىرمەلەرى تاربيەلەنۋشىلەرىنىڭ روبوتتەحنيكا سالاسىنداعى ازىرلەمەلەرى ۇسىنىلدى.
