باسىلىمداردىڭ باستى بايلىعى – وقىرمان

بيىلعى ناۋقان اياسىندا ماڭعىستاۋ وبلىسىنا ارنايى ىسساپارمەن «قازاق گازەتتەرى» جشس باس ديرەكتورى ديحان قامزابەك ۇلى كەلدى.

ول وبلىستىق ءماسليحاتتىڭ ۇيىمداس­تىرۋىمەن وتكىزىلگەن الاش ارداق­تى­سى, قالامى قارىمدى پۋبليتسيست, كور­­نەكتى مەملەكەت قايراتكەرى جالاۋ مىڭ­باي ۇلىنىڭ ءومىرى مەن شىعارما­شىلىعىنا ارنالعان «ەلىم دەپ وتكەن ەر جالاۋ» اتتى القالى جيىنعا قاتىستى.

اتالعان ءىس-شارادا قازاقستان جازۋ­شىلار وداعىنىڭ, قازاقستان جۋرنا­ليستەر وداعىنىڭ جانە حالىقارالىق جام­بىل اتىنداعى سىيلىقتارىنىڭ لاۋ­رەاتى د.تۇرلىبەك, وبلىس اكىمىنىڭ ورىنباسارى ز.ەسبەرگەنوۆا, وبلىستىق ءماسليحات توراعاسى ج.ماتاەۆ, بەلگىلى اقىن س.اداي جيىلعان قوناقتاردى, اسىرەسە ستۋدەنت جاس­تاردى الاش ارىس­تارىنىڭ ۇلتتى ساقتاۋ, ازاتتىقتى اڭساۋ جولىنداعى ومىرلەرىن قيعان ەرەن ىستەرى تۋرالى ايتىپ, تاريحتى قۇرمەتتەۋ, الاش ارداقتىلارىن تانۋ جانە زەرتتەۋ, وتاندى ءسۇيۋ, ەلگە قىزمەت ەتۋگە شاقىرعان تا­عىلىمدى تىلەكتەرىن ارنادى.

– ەلىم دەپ ەڭىرەپ وتكەن ەرلەردىڭ ەرەن ەڭبەگىن عالىمدارىمىز ەلەپ-ەكشەپ, ءبىراز زەرتتەۋ كىتاپتارى جازىلدى. ءبىز ەندى وسى ۇلاعاتتى ءىستى جاستارىمىزدىڭ ۇعىنعانىن جانە جالعاستىرعانىن قالايمىز. ەلدىڭ كەلەشەگى – جاستار, كەيىنگى تولقىن كەشەگى ەرلەر­دىڭ رۋحىنا, بۇگىنگى ەلجاندى اعا بۋىننىڭ تىلەگىنە ساي بولىپ ءوسىپ-جەتىلسە, ۇر­پاقتار اراسىنداعى ساباقتاستىقتى ساق­تاي بىلسە – مەملەكەتىمىز وركەندەپ, تا­ۋەل­سىزدىگىمىز نىعايىپ, ۇلتتىق قاسيەت-قۇندىلىقتارىمىز جوعالمايتىن بولادى, دەدى س.اداي اعىنان اقتارىلىپ.

كەزدەسۋ ماڭعىستاۋ وبلىستىق ءماسلي­حاتى عيماراتىندا جالعاسىپ, ءماس­ليحات توراعاسى ج.ماتاەۆ مۇنايلى ولكەنىڭ الەۋمەتتىك-ەكونوميكالىق دامۋى تۋرالى باياندادى.

– وڭىردە قازىرگى تاڭدا شەشىمىن تاپپاي تۇرعان ماسەلەلەر بار, بىراق ونىڭ ءبارى ءوز ۋاقىتىمەن شەشىلەدى. ءبىز مۇنى قولعا الىنعان جانە جۇزەگە اسىرىلاتىن اۋقىمدى جوسپارلارعا قاراپ بىلەمىز. قازىرگى تاڭدا ماڭعىستاۋدا ءتۋريزمدى دامىتۋ باعىتىندا ىرگەلى ىستەر جۇرگىزىلىپ جاتىر. سونداي-اق جۇمىسسىزدىقتى جويۋ, اۋىز سۋ ماسەلەسىن شەشۋ, قۇرىلعىلارى توزعان ماەك-ءتى جاڭعىرتۋ, «كاسپي» سۋ تۇشىتۋ زاۋىتى قۋاتىن ارتتىرۋ جۇ­مىستارى قارقىندى جۇرگىزىلىپ كەلەدى. كاسىپكەرلىك سالاسىندا سالىناتىن نى­ساندار, اشىلاتىن كاسىپورىندار بىزگە جۇمىسسىزدىقتى ءبىراز ەڭسەرۋگە مۇم­كىندىك بەرەتىن بولادى, – دەدى ول ويىن تۇيىندەپ.

