جينالعان جۇرت ارقا-جارقا. ءبىر-ءبىرىن ەتەنە تانىپ-بىلمەسە دە, قۋانىش ورتاق بولعان سوڭ كوپتەن كۇتكەن شىن مانىندەگى شاتتىققا قۇتتى بولسىن ايتىسىپ جاتىر. «ساباقتى ينە ساتىمەن» دەگەندەي, ءمانى مول مەرەكەمەن ورايلاسقان قۋانىشقا جينالعان اق جاۋلىقتى اجەلەر اقجارىلقاپ ساتتە شاشۋ شاشىپ, كوپ كوڭىلىن دەمەدى. سالتاناتتى راسىمگە پاتەرگە يە بولعاندارمەن بىرگە تىلەكتەس, نيەتتەس ەتجاقىن تۋىس تا جينالعان. دەمەك, باقىتتى ءساتتى باسىنان كەشىرىپ جاتقاندار 65 ادام عانا ەمەس, ءدۇيىم كوپشىلىك دەۋگە دە بولادى.
13 پاتەردى جەتىم بالالار مەن اتا-انالارىنىڭ قامقورلىعىنسىز قالعاندار يەلەنسە, 15 پاتەر كوپبالالى وتباسىلارعا بەرىلىپ وتىر. حالىقتىڭ الەۋمەتتىك جاعىنان از قامتىلعان توبىنا 24 پاتەر بۇيىرسا, 13 پاتەردى مەملەكەتتىك قىزمەتشىلەر مەن بيۋدجەتتىك ۇيىمداردىڭ وكىلدەرى جانە اسكەري قىزمەتشىلەر الدى. جاڭا پاتەرلەردىڭ كىلتىن كوكشەتاۋ قالاسىنىڭ اكىمى باۋىرجان عايسا سالتاناتتى تۇردە تابىس ەتتى.
–بارشاڭىزدى رەسپۋبليكا كۇنى مەرەكەسىمەن قۇتتىقتايمىن! بۇگىن 65 ادام جاڭا پاتەرگە يە بولىپ وتىرسا, كوكتەمدە جۇزدەن استام وتباسىنا وسىنداي قۋانىش سىيلاعان بولاتىنبىز, –دەدى قالا اكىمى.
كوپپاتەرلى ۇيلەردىڭ سىرتقى سالتاناتى مەن ىشكى ارلەندىرىلۋى كوزدىڭ جاۋىن الادى. ءسوز اراسىندا وبلىس ورتالىعىندا توعىز مىڭنان استام ادام باسپانا كەزەگىندە تۇرعاندىعىن ايتا كەتەلىك. ۇستىمىزدەگى جىلى التى تۇرعىن ءۇي سالىندى, ونىڭ ەكەۋى, مىنە, رەسپۋبليكا كۇنى مەرەكەسى قارساڭىندا تابىس ەتىلىپ وتىر. جىل سوڭىنا دەيىن قالعان تۇرعىن ۇيلەر پايدالانۋعا بەرىلىپ, حالىقتى قۋانىشقا كەنەلتپەك.
– مەن ءتورت بالانىڭ اناسىمىن, – دەيدى جاڭا پاتەرگە يە بولعانداردىڭ ءبىرى ناتاليا پاناسيۋرا. – وسى قۋانىشتى 17 جىل بويى سارىلا توسىپ ەدىم, مىنە, قولىم ەندى جەتىپ وتىر. بالالارىم دا قۋانىپ جاتىر. ادامنىڭ ءوز باسپاناسى بولعانعا نە جەتسىن. بىزگە وسىنداي قامقورلىق جاساپ وتىرعان مەملەكەتىمىزگە مىڭ دا ءبىر العىس!
پاتەرگە يە بولعانداردىڭ ىشىندە 92 جاستاعى كۇمىس القا يەگەرى, تىل ەڭبەككەرى شولپان نۇعىمانوۆا دا بار. اجەيدىڭ قىزدارى قارت انانىڭ قۋانىشىنا ورتاقتاسىپ, قونىس تويىنا قۇتتى بولسىن ايتا كەلىپتى. عاسىرعا جۋىق عۇمىر كەشكەن اجەي وسىنداي قامقورلىق جاساعان جاندارعا اجەلىك, انالىق باتاسىن بەرىپ, اق العىسىن جولدادى.
پاتەر كىلتى قولىنا تيگەن كوپشىلىك وزدەرىنىڭ ىستىق ۇيالارىنا اينالاتىن باقىت بوساعاسىنا اسىعا باسىپ تاراپ جاتتى.
كوكشەتاۋ
