وقيعا 7 قازان كۇنى بولعان. كەيۋاناعا بەلگىسىز بىرەۋ تەلەفون شالىپ, نەمەرەسىنىڭ جول اپاتىنا تۇسكەنىن, وعان نەمەرەسى كىنالى ەكەنىن ايتىپ, شىعىندى وتەۋ ءۇشىن جابىرلەنۋشىگە جەدەل تۇردە اقشا بەرۋ قاجەتتىگىن جەتكىزەدى. ءوزىن «پوليتسيا قىزمەتكەرىمىن» دەپ تانىستىرعان الاياق نەمەرەسى اۋرۋحانادا جاتقانىن ايتىپ, قارا بۇلتتى ءتىپتى قويۋلاتقان. ۇرەيى ۇشقان اجەي سول جەردە بار جيعان-تەرگەن 1,5 ميلليون تەڭگە قاراجاتتى سومكەگە سالىپ, ءۇيدىڭ الدىنا كەلگەن تاكسي جۇرگىزۋشىسىنىڭ قولىنا ۇستاتادى. ءبىراز ۋاقىتتان كەيىن نەمەرەسىمەن حابارلاسىپ, ءوزىنىڭ الاياققا الدانعانىن ءبىر-اق بىلەدى.
ورال قالالىق پوليتسيا بولىمىنە حابارلاسقان كەيۋانانىڭ شاعىمىنان كەيىن پوليتسيا قىزمەتكەرلەرى دەرەۋ ىسكە كىرىسكەن. اۋەلى اجەنىڭ ۇيىنەن اقشانى الىپ كەتكەن تاكسيدى تابادى. ول الگى قاراجاتتى الىپ, الاياقتارعا جەتكىزۋ ءۇشىن اتىراۋعا كەتىپ بارا جاتىر ەكەن.
«قولدانىلعان جەدەل ىزدەستىرۋ ءىس-شاراسى بارىسىندا ورال قالالىق پوليتسيا باسقارماسىنىڭ اباي بولىمىنە قاراستى كريمينالدىق پوليتسيا قىزمەتكەرلەرى اتىراۋ وبلىسىنداعى ارىپتەستەرىمەن بىرلەسىپ, تاكسي جۇرگىزۋشىسى تۋرالى اقپاراتتى انىقتادى. ءبىزدىڭ قىزمەتكەر تاكسي جۇرگىزۋشىسىنە حابارلاسىپ, سالەمدەمەنى الدىرىپ جاتقان الاياقتار ەكەنىن ەسكەرتتى. ءسويتىپ, تاكسي ورتا جولدان كەيىن قايتارىلدى. پوليتسيا قىزمەتكەرلەرى اقشا سالىنعان سومكەنى جابىرلەنۋشىگە قايتاردى», دەيدى پوليتسيا دەپارتامەنتى ءباسپاسوز قىزمەتىنىڭ وكىلى اسىلاي عۇباشەۆا.
وسى وقيعاعا وراي قىلمىستىق كودەكستىڭ 190-بابىنىڭ 1-بولىگىنە (الاياقتىق) سايكەس تەرگەۋ باستالعان. پوليتسيا الاياقتىق جاساماق بولعان ادامداردى انىقتاۋ ماقساتىندا جەدەل ىزدەستىرۋ شارالارىن جۇرگىزىپ جاتىر.
باتىس قازاقستان وبلىسى
