تەننيستەن ايەلدەر اراسىنداعى قورىتىندى تۋرنير 1972 جىلدان بەرى ۇيىمداستىرىلىپ كەلەدى. 2000 جىلعا دەيىن بۇل دودا تەك اقش ايماعىندا وتكىزىلگەن بولسا, كەلەسى جىلدان باستاپ تەننيس ءتۋرنيرى گەوگرافياسىن كەڭەيتىپ, العاش رەت گەرمانيانىڭ ميۋنحەن قالاسىندا جالاۋى جەلبىرەدى. كەيىننەن بۇل جارىستى يسپانيانىڭ مادريد, قاتاردىڭ دوحا, تۇركيانىڭ ىستانبۇل, سينگاپۋردىڭ سينگاپۋر, قىتايدىڭ شەنچجەن جانە مەكسيكانىڭ گۆادالاحارا قالالارى قابىلدادى. مەكسيكا بۇل جارىستى ءوز تاريحىندا ەكىنشى رەت وتكىزۋ مارتەبەسىنە يە بولدى.
وسى ۋاقىت ارالىعىنداعى قورىتىندى تۋرنيردە امەريكالىق داڭقتى تەننيسشى مارتينا ناۆراتيلوۆا ەڭ كوپ جەڭىسكە جەتكەن. وتكەن عاسىردىڭ جەتپىسىنشى جانە سەكسەنىنشى جىلدارىندا ونەر كورسەتكەن ناۆراتيلوۆا 8 تۋرنيردە تەڭدەسسىز دەپ تانىلدى. ودان كەيىنگى ۇزدىك ناتيجە گەرمانيالىق شتەففي گرافف پەن امەريكالىق سەرەنا ۋيليامسقا تيەسىلى. ولار بەس رەتتەن توپ جارسا, اقش-تىڭ تاعى ءبىر وكىلى كريس ەۆەرت ءتورت مارتە جەڭىس تۇعىرىنان كورىنگەن. سونىمەن قاتار مونيكا سەلەش (اقش) پەن كيم كلەيستەرس (بەلگيا) ءۇش رەتتەن, يۆونن فەي گۋلاگونگ-كوۋلي (اۋستراليا), گابريەلا ساباتيني (ارگەنتينا), مارتينا حينگيس (شۆەيتساريا), جيۋستين ەنەن (بەلگيا) ەكى مارتەدەن جەڭىمپاز اتانعان. قالعان 15 تەننيسشىنىڭ تەك ءبىر رەتتەن عانا جەڭىسكە جەتۋ مۇمكىندىگى بولدى.
بىلتىرعى تۋرنيردە توپ جارعان فرانتسيالىق كارولين گارسيا بيىل ۇزدىك 8 تەننيسشىنىڭ قاتارىنا قوسىلا الماي, قورىتىندى تۋرنيردەن تىس قالدى. بيىلعى جارىسقا ارينا سوبولەنكو (بەلارۋس), يگا شۆەنتەك (پولشا), كوكو گاۋفف (اقش), ەلەنا رىباكينا (قازاقستان), دجەسسيكا پەگۋلا (اقش), ماركەتا ۆوندروۋشوۆا (چەحيا), ونس جابەر (تۋنيس) جانە كارولينا مۋحوۆا (چەحيا) سەكىلدى سپورتشىلار قاتىسادى.
ەلەنا رىباكينا بيىلعى ايەلدەر تەننيسى تۋرنيرلەرىندە تاماشا ناتيجە كورسەتىپ, قورىتىندى تۋرنيرگە العاش رەت شاقىرتۋ الدى. وتانداسىمىز بيىلعى ماۋسىمدا جىلدىڭ ەڭ العاشقى ءىرى جارىسى – اۋستراليا اشىق بىرىنشىلىگىنىڭ فينالىنا دەيىن جەتىپ, WTA تۋرنيرلەرىندە بەس مارتە باس جۇلدەنى جەڭىپ الدى. سونىڭ ىشىندە اقش-تىڭ ينديان-ۋەلس قالاسى مەن يتاليانىڭ باس شاھارى – ريمدە جالاۋى جەلبىرەگەن «WTA 1000» ساناتىنداعى ەكى بىردەي ماڭىزدى تۋرنيردە توپ جاردى. سونىمەن قاتار ITF دودالارىندا ءتورت رەت دارالاندى. ءبىر عاجابى, بيىلعى ماۋسىمدا رىباكينا الەمنىڭ 1-راكەتكاسى پولشالىق يگا شۆەنتەكتىڭ ءوزىن ءۇش مارتە قاپى قالدىردى.
