وبلىستىق توتەنشە جاعداي دەپارتامەنتىنە قاراستى №21 ءورت ءسوندىرۋ بەكەتىنىڭ بولىمشە كومانديرى ايدوس بورانباەۆتىڭ بويىندا ناعىز كاسىبي قۇتقارۋشىعا ءتان سان تاراۋ داعدى-بىلىكتىڭ ءبارى بىتە قايناسىپ جاتىر. قۇرىشتاي شىمىر دەنەلى, ورتا بويلى, ويلى كوزدى, كوپ سوزگە جوق اعا سەرجانت وتكەن جىلى اۋليەكول اۋدانىندا بولعان الاپات ءورت كەزىندە كورسەتكەن جانقيارلىعى ءۇشىن پرەزيدەنت جارلىعىمەن «ەرلىگى ءۇشىن» مەدالىمەن ماراپاتتالعان. ايدوس قۇتقارۋشىلار ساپىندا ورماندا ءورت تۇتانعان كۇننەن باستاپ سوڭعى شوق سونگەنشە ارپالىستى.
– جىلدامدىعى سەكۋندىنا 20 مەترگە دەيىن جەتەتىن كۇشتى جەلدىڭ سالدارىنان ءتىلسىز جاۋ تەز ءورشىپ, بۇكىل ورمان قىزىل جالىنعا وراندى. ەلدى مەكەندەرگە قاۋىپ تونە باستادى. ءبىزدىڭ جاساق, ەڭ الدىمەن, قاۋىپتى ايماقتاعى ادامداردى ەۆاكۋاتسيالادى. ءتىلسىز جاۋدىڭ ەلدى مەكەندەردەگى تۇرعىن ۇيلەرگە ءوتىپ كەتۋىنە جول بەرمەۋ ءۇشىن جانتالاستىق. امانقاراعايداعى مۇناي بازاسىنىڭ اۋماعىنا سۋ شاشىپ, زاردابى اۋىر جارىلىستى بولدىرمادىق. مۇناي بازاسىنداعى الىپ تسيستەرنالار جارىلسا, ونىڭ ارتى ورنى تولماس قايعى-قاسىرەتكە, ۇلكەن اپاتقا اكەپ سوعاتىن ەدى. جارىلىس تولقىنى امانقاراعايدان اسىپ, ءبىر شەتى نوۆونەجيندى, ەكىنشى شەتى اۋليەكولدى شارپۋى مۇمكىن. بۇل ەكى ورتادا قانشاما ءۇي, قانشاما ادام, قانشا مال, قانشا م ۇلىك بار. ونى ويلاۋدىڭ ءوزى قورقىنىشتى. جانتالاسىپ ءجۇرىپ ءتونىپ تۇرعان وراسان قاۋىپتىڭ بەتىن قايتاردىق. بولىمشە قۇرامىنداعى جىگىتتەر كەزەك-كەزەك 1-2 ساعاتتاي ۇيىقتاپ الىپ, التى كۇن بويى ارپالىستىق, – دەيدى اعا سەرجانت.
جالپى اۋماعى 43 مىڭ گەكتاردى شارپىعان ءتىلسىز جاۋ بەسىنشى كۇن دەگەندە ءبىرجولا تىزگىندەلگەن. الايدا ا.بورانباەۆتىڭ بولىمشەسى قوستاناي, اقمولا وبلىستارىنىڭ كۇش-قۇرالدارى ساپىندا ورماننىڭ ءار جەرىندە شالا جانعان قولامتا شوقتى ءسوندىرۋ, ءورتتىڭ سالدارىن جويۋ جۇمىستارىن اتقاردى. امانقاراعاي, لەسنوە, وزەرنوە جانە باعانالى اۋىلدارىنىڭ اۋماقتارىندا ورتكە قارسى قاراۋىل قىزمەتىندە تۇردى.
ءبۇتىن ەلدى الاڭداتىپ, كوپتىڭ قابىرعاسىن قايىستىرعان الاپات ءورتتى سوندىرۋگە تجم, ءىىم ۇۇ-نىڭ, قوستاناي قالاسىنداعى ءىىم اكادەمياسىنىڭ, قورعانىس مينيسترلىگىنىڭ, جاو جانە وبلىستىڭ كوممۋنالدىق قىزمەتتەرىنىڭ كۇش-قۇرالدارى – بارلىعى 207 تەحنيكا, 5 ءورت ءسوندىرۋ پويىزى, 1 785 ادام قاتىسقان.