ۇعا اكادەميگى, الاشتانۋشى د.قام­زابەك ۇلى ماڭعىستاۋ تەلەارناسىنا تىكەلەي جەلىدە «قوعام مادەنيەتى جانە اقپاراتتىق قاۋىپسىزدىك» تاقىرىبىندا سۇحبات قۇرىپ, كوزى قاراقتى كورەرمەن تاراپىنان قويىلعان ءتۇرلى ساۋالدارعا جاۋاپ بەردى. سونداي-اق 9 مىڭنان استام ستۋدەنت ءبىلىم الىپ جۇر­گەن وڭىردەگى جەتەكشى وقۋ ورنى, الدىنا زور مەجە قويىپ وتىرعان ش.ەسەنوۆ اتىنداعى كاسپي مەملەكەتتىك تەحنولوگيالار ۋنيۆەرسيتەتىندە كەلەلى كەزدەسۋ ءوتتى. ۋنيۆەرسيتەت رەكتورى, تەحنيكا عىلىمدارىنىڭ كانديداتى, «بولاشاق» باعدارلاماسىنىڭ تۇلەگى بەرىك احمەتوۆ ءبىلىم ورداسىنداعى جاڭاشىلدىقتى بايانداپ, گەرمانيا ۋنيۆەرسيتەتتەرىمەن بىرلەسىپ جۇزەگە اسىراتىن جوبالاردى تا­نىستىردى. ۋنيۆەرسيتەت باسشىسى ەلى­مىزدەگى ءبىلىم بەرۋدىڭ ساپاسىن ارتتىرۋ, سونداي-اق ماڭعىستاۋ وڭىرىندەگى جۇ­مىسسىزدىقتى ازايتۋعا اتسا­لىسۋ ماق­سا­تىنداعى جوبالاردى جۇزەگە اسى­رۋعا كى­رىس­كەندىكتەرى تۋرالى گا­زەتتە بىر­نەشە ما­قالا جاريالاپ, وقىر­مانعا تانىس­تىرعاندارىن جەتكىزدى. ۋنيۆەرسيتەت رەكتورى گازەت باسشىسىن قابىلداپ, ەلىمىزدىڭ قوعامدىق-ساياسي ومىرىندە وزىندىك ورىنى بار باسىلىمدار جۇمىسىنا ساتتىلىك تىلەپ, مۇمكىندىككە قاراي قولداۋ كورسەتەتىندىگىن ايتتى.

وقۋ ورنىنىڭ كينو زالىندا قوناقتار مەن وقىتۋشىلار, ستۋدەنتتەر تەلەجۋرناليست د.تۇرلىبەك تۇسىرگەن «جالاۋ مىڭ­باي ۇلى» دەرەكتى ءفيلمىن تاماشالاپ, ماڭعىستاۋ وبلىستىق ءماسليحاتى مەن ش. ەسەنوۆ اتىنداعى كاسپي تەحنولو­گيالار جانە ينجينيرينگ ۋنيۆەرسيتەتى ۇيىمداستىرعان «ۇلت ءباسپاسوزى جانە ەلدىك مۇرات» اتتى بىرلەسكەن ءىس-شاراعا قاتىستى. الدا كەلە جاتقان رەسپۋبليكا كۇنى اياسىندا زيالى قاۋىم وكىلدەرىمەن, جاستارمەن پىكىر الماسىپ, سۇحباتتاسۋ ماقساتىنداعى باسقوسۋدا سۋدەنتتەر اعا بۋىن وكىلدەرىنە ءتۇرلى سۇراقتار قويىپ, جاۋاپتارىن تىڭدادى.

ءباسپاسوز – حالىق ساۋاتتىلىعىنىڭ كەپىلى, ول تاسقا حاتتالىپ جازىلعان ەل تاريحى. جالپ ەتىپ ءسونۋى مەن جانۋ-جانباۋى ەشكىمگە ءمالىم ەمەس ەلەكترون­دى ءتاسىلدىڭ سەنىمسىزدىگىنەن باسىلىم عانا قۇت­قارادى. سوندىقتان حالىققا جەلى­لەردەن گورى باسىلىمدارعا جازىلىپ, وقۋ, جازۋ ساۋاتتىلىعىن شىڭداپ وتىرۋ ماڭىزدى. ال ءجۇز جىلدان استام تاريحى بار, ۇلتىمىزدىڭ مارعاسقا ازاماتتارى قىزمەت ەتكەن, ۇلت بىرلىگىن, مەملەكەت تۇتاس­تىعىن تۋ ەتكەن «Egemen Qazaqstan» گازەتىنە جازىلۋ – ازاماتتاردىڭ مەملەكەتكە, قازاق قوعامىنا جانە انا تىلىمىزگە جاساعان قولداۋى سانالادى.

ماڭعىستاۋ وبلىسى