نەگىزگى ايتپاعىمىز, بوكسشىلاردىڭ بەلدىگىن سالىستىرۋ ەمەس ەدى. قىسقا مەرزىمدە وسىنداي ەلەۋلى تابىسقا قول جەتكىزگەن ءالىمحان ۇلىنىڭ كەلەسى قادامى قالاي بولماق, ەندىگى جەكپە-جەگىن كىممەن وتكىزگەنى ءتيىمدى, ەكى بەلدىگىن قورعاپ, قالتاسىن قالىڭداتقانى دۇرىس پا الدە تەمىردى قىزعان كەزىندە سوق دەگەندەي, قالعان ەكى بەلبەۋگە ۇمتىلعانى دۇرىس پا؟ بۇگىنگى ماقالامىزدا وسى جانە وزگە دە سۇراقتارعا تانىمال بوكس مامانى جالعاس تۇكەشوۆتىڭ پىكىرىنە جۇگىنە وتىرىپ جاۋاپ ىزدەپ كورمەكپىز.
ۆينچەنتسو گۋالتەريمەن وتكەن جەكپە-جەكتەن كەيىن جانىبەك ءالىمحان ۇلىنىڭ ءوزى بەلبەۋلەرىن قورعاۋعا اسا نيەتتى ەمەس ەكەنىن, بارلىق ءتورت بەلبەۋگە قول جەتكىزبەيىنشە توقتامايتىنىن ايتقان ەدى. «ماعان WBC مەن WBA بەلبەۋلەرى كەرەك. اقپاندا وسى ەكى بەلدىكتى يەلەنىپ وتىرعان ەكى بوكسشىنىڭ بىرىمەن جۇدىرىقتاسقىم كەلەدى. سوندىقتان بەلبەۋلەرىمدى وزىمنەن دەڭگەيى تومەن بوكسشىلارعا قارسى قورعاعىم كەلمەيدى. ماعان باسقا تيتۋلدار قاجەت. كەز كەلگەن چەمپيوندى سۇلاتىپ سالۋعا دايىنمىن», دەپ مالىمدەمە جاساعان ەدى.
ال ەلىمىزدە بىرنەشە بوكس كەشىن ۇيىمداستىرىپ جۇرگەن, كەزىندە ءوزى دە قولىنا قولعاپ كيىپ, شارشى الاڭدا جۇدىرىقتاسقان بوكس مامانى جالعاس تۇكەشوۆ ءدال قازىرگى ۋاقىتتا جانىبەككە بەلدىكتەرىن قورعاعان الدەقايدا تيىمدىرەك دەپ ەسەپتەيدى. ونىڭ ايتۋىنشا, الەم الدىندا بەدەلى بار بوكسشىلار مەن ءوز سالماعىنىڭ چەمپيوندارى وتانداسىمىزبەن از قارجىعا جۇدىرىقتاسقىسى كەلمەيدى. ويتكەنى وتانداسىمىز ءالى دە بوكس نارىعىندا تانىمال ەمەس دەيدى.
«كەشەگى جەكپە-جەكتە جانىبەك ناعىز قازاق بوكس ءستيلىن كورسەتىپ, بارلىق جۇرتتى تاڭعالدىردى دەپ ويلايمىن. سول جەكپە-جەكتە جانىبەك رينگتە كىمنىڭ كورول ەكەنىن كورسەتە ءبىلدى. ويتكەنى كەزدەسۋدە قارسىلاسى تاراپىنان ەشقانداي قارسىلىق بولعان جوق. ءبىز تەك جاقسى بوكستى كوردىك. ءتىپتى جانىبەكتىڭ رەيتينگتىك ايقاستارىنا قاراعاندا, بۇل كەزدەسۋى وتە جەڭىل بولدى دەپ ەسەپتەيمىن. سەبەبى كەز كەلگەن چەمپيوندىق ايقاستا ءبىر بوكسشىنىڭ انىق باسىمدىعى بايقالا بەرمەيدى. ەندى ءالىمحان ۇلىنىڭ كەلەسى ءجۇرىسى قانداي بولۋ كەرەك؟ مەنىڭشە, وعان قازىرگى ۋاقىتتا جەڭىپ العان بەلبەۋلەرىن وزىنەن كەيىن تۇرعان بوكسشىلارعا قارسى قورعاعانى دۇرىس. نەگە؟ ويتكەنى وعان ءالى اقش-تا تانىمالدىعىن ارتتىرا ءتۇسۋ كەرەك. مىسالى, كەشەگى جەڭىسى ارقىلى ول كاسىپقوي بوكس الەمىنە بەلگىلى ءبىر دەڭگەيدە تانىلا ءتۇستى. بىراق ۇلكەن جەكپە-جەكتەرگە شىعۋ ءۇشىن بۇل دا ازدىق ەتەدى. دەگەنمەن وسى ايقاسى ارقىلى ول الەمدەگى ەڭ ۇزدىك بوكسشىلاردىڭ قاتارىندا ەكەنىن كورسەتتى», دەيدى ول.
