قوعامدىق تالقىلاۋدا ەنەرگەتيكا مينيسترلىگى, «قازاقستاندىق اتوم ەلەكتر ستانتسيالارى» جشس, ۇلتتىق يادرولىق ورتالىق جانە يادرولىق فيزيكا ينستيتۋتىنىڭ وكىلدەرى ءسوز سويلەدى.
اتوم سالاسىنىڭ ساراپشىلارى جەرگىلىكتى تۇرعىندارعا ەلدەگى ەنەرگيا تاپشىلىعىنىڭ كۇشەيۋى, اتوم ەلەكتر ستانتسيالارى قۇرىلىسىنىڭ جوباسى, زاماناۋي اتوم ستانتسيالارىنىڭ قاۋىپسىزدىگى, ولاردىڭ جۇمىس ىستەۋ پرينتسيپتەرى جانە اتوم ەلەكتر ستانتسيالارىنىڭ قورشاعان ورتا مەن ادام دەنساۋلىعىنا اسەر ەتۋ دەڭگەيى جونىندە ايتىپ بەردى.
ساراپشىلار جەرگىلىكتى تۇرعىندار قويعان سۇراقتارعا جاۋاپ بەردى. سونداي-اق, زاماناۋي يادرولىق تەحنولوگيالاردىڭ قاۋىپسىز ءارى قورشاعان ورتاعا زيانسىز ەكەنىن جەتكىزدى.
ماسەلەن, «قازاقستاندا اتوم ەنەرگەتيكاسى دامۋ كەرەك پە؟» دەگەن ساۋالعا جاۋاپ بەرگەن يادرولىق فيزيكا ينستيتۋتىنىڭ باس ديرەكتورى سايابەك سافيەۆ مۇنىڭ تەك قازاقستان عانا ەمەس, بۇكىل الەم ءۇشىن وتە قاجەتتى دۇنيە ەكەنىن ايتتى.
«ارزان ءارى ەكولوگيالىق تازا ەنەرگەتيكانى كىم وندىرەدى – سول الەمدى باسقارا الادى. اتومدى بەيبىت ماقساتتا يگەرۋ ۇدەرىسىندە قازاقستاننىڭ ورتادان ويىپ الاتىن ءوز ورنى بولۋى شارت. بىزدە اتوم ەنەرگەتيكاسىنا قاجەت دۇنيەلەردىڭ ءبارى دامىپ كەلە جاتقانىنا, كەم دەگەندە, 56 جىل بولدى. ماسەلەن, قازاقستان قازىر نەگە سۋ-سۋلى ەنەرگەتيكالىق رەاكتورىن تاڭداپ تۇر؟ ويتكەنى بۇل – الەمدەگى ەڭ قاۋىپسىز اتوم ەلەكتر ستانتسياسى. بىزگە اەس كەرەگى جوق دەۋشىلەر الدىمەن چەرنوبىلداعى, ودان كەيىن فۋكۋسيموداعى اتوم ەلەكتر ستانتسياسىن العا تارتادى. الايدا بۇل اەس-تەر ءبىر كونتۋرلى رەاكتورمەن جۇمىس ىستەدى. ال ءبىزدىڭ تاڭداعانىمىز – سۋ-سۋلى, ياعني, ەكى كونتۋرلى رەاكتور», دەدى سايابەك سافيەۆ.
