بالالار اقىنى نۇرلان قالقانىڭ بۇل كىتابى – ىزدەنىس پەن ەڭبەكتىڭ ناتيجەسى. بالالارشا ويلاۋ, ولاردىڭ رۋحاني سۇرانىسىن قاناعاتتاندىرۋ ءۇشىن, قازاق سوزىنە قىزىقتىرۋ ءۇشىن ءتۇرلى جانرلاردى قامتىپتى. «اتامۇرا» باسپاسىنان بيىل عانا شىققان «جىل – ون ەكى اي» جيناعىنا مەكتەپكە دەيىنگى تاربيە جاسىنداعى بالدىرعاندارعا نەمەسە باستاۋىش سىنىپ وقۋشىلارىنا ارنالعان ولەڭدەر, ساناماقتار, جۇمباق, جاڭىلتپاش, مىسالدار توپتاستىرىلعان. سونىمەن قاتار ءبىر شوعىر تولعاۋلار مەن باللادالار جوعارى سىنىپ وقۋشىلارىنا ارنالىپتى. تۋعان جەردى ءسۇيۋ, كوپشىل بولۋ, ۇلكەنگە قۇرمەت, كىشىگە ىزەت كورسەتۋ, جاماندىقتان جيرەنىپ, جاقسىلىقتان ۇيرەنۋگە ۇندەيتىن تاقپاقتاردىڭ ءتىلى جەڭىل, ۇعىنىقتى.
ء«وز قىلىعىڭ ءتاتتى عوي,
كامپيت قۇرتار ءتىسىڭدى.
تەرەڭ تانىم, ءساتتى وي,
العا اپارار ءىسىڭدى», –
دەيدى اقىن.
مۇندا ءار ارىپكە ءبىر شۋماق تاقپاقتان جازىپ, ءالىپبيدى تۇگەندەپ شىعىپتى. ساناماق بىردەن ونعا دەيىن, ءار سانعا – ءبىر شۋماقتان. ءبىرىنشى ءبولىمى اتى ايتىپ تۇر: «بالاباقشا – تانىم شامشىراعى», ەكىنشى ءبولىم – «مەكتەپ – ءبىلىم شاڭىراعى» اتالادى. «جىل – ون ەكى اي», «جىل مەزگىلدەرى» ءوز الدىنا بولەك. «مەملەكەتتىك مەرەكەلەر» دە ۇمىت قالماپتى. ءۇشىنشى ءبولىم – «تانىم. تاعىلىم. تاعزىم», جوعارى سىنىپ وقۋشىلارىنا لايىقتالعان ولەڭدەر.