سونداي-اق ساراپشىنىڭ پىكىرىنشە, جانىبەك اقش اۋديتورياسىنا بەلگىلى ءبىر دەڭگەيدە تانىمال بولعانىمەن, ەندى وعان ەۋروپا بوكس نارىعىن باعىندىرۋ كەرەك. راسىمەن, وتانداسىمىزدىڭ كاسىپقوي بوكستاعى ءجۇرىپ وتكەن جولىنا ۇڭىلەتىن بولساق, ول العاشقى ايقاستارىن ءوز ەلىمىزدە وتكىزگەنىمەن, قالعان كەزدەسۋىندە اقش-تا ايقاسىپ ءجۇر. اعاش ءبىر جەردەن كوگەرەدى دەگەنىمىزبەن, بوكسشى الەمدى ارالاپ ءجۇرىپ جاھانعا تانىلاتىنىن دا ۇمىتپاۋىمىز كەرەك. ماسەلەن, اقش بوكس نارىعىنداعى وتە تانىمال تەرەنس كروۋفورد, ۆاسيلي لوماچەنكو سياقتى بوكسشىلار دا بەكەرگە ۇلىبريتانيادا جۇدىرىقتاسقان جوق. ءتىپتى گولوۆكيننىڭ ءوزى دە كەيىنگى ايقاسىن جاپونيادا وتكىزىپ كەلدى.
«كەز كەلگەن بوكس مامانىنان سۇراساڭىز, ەۋروپا بوكس جانكۇيەرلەرىنىڭ الدىندا جانىبەكتىڭ جارناماسى وتە تومەن دەڭگەيدە ەكەنىن ايتادى. كاسىپقوي بوكس بيزنەس ەكەنىن ەسكەرسەك, سەنىڭ بولاشاعىڭ دا, جەكپە-جەكتەردەن تاباتىن تابىسىڭ دا جارناماڭا بايلانىستى بولادى. بوكس زاڭى – سولاي. جارناماڭ جاقسى بولماسا, تابىسىڭ دا ماردىمسىز بولماق. ەگەر مەن جانىبەكتىڭ پروموۋتەرى نەمەسە مەنەدجەرى بولسام, ونىڭ كەلەسى كەزدەسۋىن ۇلىبريتانيادا ۇيىمداستىراتىن ەدىم. دەگەنمەن ەۋروپاعا جاي جەكپە-جەك وتكىزۋ ءۇشىن ەمەس, سول ايماققا اسا تانىمال بولعان بوكسشىمەن كەزدەسۋ ءۇشىن بارۋ كەرەك. ال ءدال قازىرگى ۋاقىتتا ەۋروپا, ۇلىبريتانيا نارىعىندا قاي بوكسشى تانىمال دەسەڭىز, جانىبەكتىڭ تۇيدەي قۇرداسى, بريتانيالىق پانچەر فەليكس كەشتى ايتار ەدىم. بۇگىنگە دەيىن 16 كەزدەسۋ وتكىزىپ, سونىڭ 10 باسەكەسىندە قارسىلاستارىن كەسكەن تەرەكتەي سۇلاتىپ, نوكاۋتپەن جەڭگەن. ەگەر جانىبەك بريتانياعا بارىپ, ءدال وسى بوكسشىنى ءوز جەرىندە مەرزىمىنەن بۇرىن جەڭەتىن بولسا, ەۋروپادا دا, اقش-تا دا تانىمالدىعى ودان سايىن ارتا تۇسەتىنىنە سەنىمدىمىن. سونداي-اق فەليكس كەشتەن بولەك, ەۋروپا نارىعىنا تانىمال بوكسشىلاردان ليام سميت, كريس يۋبەنك سەكىلدى بىلعارى قولعاپ شەبەرلەرىن دە اتاپ وتۋگە بولادى. ءارى ول بوكسشىلارعا دا جانىبەكپەن ايقاسقان قىزىعىراق دەپ ويلايمىن. قانشا دەگەنمەن ورتا سالماقتاعى ەكى بەلدىكتىڭ يەسى. سوندىقتان جانىبەك ازىرگە چەمپيونداردى شاقىرۋىن قويا تۇرىپ, بوكستىڭ وسىنداي كولەڭكەلى تۇستارىنا دا باسا ءمان بەرۋى كەرەك دەپ ويلايمىن. الەۋمەتتىك جەلىدە «سەنى ءبىر ۇرىپ قۇلاتامىن, مەن تەك چەمپيوندارمەن شىعامىن» دەگەن سياقتى پيار ءجۇرىس جاساۋ وتە ماڭىزدى. الەۋمەتتىك جەلىدە دە «جەكپە-جەكتەر» وتكىزگەن دۇرىس, بىراق ءبارىن ناقتى ىسپەن دالەلدەگەنگە نە جەتسىن», دەيدى ج.تۇكەشوۆ.
