قازاق فۋتبولىنىڭ تاريحىنا كوز جۇگىرتسەڭىز, جەرلەستەرىمىزدىڭ بۇعان دەيىن ەشقاشان ەۋروپا بىرىنشىلىگىنە ءدال مۇنشالىقتى جاقىن بولماعانىن, بۇعان دەيىنگى بىردە-ءبىر ىرىكتەۋ سايىستارىندا ۇپاي سانىن 10-نان ارىگە اسىرا الماعانىن, وسى كۇنگە دەيىنگى ىرىكتەۋ ويىندارىندا سۋومي ەلىنىڭ سايىپقىراندارىمەن جاسىل الاڭدا سان مارتە جولىقسا دا, ەشقاشان جەڭە الماي كەلە جاتقانى سياقتى وكىنىشتى جايتتارعا قانىق بولاسىز. ەندى بۇل – تاريح. كەشەگى كۇننەن باستاپ قازاق فۋتبولىندا تاريحتىڭ جاڭا پاراعى اشىلدى. فينلياندياعا ساپار شەككەن فۋتبولشىلارىمىز تاماشا كامبەك جاساپ, فۋتبول جانكۇيەرلەرىن ءبىر سەرپىلتىپ تاستادى. وسى ءبىر عاجاپ جەڭىستەن كەيىن بەرلينگە بارار جولدا نەبارى ەكى-اق قادام قالدى. سونداي-اق تاريحتا ءبىرىنشى رەت ۇپاي سانى 15-تەن اسىپ, تۋرنير كەستەسىندە كوشباسشىلارمەن يىق تىرەستىرىپ كەلەدى. ەڭ باستىسى, قازاق فۋتبولشىلارىنا الىنبايتىن قامال, جەڭىلمەيتىن قۇراما بولعان فينليانديا اقىرى تىزە بۇكتى. جانە فيندەردى جاي عانا جەڭىپ قويماي, ءوز الاڭىندا, كەرەك دەسەڭىز سان مىڭداعان جانكۇيەرىنىڭ كوز الدىندا جەر قاراتىپ جەڭدىك.
وسى ماتچتان بىرەر كۇن بۇرىنعى دانيامەن وتكەن ويىندا جەرلەستەرىمىز جەڭىلسە دە جىگەرلى ويىنىمەن جانكۇيەرلەردى ۇياتقا قالدىرعان جوق. الاڭ قوجايىندارى قانشا جەردەن ازۋلى بولسا دا, ءبىزدىڭ جىگىتتەر دات فۋتبولشىلارىنا قاسقايىپ قارسى تۇرا الدى. الاڭنىڭ ءاربىر شەبىندە ولاردان ءبىر مىسقال دا كەم ويناعان جوق. وسى كەزدەسۋدى تەلەديدار ارقىلى تاماشالاعان ەلىمىزدەگى فۋتبول جانكۇيەرلەرى دە, اياقدوپ ماماندارى دا فينليانديامەن ناعىز تارتىستى ويىن بولاتىنىن ىشتەي سەزىپ, سول ويىندا ءبىر عاجايىپتىڭ بولارىنا سەنىم بىلدىرگەن-ءدى.
ال حەلسينكيدەگى ماتچ قازاقستان ءۇشىن دە, فينليانديا ءۇشىن دە تاعدىرشەشتى ماڭىزدى ويىننىڭ ءبىرى ەدى. ويتكەنى جەڭىسكە جەتكەنى ەۋروعا شىعۋ مۇمكىندىگىن ساقتاپ قالسا, جەڭىلگەنىنە ەۋروعا شىعۋ ارمانىن تاعى دا ءتورت جىلعا كەيىنگە شەگەرە تۇرۋىنا تۋرا كەلەدى. بىراق قازاقستان قۇراماسى جەڭىلىپ قالسا دا پالەندەي ەشتەڭە جوعالتا قويماس ەدى, ويتكەنى ءبىزدىڭ ۇلتتار ليگاسىنىڭ پلەي-وفف كەزەڭى ارقىلى دا بەرلينگە باراتىن مۇمكىندىگىمىز ساقتالىپ تۇر. فيندەردە مۇنداي مۇمكىندىك جوق.
