ءبىلىم سالاسىنداعى رەفورما, اسىرەسە كارانتين كەزىندە قاتتى بايقالدى. ونلاين وقۋ بۇرىن مۇمكىن ەمەستەي كورىنگەنىمەن, ءبىر-اق ساتتە مەكتەپ تە, ۋنيۆەرسيتەت تە قاشىقتان وقىتۋ جۇيەسىنە كوشتى. ونلاين جۇيەنىڭ الەۋەتى ءارتۇرلى جاڭالىق الىپ كەلدى دەۋگە بولادى. ال كەيىنگى ChatGPT-ءدىڭ پايدا بولۋى ءبىلىم سالاسىنىڭ جىلدام وزگەرىستەرگە دايىن بولۋى كەرەگىن ايقىنداي ءتۇستى. عىلىم جانە جوعارى ءبىلىم ءمينيسترى ساياسات نۇربەكتىڭ ايتۋىنشا, ەندىگى جەردە كەز كەلگەن سالادا جاساندى ينتەللەكتىمەن جۇمىس ىستەۋدى مەڭگەرگەن مامان سۇرانىستا بولماق.
– نەيروجەلى قازىردىڭ وزىندە وقۋ ۇدەرىسىنە ارالاسىپ كەتتى. ونىڭ دامۋى دا جىلدام. قازىر بىزگە تسيفرلىق ساۋاتتى بولۋ جەتكىلىكسىز. جاساندى ينتەللەكت ساۋاتى دەگەن ۇعىم دا جاقسى تانىس بولۋى قاجەت. ياعني ءبىز ونى ءبىلىم سالاسىندا وقىتۋىمىز كەرەك. ءيا, بۇل الگوريتمنىڭ كەرى اسەرى تۋرالى دا كوپ ايتىلادى. دەگەنمەن ءبىز ونىڭ دامۋىن تەجەي المايمىز. سوندىقتان ساۋاتتى تۇردە مەڭگەرۋىمىز قاجەت. كەز كەلگەن سالادا ChatGPT-مەن جۇمىس ىستەۋدى مەڭگەرگەن ماماننىڭ ءباسى جوعارى تۇرادى, – دەدى مينيستر جۋىردا وتكەن Digital Bridge 2023 فورۋمىندا.
جاساندى ينتەللەكتىنىڭ مۇمكىندىكتەرىن ەسكەرەتىن بولساق, ونىڭ قىزمەتى جۇمىسىمىزدى الدەقايدا جەڭىلدەتىنى راس. ونى ساۋاتتى مەڭگەرگەن قىزمەتكەر پايدالى كومەكشى رەتىندە جۇمىس ىستەتە الادى. SmarTestPrep مەكتەبىنىڭ ديرەكتورى لاۋرا ۆايگوروۆا ءبىلىم بەرۋ باعدارلاماسىن, تەست سۇراقتارىن قۇراستىرۋمەن نەيروجەلى اينالىساتىنىن ايتتى.
– الگوريتمنىڭ ءتىلىن بىلسە, ءبارىن ىستەتۋگە بولادى. ونى ساۋاتتى مەڭگەرۋ دەگەن وعان دۇرىس پارمەن بەرە الۋ دەگەن ءسوز. ءبىزدىڭ قىزمەتكەرلەر ChatGPT-مەن جۇيەلى جۇمىس ىستەي الادى. ءبىز ونىڭ بارىنشا پايدالى جاعىن قاراستىرامىز. ارينە ونىڭ ادامدى الماستىرۋ قاۋپىن جوققا شىعارا المايمىز. دەگەنمەن مەنىڭ ويىمشا, بۇعان ءالى ءبىراز ۋاقىت كەرەك. ال ءدال قازىرگى نارىقتا نەيروجەلىنى ساۋاتتى باسقارا الاتىن مامان قاجەت, – دەيدى ل.ۆايگوروۆا.