امانقاراعاي ءورت ءسوندىرۋ بەكەتىنىڭ باسشىسى ابزال ءجۇمادىلوۆتىڭ ايتۋىنشا, بولىمشە كومانديرى ا.بورانباەۆ – كوپشىل, كىشىپەيىل ءارى وزىنە جۇكتەلگەن كەز كەلگەن مىندەتتى اسا جوعارى جاۋاپكەرشىلىكپەن اتقاراتىن ناعىز كاسىبي قۇتقارۋشى. ابزال تەك امانقاراعايداعى الاپات ورتتە عانا ەمەس, وعان دەيىنگى, ودان كەيىنگى تالاي-تالاي توسىن اپات, قيىن-قىستاۋدا ءوزىن شۇعىل شەشىم قابىلداي الاتىن, قاۋىپتىڭ الدىن كورىپ, باعىتىن بولجاي بىلەتىن كوماندير رەتىندە كورسەتە ءبىلدى. قازىر بولىمشەسىندە ءوزىن قوسقاندا بەس قۇتقارۋشى بار. تاياۋدا عانا سۋ جاڭا ءورت ءسوندىرۋ كولىگىن الدى. بەسەۋى بەس ساۋساقتاي جۇمىلىپ, تالاي ادامدى اجال اۋزىنان اراشالاپ قالىپ ءجۇر.
– ايدوستىڭ جانىنداعى جىگىتتەر دە وسال ەمەس. مىسالى, بىلتىر اۋليەكول ماڭىندا اۋىر جول اپاتى بولىپ, ا.بورانباەۆتىڭ بولىمشەسى جەڭىل كولىكتىڭ ىشىندە قانسىراپ جاتقان ادامدى الىپ شىعىپ, امان الىپ قالدى. ول كىسىنىڭ جۇرەگى توقتاپ قالعان ەكەن. ءبىزدىڭ جىگىتتەر وكپەگە جاساندى دەم جىبەرۋ ارقىلى قايتا ءتىرىلتىپ الدى. كەيىن دارىگەرلەر ءبىزدىڭ ءورت ءسوندىرۋ بەكەتىنە ريزاشىلىق ءبىلدىرىپ, ەگەر سىزدەر دۇرىس العاشقى مەديتسينالىق كومەك كورسەتە الماعان جاعدايدا ەس-ءتۇسسىز جاتقان ادامنىڭ ءتىرى قالۋ-قالماۋى ەكىتالاي بولار ەدى دەگەن اڭگىمە ايتتى, – دەيدى ا.ءجۇمادىلوۆ.
بىلتىر امانقاراعاي اۋىلىندا قالىڭ قامىس جانىپ, ماڭايداعى تۇرعىن ءۇي, قورا-جايلارعا قاۋىپ تونگەندە دە ءورت شىققان جەرگە ايدوستىڭ بولىمشەسى ءبىرىنشى بولىپ جەتتى. ءتىلسىز جاۋدىڭ تەگەۋرىنىن ءدال بولجاعان قۇتقارۋشى دەر كەزىندە قوسىمشا كۇش شاقىرىپ, ءوزى ءورت سوندىرۋگە كىرىسىپ كەتتى. ناتيجەسىندە, قىسقا ۋاقىت ىشىندە ءتىلسىز جاۋ اۋىزدىقتالىپ, ءورت سوندىرۋشىلەر ەلدىڭ العىسىنا بولەنگەن.
– مۇنداي وقيعالاردى ايتا بەرسەك تاۋسىلمايدى. بۇل ەندى ءبىزدىڭ كۇندەلىكتى جۇمىسىمىز, اتقاراتىن مىندەتىمىز عوي. ءوز باسىم ەرلىك جاسادىم دەپ ەمەس, قىزمەتتىك مىندەتىمدى اتقاردىم دەپ ويلايمىن, – دەيدى بەساسپاپ قۇتقارۋشى.
قوستاناي وبلىسى