جالپى, رىباكينا كانكۋندەگى دوداعا جولداما العان جەتى تەننيسشىمەن بارلىعى 23 كەزدەسۋ وتكىزگەن ەكەن. سونىڭ 10 باسەكەسىندە جەرلەسىمىزدىڭ مەرەيى ۇستەم بولسا, قالعان 13 ماتچتا جەڭىلىس تاپقان. اتاپ ايتقاندا, وتانداسىمىز چەحيالىق م.ۆوندروۋشەۆا جانە ك.مۋحوۆامەن ەكى رەتتەن كەزدەسىپ, قارسىلاستار ءبىر-ءبىر ويىندا جەڭىسكە جەتكەن. ا.سوبولەنكومەن وتكەن التى كەزدەسۋدە – 2:4, و.جابەرمەن بولعان بەس ويىندا – 2:3 جانە ج.پەگۋلامەن وتكەن ءۇش ويىندا 1:2 ەسەبىمەن ەسە جىبەرگەن. سونداي-اق ك.گاۋففپەن بۇگىنگە دەيىن ءبىر ويىندا شەبەرلىك بايقاسىپ, قارسىلاسىنا جول بەرگەن.
جارىستىڭ ەرەجەسى بويىنشا الەمنىڭ ەڭ ۇزدىك 8 تەننيسشىسى ءتورت قاتىسۋشىدان ەكى توپقا ءبولىنىپ, الدىمەن ءبىر-بىرىمەن اينالمالى جۇيە بويىنشا ويناپ شىعادى. ءسويتىپ, توپتىق كەزەڭدە ەڭ ۇزدىك ناتيجە كورسەتكەن ەكى تەننيسشى جارتىلاي فيناعا جولداما الادى. ا توبىندا ءبىرىنشى ورىن العانى ۆ توبىنىڭ ەكىنشى ورىن يەگەرىمەن, ۆ توبىنىڭ جەڭىمپازى ا توبىندا ەكىنشى ورىنعا تۇراقتاعان تەننيسشىمەن وينايدى. ءارى قاراي جارتىلاي فينال جانە فينال باسەكەلەرى وتەدى.
سونداي-اق تەننيسشىلەر بۇل تۋرنيردەگى ءار ويىنى ءۇشىن رەيتينگتىك ۇپايلارعا دا يە بولادى. ماسەلەن, توپتىق كەزەڭدەگى ءاربىر جەڭىسى ءۇشىن 250 ۇپاي السا, جەڭىلگەن سپورتشى سونىڭ تەڭ جارتىسىنا يە بولادى (125 ۇپاي). جارتىلاي فينالدا جەڭىسكە جەتكەندەر 330 ۇپاي, ال چەمپيون تەننيسشى 750 ۇپاي يەلەنەدى. بۇدان بولەك جەڭىمپاز 1,24 ملن دوللار (800,32 ملن تەڭگە) سىياقى الادى. ەگەر تەننيسشى وسى تۋرنيردەگى بارلىق ويىندا قارسىلاستارىنان باسىم ءتۇسىپ, جەڭىسكە جەتكەن بولسا, وندا سىياقى مەن رەيتينگتىك ۇپايىن ەكى ەسەلەپ الا الادى.
جۇلدە قورى 5 ملن دوللاردى (2,38 ملرد تەڭگە) قۇرايتىن WTA كۇنتىزبەسىندەگى بيىلعى ماۋسىمنىڭ سوڭعى جارىسى 29 قازان مەن 5 قاراشا ارالىعىندا مەكسيكانىڭ كانكۋن قالاسىنداعى جابىق كورتتاردا وتەدى.