يننوۆاتسيانىڭ دامۋى ءداستۇرلى 4 جىلدىق وقۋ فورماتىن دا وزگەرتىپ جاتىر. جاڭا ماماندىقتار پايدا بولدى. ولاردى يگەرۋ دە جاڭا باعىتتا قالىپتاسىپ كەلەدى. ەلىمىزدەگى العاشقى جىلدام كاسىپتەر ۋنيۆەرسيتەتىنىڭ نەگىزىن قالاۋشى ديانا كامالاديننىڭ ايتۋىنشا, ءبىلىم بەرۋ سالاسىندا وقىتۋشىنىڭ ورنىن چات-بوتتار الماستىرا الادى.
– باتىستا ماشينالاردىڭ جاڭا مودەلى جىل سايىن شىعاتىن بولسا, قىتاي نارىعىندا التى اي سايىن وزگەرىپ جاتىر. بۇرىن ءبىر جاققا باراتىن بولساڭ تاكسي ۇستاۋ, تاكسي تابۋ قيىن ەدى. ال قازىر «ياندەكس» بار. ءتىپتى كولىكتى 10 مينۋت كۇتىپ قالساڭىز, «نەگە تەز كەلمەدى» دەپ شاعىمداناسىز. مىسالى, فاست-فۋدتار ءبىزدىڭ جىلدام تاماقتانۋىمىزعا ىڭعايلى. ارەكەتتەرىمىز كۇن وتكەن سايىن جىلدامدىققا نەگىزدەلىپ بارادى. ءبىلىم بەرۋ نارىعىنا دا وسىنداي قارقىندى وزگەرىستەرگە ىلەسە الاتىنداي جۇيە قاجەت. ماسەلەن, TikTok جەلىسىندە حيميا ءپانىن ۇيرەتەتىن مۇعالىم بار. ونىڭ بەينە ساباقتارى ميلليونداعان قارالىم جيناپ جاتىر. مۇنىڭ بارلىعى ءبىلىم جۇيەسىنىڭ وزگەرىپ جاتقانىن اڭعارتادى. بالالارىمىز, ياعني جاڭا بۋىن ستاندارتتى بىلىممەن شەكتەلە المايدى. سوندىقتان دا ءبىز وسى سالانى جەتىلدىرىپ, جىلدام ءبىلىم بەرە الاتىن پلاتفورمالاردى قالىپتاستىرۋىمىز قاجەت. قازىر ادامدار وزىنە قاجەتتى ءبىلىمدى الۋ ءۇشىن قىسقامەرزىمدى كۋرستاردى ساتىپ الادى. مىنە, وسىلاي جىلدام يگەرەتىن ماماندىقتار شىعىپ جاتىر. بۇل – زامان تالابى. ويتكەنى اقپاراتتار ءاپ-ساتتە ەسكىرىپ قالادى. سوندىقتان قوعامداعى وزگەرىستەرگە ىلەسە ءبىلۋىمىز قاجەت. سونداي-اق وقىتۋشىنىڭ ورنىن باسا الاتىن چات-بوتتار پايدا بولدى. بۇرىن وقىتۋشى دەگەن بىزگە باعا قويىپ, ءۇي تاپسىرماسىن تەكسەرەتىن ادام بولسا, قازىر وقىتۋشى ول رەجيسسەر ءتارىزدى. سىزگە تەك مىناداي كىتاپتى وقى, مىناداي پودكاست تىڭدا, مىناداي ۆەبينارلارعا, شەبەرلىك سىنىپتارىنا بار دەپ ايتادى, – دەيدى ديانا كامالادين.
جىلدام كاسىپتەر ۋنيۆەرسيتەتى جىلدام مەڭگەرۋگە بولاتىن ماماندىقتاردى وقىتادى. 6 اي عانا ءبىلىم بەرەدى. سودان كەيىن ءبىلىم الۋشىلاردىڭ IT, ماركەتينگ سالاسىندا جۇمىس ىستەۋىن قامتاماسىز ەتەدى. كورىپ وتىرعانىمىزداي قازىر YouTube, TikTok باسقا دا الەۋمەتتىك جەلىلەر ءبىلىم بەرۋ پلاتفورمالارىنا ەركىن ەنىپ كەتتى. مۇنىڭ بارلىعى تسيفرلاندىرۋدىڭ, جاساندى ينتەللەكتىنىڭ جەمىسى.
