بۇل ءىس-شارا ءۇشىن «KEGOC» اق-عا قاراستى «الماتى جەت» فيليالىنىڭ 500 كۆ «الماتى» قوسالقى ستانساسىنىڭ جانىنداعى وقۋ-جاتتىعۋ پوليگونى تاڭداپ الىندى. بيىكتىگى 42 مەترگە دەيىن جەتەتىن باعاندارعا تارتىلعان اۋە ەلەكتر جەتكىزۋ جەلىلەرىنە قىزمەت كورسەتۋ بويىنشا شەبەرلىكتەرىن شىڭداۋعا كومپانيانىڭ وڭىرلەردەگى فيليالدارىنىڭ ەلەكترمونتەرلەرنەن جاساقتالعان 9 بريگادا قاتىستى.
«بيىلعى بايقاۋدىڭ ەكى ەرەكشەلىگىن اتاپ وتكىم كەلەدى. بىرىنشىدەن, باسەكەلەس 9 كوماندانىڭ ءبارىنىڭ دايىندىعى وتە جوعارى دەڭگەيدە بولدى. ەكىنشىدەن, بايقاۋدىڭ جالپى جۇلدە قورى 11 100 000 تەڭگەنى قۇرادى, ياعني بۇل بۇرىنعى بايقاۋلارعا قاراعاندا 4 ەسە كوپ. شىن مانىندە ەلەكترمونتەرلەردىڭ جۇمىسى كوزسىز باتىرلىق پەن اسقان جۇرەكتىلىكتى تالاپ ەتەدى. حالىقتى سەنىمدى ەلەكتر ەنەرگياسىمەن قامتاماسىز ەتۋدە ماڭىزدى ءرول اتقاراتىن ەنەرگەتيك ماماندارىمىز بۇدان دا جوعارى ماراپاتتارعا لايىق دەپ ەسەپتەيمىن. سەبەبى 42 مەترلىك بيىكتىكتە ءتىلسىز جاۋمەن ارپالىساتىن ەلەكترمونتەرلەردى بۇگىنگى بەيبىت زاماننىڭ باتىرلارى دەپ ايتار ەدىم», دەيدى «KEGOC» اق باسقارما توراعاسىنىڭ ورىنباسارى باقىتحان جازىقباەۆ.
جارىس بارىسىندا كوماندالار التى كەزەڭنەن تۇراتىن سىناقتان ءوتتى. اتاپ ايتقاندا, نورماتيۆتىك-تەحنيكالىق قۇجاتتامانى ءبىلۋ دەڭگەيى جانە تەوريالىق دايىندىق, زارداپ شەككەن ادامدى (مانەكەندى) ەلەكتر توعىنىڭ قۇرساۋىنان بوساتۋ, ونى 220 كۆ اۋە جەلىسىنىڭ تىرەگىنەن ءتۇسىرۋ جانە دارىگەرگە دەيىنگى مەديتسينالىق كومەك كورسەتۋ, ءتۇرلى اقاۋى بار شىنى وقشاۋلاعىشتاردى اۋىستىرۋ كەزىندەگى شەبەرلىك, تىرەك ارالىقتارىنداعى كەرگىلەردىڭ قاشىقتىقتان باسقارىلاتىن اقاۋى بارلارىن اۋىستىرۋ جانە ارنايى قۇرالداردى قولدانا وتىرىپ, 220 كۆ اۋە جەلىسىنىڭ انكەرلىك مەتالل تىرەگىنىڭ سىم شلەيفىن جالعاۋ داعدىلارى.
«مۇنداي كاسىبي بايقاۋ سوڭعى رەت 2019 جىلى وتكىزىلگەن بولاتىن. سودان بەرگى ءتورت جىلدا ەلەكترمونتەرلەردىڭ كاسىبي دەڭگەيلەرى ەداۋىر ارتقانى بايقالادى. ويتكەنى كوماندالار اراسىنداعى ۇپاي ساندارىندا ايتارلىقتاي ايىرماشىلىق بولعان جوق. ياعني ولار ۇپاي جيناۋدان يىق تىرەستىرىپ وتىردى. بۇل ەلەكترمونتەرلەردىڭ جوعارى بىلىكتىلىك دەڭگەيى مەن ۇلكەن دايىندىعىن كورسەتەدى», دەيدى بايقاۋدىڭ ۇيىمداستىرۋ جۇمىستارىنا باستان-اياق قاتىسقان «الماتى جەت» فيليالى ەلەكتر جەتكىزۋ قىزمەتىنىڭ باستىعى بەكجان راۋايانوۆ.
ءتورت كۇنگە سوزىلعان كاسىبي جارىستىڭ قورىتىندىسىندا جۇلدەلى ءى ورىندى «اقمولا جەت» فيليالىنىڭ كومانداسى جەڭىپ الدى. ءىى ورىندى «سولتۇستىك جەت» فيليالىنىڭ ەلەكترمونتەرلەرى يەمدەندى. ءىىى ورىندى «شىعىس جەت» جانە «وڭتۇستىك جەت» فيليالدارىنىڭ كوماندالارى ءوزارا ءبولىستى. سونداي-اق جەكەلەگەن اتالىمدار بويىنشا «اقتوبە جەت» فيليالىنىڭ قىزمەتكەرى نۇرجان قۋاتوۆ – «ۇزدىك شەبەر», «باتىس جەت» فيليالىنىڭ قىزمەتكەرى ايانبەك قابيەۆ – «ۇزدىك ەلەكترمونتەر», «سارىباي جەت» فيليالىنىڭ قىزمەتكەرى مۇرات بارماقوۆ – «ەڭبەك مايتالمانى», «ورتالىق جەت» فيليالىنىڭ قىزمەتكەرى ديدار مايجاقانوۆ «ۇزدىك رۇقسات بەرۋشى» اتاندى. ال «قاۋىپسىزدىك تەحنيكاسى ءبىلىمى بويىنشا ۇزدىك فيليال» كوماندالىق اتالىمى «الماتى جەت» فيليالىنىڭ كومانداسىنا بەرىلدى.
وسىنداي كاسىبي جارىستار وندىرىستىك پەرسونالدىڭ شەبەرلىگى مەن دايىندىعىن باعالاۋ ءۇشىن عانا ەمەس, سونىمەن بىرگە وڭىرلىك فيليالدار ەنەرگەتيكتەرىنىڭ ءبىر-بىرىمەن ىسكەرلىك بايلانىس ورناتىپ, ءوزارا تاجىريبە الماسۋىنا مۇمكىندىك تۋعىزادى.
جەڭىمپاز اتانعان «اقمولا جەت» كومانداسى بيىل تمد ەلەكترجەلىلىك كومپانيالارى اراسىندا وتەتىن حالىقارالىق كاسىبي شەبەرلىكتى شىڭداۋ بىرىنشىلىگىندە قازاقستاننىڭ نامىسىن قورعايتىن بولادى.
