مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا كاسىپكەرلىكتى دامىتۋ جانە ەكونوميكانىڭ ءوزىن-ءوزى قامتاماسىز ەتۋىنە ەرەكشە نازار اۋداردى. بۇل باعىتتا مادەنيەت جانە اقپارات مينيسترلىگى بىرقاتار جوبانى ىسكە قوسىپ ۇلگەردى. سونىڭ ءبىرى – «Zhas Project» جوباسى.
«Zhas Project» – الەۋمەتتىك جوبالار مەن بيزنەس يدەيالاردى قارجىلاندىرۋ ارقىلى حالىقتىڭ وسال توپتارىن, اسىرەسە اۋىلدىق جەرلەردە تۇراتىن جاس وتانداستارىمىزدى قولداۋعا باعىتتالعان بىرەگەي باستاما. ماقسات – 18 بەن 35 جاس ارالىعىنداعى جۇمىسسىز رەتىندە تىركەلگەن ازاماتتاردىڭ باستامالارىنا قولداۋ كورسەتۋ, ولاردىڭ ءوز بەتىنشە دامۋىنا جانە بولاشاقتا كاسىبىن تۇراقتى وركەندەتۋىنە جاردەمدەسۋ. وسىلايشا, NEET ساناتىنداعى جاستاردىڭ سانىن مەيلىنشە ازايتۋ.
– يدەياسى تىڭ دەپ تانىلعان جوبا يەگەرىنە كەمىندە 6 اي جۇمىس ىستەۋگە 1 ملن تەڭگەگە دەيىن گرانت تابىس ەتىلەدى. سونداي-اق جوبا بەلگىلى ءبىر كاسىپپەن اينالىسۋعا عانا مۇمكىندىك بەرىپ قويماي, جۇمىس تاۋىپ بەرۋ ارقىلى دا الەۋمەتتىك ماسەلەلەردىڭ شەشىلۋىنە سەپتىگىن تيگىزەدى. ياعني جاستاردى ءوز قوعامىنىڭ الەۋمەتتىك-ەكونوميكالىق ومىرىنە تارتۋعا جانە ناتيجەلى جۇمىسپەن قامتۋعا كومەكتەسەدى. 2018 جىلدان باستاپ باستاۋ العان «Zhas Project» جوباسى 6 وڭىردە قاناتقاقتى تۇردە جۇزەگە اسىرىلىپ, 250 گرانت بەرىلگەن. ال بيىل ەلىمىزدىڭ بارلىق وڭىردەگى جاستار تارتىلادى دەپ جوسپارلانعان. سوعان ساي بەرىلەتىن گرانت سانى دا ارتتى. وسى رەتتە ساپالى جانە ءتيىمدى ىسكە اسىرۋ ءۇشىن ءار وڭىردە اشىلعان ارنايى جوبالىق كەڭسەلەر جۇمىس ىستەيدى جانە Call ورتالىقتار قۇرىلدى. سول كەڭسەلەردەن ازاماتتار قوسىمشا اقپارات الا الادى, – دەدى روللان قۇسپان.
تالاي جاستى جارىلقاعان جوبا بىلتىر الماتى, جەتىسۋ, قاراعاندى, ۇلىتاۋ, ماڭعىستاۋ جانە تۇركىستان وبلىسىندا ءساتتى جۇزەگە اسقان. ماسەلەن, ماڭعىستاۋ ايماعىندا بىلتىر 63 شاعىن گرانت بەرىلگەن. ناتيجەسىندە, مۇنايلى ايماقتا كاسىبىن دوڭگەلەتىپ وتىرعان جاستار قاتارى ارتقان. ەندى ىلكىمدى ءىستىڭ يگىلىگىن رەسپۋبليكانىڭ 20 وڭىرىندەگى ازاماتتار دا كورەدى.