سول سەبەپتى دە الاڭ قوجايىندارى ءبىرىنشى تايمدا نە بەل, نە بەلبەۋ كەتەدى دەگەن ويمەن العاشقى مينۋتتان العا قاراي تۇرا ۇمتىلدى. ماقساتى تەزىرەك گول سوعىپ, ءارى قاراي ويىندى ءوز باقىلاۋلارىندا ۇستاۋ بولاتىن. ايتكەنمەن ءبىزدىڭ قورعانىسقا جاۋاپتى جىگىتتەرىمىز اسا ساۋاتتى ونەر كورسەتىپ, قاقپامىزعا گول سوعۋعا ەش مۇمكىندىك بەرگەن جوق. شابۋىلدان تۇك شىعارا الماعان الاڭ قوجايىندارى گول سوعۋدىڭ سىرىن ستاندارتتى جاعدايدان ىزدەي باستادى. الدىمەن ولار ءۇش مينۋتتا ءۇش مارتە بۇرىشتاما دوبىن تەۋىپ كورىپ ەدى, ونىسىنان دا ناتيجە شىعارا المادى. كەيىننەن 27-مينۋتتا الەكساندر ماروچكين ايىپ الاڭىنا جاقىن ماڭايدا قارسىلاستىڭ ويىنشىسىن ەرەجە بۇزۋ ارقىلى توقتاتتى. ءسويتىپ, فيندەر تاعى ءبىر ستاندارتتى جاعدايعا يە بولدى. شامامەن 20-25 مەتر جەردەن روبەرت تەيلوردىڭ قاقپاعا قاراي تەپكەن جويقىن سوققىسىن اۋەلدە يگور شاتسكي قايتارعانداي بولىپ ەدى, بىراق شاتسكيدىڭ قولىنا ءتيىپ وتكەن دوپ ءبارىبىر قاقپا تورىنان تابىلدى – 1:0. وسى گولدان كەيىن فينليانديالىقتار قورعانىسقا كوبىرەك كوڭىل بولە باستادى.
ماتچتى تولىق تاماشالاعان جانكۇيەرلەر ءسوزىمىزدى قۋاتتايتىن شىعار, ويىننىڭ ەكىنشى بولىگى بىزگە قازاقستان مەن دانيا اراسىنداعى ءبىرىنشى ويىندى ەسكە ءتۇسىردى. سول كەزدەسۋدەگىدەي بۇل ماتچتا دا ويىن تاعدىرىن ءبىر پەنالتي تۇبەگەيلى وزگەرتىپ جىبەردى. جانە بۇل 11 مەترلىك ايبىن دوبىن تاعى دا باقتيار زاينۋتدينوۆ ءساتتى ورىندادى. دانيامەن بولعان ويىندا دا باقتيار گول سوققاننان كەيىن تاعىبەرگەن مەن ايىمبەتوۆ مەرگەندىك تانىتسا, بۇل جولى بار جۇكتى زاينۋتدينوۆ ءوز موينىنا الىپ, فينليانديا قاقپاسىنا ءبىر ەمەس, ەكى گول سوقتى. ەكى گولدىڭ اراسى – بار بولعانى 13-اق مينۋت.
وسىلايشا, قازاقستان قۇراماسىنىڭ فۋتبولشىلارى سۋومي ەلىندە وتكەن ويىندا تاريحي جەڭىسكە قول جەتكىزىپ, تاعى ءبىر تاريحي ءساتتى جاڭارتۋعا ماڭىزدى قادام جاسادى. ەندى ءبىزدىڭ جىگىتتەر ءوز الاڭىمىزدا سان-مارينومەن (17 قاراشا), سىرت الاڭداعى سلوۆەنيا (21 قاراشا) قۇراماسىمەن وتەتىن ەكى ويىندا دا جەڭىسكە جەتسە, ەل فۋتبولشىلارى بەرليندەگى الا دوپ الامانىندا العاش رەت دوپ تەبەدى.
PS: وسى ويىندا ەكى مارتە دالدىك تانىتىپ, مەرگەندىگىمەن كوزگە تۇسكەن باقتيار زاينۋتدينوۆ ءوزىنىڭ ۇلتتىق قۇراما جەيدەسىندەگى 14-گولىن سوعىپ, سۇرمەرگەندەر كوشىندە جەكە-دارا كوش باستادى. بۇعان دەيىنگى ۇزدىك كورسەتكىش ەلىمىزدىڭ داڭقتى فۋتبولشىسى, قازىرگى تاڭدا ۇلتتىق قۇراما باس باپكەرىنىڭ كومەكشىسى بولىپ جۇرگەن رۋسلان بالتيەۆكە تيەسىلى ەدى. ول ءوز مانسابىندا 13 مارتە دارالانعان. سونداي-اق كەشەگى ماتچتان كەيىن ۇلتتىق قۇراما ويىنشىلارىنىڭ بارلىق تۋرنيردە سوققان گول سانى 251-گە جەتتى.