سونىمەن قاتار بوكس ساراپشىسى جانىبەك بوكسشى رەتىندە ءوستى جانە ءدال قازىرگى كەزەڭدە كەز كەلگەن اتاقتى بوكسشىمەن جۇدىرىقتاسۋعا دايىن دەپ ەسەپتەيدى. ءتىپتى سول جەكپە-جەكتەردىڭ ايقىن ءفاۆوريتى بولىپ قالۋى دا عاجاپ ەمەس ەكەنىن ايتتى.
«ەگەر ءدال قازىر جانىبەك كۋبالىق اتاقتى بوكسشى ەريسلاندي لارامەن جۇدىرىقتاساتىن بولسا, بۇل ايقاس جەرلەسىمىز ءۇشىن اسا قيىن بولادى دەپ ويلامايمىن. بالكىم, جانىبەك ونى مەرزىمىنەن بۇرىن دا جەڭىپ كەتۋى مۇمكىن. ويتكەنى جۇدىرىقتاسۋ مانەرى جاعىنان لارا مەكسيكالىق «كانەلوعا» قيىندىق تۋدىرۋى مۇمكىن, بىراق جانىبەككە وتە ىڭعايلى بوكسشى. بىراق بۇل بوكسشىلار جاقىن ارالىقتا جانىبەكپەن شىعا قويۋى ەكىتالاي. نەگە دەسەڭىز, ەڭ ءبىرىنشى, جوعارىدا ايتقانىمداي ءالىمحان ۇلى ءالى دە اقش بوكس نارىعىنا تولىق كىرگەن جوق. ول – كەز كەلگەن تانىمال, جەرگىلىكتى بوكسشىعا قارجىلىق جاعىنان وتە ءتيىمسىز قارسىلاس. ونىڭ ۇستىنە ءبارى ونىڭ دەڭگەيىن جاقسى بىلەدى. قازىر ولار جانىبەكتىڭ جەكپە-جەكتەرىن كورىپ, اياقالىسىن باقىلاپ وتىر. جەڭىلىپ قالۋ قاۋپى بار ەكەنىن دە سەزبەيدى ەمەس, سەزەدى», دەيدى ج.تۇكەشوۆ.
بىراق جانىبەكتىڭ پروموۋتەرلىك كومپانياسى بوكس ۇيىمدارىن, سول تۇجىرىمنىڭ چەمپيوندارىن مول قارجىمەن قىزىقتىرا السا, وندا جانىبەكتىڭ مىقتىلارمەن جۇدىرىقتاسۋعا داڭعىل جولى اشىلادى. دەي تۇرعانمەن مىنا ماسەلەنى دە ۇمىتپاعان ءجون. جانىبەكتىڭ جوسپارى مەن پروموۋتەردىڭ جوسپارى ءبىر-بىرىمەن سايكەس كەلمەي قالاتىن كەزدەر دە بولاتىن. سونداي-اق وتانداسىمىز كوزدەپ وتىرعان وزگە ەكى ۇيىمنىڭ جوسپارى دا جانىبەكتىڭ جوسپارىنا تۇسپا-تۇس كەلە مە, جوق پا ول جاعى دا بەلگىسىز. سوندىقتان جانىبەك ەندىگى ايقاسىندا بەلدىگىن قورعاۋى مۇمكىن دەيدى بوكس ساراپشىسى.
