بيىلعى بايقاۋعا الەمنىڭ 101 ەلىنەن 6700 ادام قاتىسىپ, ولار وزدەرى تۇسىرگەن فوتولارىن جىبەرىپتى. وسىندا 14-17 جاس ارالىعىنداعى ۇمىتكەرلەر اراسىنان موڭعوليالىق قازاق بالا اقجول قاينار ۇلى تۇسىرگەن فوتو ۇزدىكتەر ساپىنان تابىلىپ, جۇلدەگە يە بولىپتى.
وزدەرىڭىز كورىپ وتىرعانداي, بايگە العان فوتودا سول ەلدەگى قازاق اعايىندار جايلاۋعا جاڭادان كوشىپ كەلىپ, التى قانات كەرەگەسى جەلكوز, توقسان باستى كيىز ءۇيىن تىگىپ جاتقان كورىنىس تۇسىرىلگەن. ءۇيدىڭ سىرتىندا ورنەك سالىپ ورالعان توقىمالى ءشيى كوزگە تۇسسە, جالاڭاش ۋىقتى اق جابىندىمەن بۇركەمەلەپ جاتىر...
بايگە العان بالا حاقىندا جەرگىلىكتى ءباسپاسوز جارىسا جازىپ جاتىر. ولاردىڭ ايتۋىنان اڭعارعانىمىز, بۇنداي ۇلكەن بايقاۋدان جۇلدەگەر (3-ورىن) اتانۋ – زور جەتىستىك ءارى مەملەكەتتىڭ ابىرويىن كوتەرەتىن وقيعا. وسى ورايدا, قازاق اتىن جالپاق الەمگە تانىتىپ ۇلگەرگەن اقجول بالامىزعا حابارلاسىپ, ءمان-جايدى بىلدىك:
«مەن 2006 جىلى باي-ولكە ايماعىنىڭ ورتالىعىندا دۇنيەگە كەلدىم. قازىر ستۋدەنت اتانۋ ءۇشىن ەمتيحانعا دايىندالىپ ءجۇرمىن. تابيعاتتى, كوشپەلى ءومىر سالتىن فوتوعا ءتۇسىرۋ – بالا كەزدەن قالىپتاسقان سۇيىكتى ءىسىم. سونىمەن قاتار بوكسپەن شۇعىلدانىپ ءجۇرمىن. جاسوسپىرىمدەر اراسىندا ەل بىرىنشىلىگىنىڭ كۇمىس مەدال يەگەرىمىن», دەيدى ول.
ال «يۋنەسكو ۇيىمداستىرعان فوتوبايقاۋعا قالاي قاتىسىپ ءجۇرسىڭ؟» دەگەن سۇراعىمىزعا: «2021 جىلى موڭعول فوتوسۋرەتشىلەر وداعىنىڭ سايتىنان «جاپونيانىڭ حيگاشيكاۆا قالاسىندا جاسوسپىرىمدەر اراسىندا حالىقارالىق بايقاۋ وتەتىنى» تۋرالى اقپاراتتى كورىپ قالدىم. بايقاۋعا ءوزىم تۇسىرگەن 12 سۋرەتتى جىبەردىم. قاراشا ايىندا قورىتىندىسى شىعادى دەگەن حابار الدىم. سودان 8 قاراشا كۇنى مەنىڭ فوتولارىم جۇلدەگە لايىق دەپ تانىلعانى تۋرالى حاتپەن بىرگە جاپونيا ەلىنە ساياحاتتايتىن جولداما قوسا كەلدى», دەيدى اقجول.
وسىلاي قازاقتىڭ كوشپەلى ءومىرىن سۋرەتكە ءتۇسىرىپ, حالىقارالىق بايگەلەرگە جولداۋدى ادەتكە اينالدىرعان اقجول جوعارىداعى يۋنەسكو بايگەسىنە دە باق سىناپ كورگەن. ۇيىمداستىرۋشىلار وسىلاردىڭ ىشىنەن مۇندا وزدەرىڭىز كورىپ وتىرعان فوتونى تاڭداپ الىپ, بۇل سۋرەت تۋرالى تۇسىندىرمە جازىپ جىبەرۋدى ءوتىنىپتى. ونى شاماسىنشا جازىپ جىبەرگەن ەكەن.
«وتكەن ايدىڭ 20-سى كۇنى يۋنەسكو-دان حابار كەلىپ تۇر. وندا مەنىڭ سۋرەتىم جۇلدەگە ىلىنگەندىكتەن, ماراپاتاۋ ءراسىمى وتەتىن قىتاي ەلىنىڭ استاناسى بەيجىڭگە تەز جەتىڭىز دەلىنىپتى», دەيدى ول.
اقجول بارعان. قوماقتى سىيلىق العان. ۇيىمداستىرۋشىلار: ء«سىز تۇسىرگەن فوتو باس جۇلدە الۋعا لايىق ەدى, بىراق ءوزىڭىز ونىڭ اعىلشىن تىلىندەگى تۇسىندىرمەسىن جاقسىلاپ جازىپ بەرە المادىڭىز» دەگەن كورىنەدى.