– كوبىنەسە جاستار قىزمەت كورسەتۋ باعىتىن تاڭدايدى. قالالى جەردەگىلەر سۇلۋلىق سالوندارى مەن شاشتاراز اشۋ جاعىنا باسىمدىلىق بەرسە, اۋىل-ايماقتاعى تۇرعىندار ەت-ءسۇت ونىمدەرىن شىعارۋ بويىنشا بەلسەندىلىك تانىتادى. نەگىزى جاستارعا جۇكتەلەتىن مىندەت – كاسىپتىك يدەيا قالىپتاستىرىپ, ونى بيزنەس جوبا رەتىندە ۇسىنۋ. گرانتقا قول جەتكىزگەن سوڭ تۇتىنۋشى تارتۋى قاجەت بولادى. ىرىكتەۋ ەكى كەزەڭدە وتكىزىلەدى. جەڭىمپازدارمەن ارنايى كەلىسىمشارت جاسايمىز. ولارعا ارنايى تالىمگەر تاعايىندالادى. ولار تالىمگەرمەن بىرلەسە ءوز جوبالارىن ىسكە اسىرادى. گرانت اياسىندا العان قۇرال-جابدىقتارىنىڭ بارلىعى وزدەرىندە قالادى. ەگەر قارجىنى ماقساتسىز جۇمساۋ تىركەلسە ازاماتتىق باستامالاردى قولداۋ ورتالىعىنىڭ كەلىسىمشارتتارى مەن قولدانىستاعى زاڭناماعا سايكەس, قاراجاتتى قايتارۋ نەمەسە باسقا ازاماتقا بەرۋ جۇمىستارىن جۇرگىزەمىز, – دەدى «تۇپقاراعان جاستارى» قوعامدىق بىرلەستىگىنىڭ توراعاسى, الماتى قالاسى جانە ماڭعىستاۋ وبلىسىندا «Zhas project» جوباسىن ىسكە اسىرۋ بويىنشا گرانت الۋشى ناۋرىزبەك ماعداتوۆ.
ءباسپاسوز ءماسليحاتىندا جاقىندا ءوتىنىم قابىلداۋ باستالعان «تاۋەلسىزدىك ۇرپاقتارى» گرانتى تۋرالى دا ءسوز بولدى. الاڭعا ارنايى دارىندى جاستاردى قولداۋعا باعىتتالعان باستامانىڭ يەگەرى دينارا ناۋموۆا شاقىرىلدى. ءماجىلىس دەپۋتاتى بىرنەشە جىل بۇرىن ويدا جۇرگەن يدەياسىنىڭ قالاي جۇزەگە اسقانىن كەڭىنەن ايتىپ بەردى.
– مەنىڭ تاجىريبەم, جوبام كەيدە وزىمە بىرەگەي بولىپ كورىنەدى. ءدال قازىر قابانباي باتىر ەلدى مەكەنىندە جۇزەگە اسىرىلىپ جاتقان الەۋمەتتىك جوبانىڭ اۆتورىمىن. بۇل – ەرەكشە بالالاردى وڭالتۋ ورتالىعى. مەن «تاۋەلسىزدىك ۇرپاقتارى» گرانتىن بەكەر العان جوقپىن. گرانتقا قول جەتكىزۋ دە كۇردەلى جۇمىس. التى جىل بويى ءوز يدەيام تۋرالى ايتىپ, ادامدارمەن تانىسىپ, جوبانىڭ ماڭىزدىلىعى تۋرالى جەتكىزىپ ءجۇردىم. ءار كۇن سايىن ونى جۇزەگە اسىرۋعا ءبىر قادام بولسا دا جاقىنداي تۇسۋگە تىرىستىم. بۇل مەن ءۇشىن وتە ماڭىزدى ەدى. قازىر اينالىسىپ جۇرگەن جۇمىسىمدى شىنىمەن ومىرلىك ءمانى بار كاسىپ دەپ اتاي الامىن. مۇنداي دياگنوزدى ءوز باسىمنان وتكەرگەننەن كەيىن ەرەكشە بالالارعا پايدالى بولۋ مەنىڭ ءومىر بويى اينالىسۋعا دايىن قىزمەتىم ەكەنىن ءتۇسىندىم. ءوز جوباما دەگەن سەنىمىم مىقتى بولدى. اقوردادا پرەزيدەنتتىڭ قولىنان ماقتاۋ قاعازىن العان ساتتە, كەۋدەمدى ماقتانىش سەزىمى كەرنەگەنى راس. ويتكەنى شىنىمەن دە ماڭىزدى ءىس تىندىرعانىمدى جانە ونى مەملەكەت باسشىسى باعالاعانىن ءتۇسىندىم. مەملەكەت باسشىسىنىڭ جاستارعا سەنەتىنىن جانە وسىنداي باستامالار جاس بۋىنعا سەرپىن بەرەتىنىنە كوزىم جەتتى, – دەدى ول.
