بيىل تامىز ايىندا «جاستار» عىلىمي زەرتتەۋ ورتالىعى جىلداعى داستۇردەن تانباي «قازاقستان جاستارى» الەۋمەتتىك زەرتتەۋىنىڭ ناتيجەلەرىن جاريالادى. مۇنداعى ماقسات – ەل جاستارى ءومىرىنىڭ ءارتۇرلى اسپەكتىسىن زەردەلەۋ جانە مەملەكەتتىك جاستار ساياساتىن ىسكە اسىرۋدىڭ تيىمدىلىگى جونىندە ۇسىنىمدار ازىرلەۋ. وسى ورايدا ەلوردادا مەملەكەتتىك ورگاندار مەن عىلىمي زەرتتەۋ ورتالىقتارىنىڭ, ۇەۇ باسشىلارى مەن جاستار ساياساتى سالاسىنداعى ساراپشىلار باسقوسىپ, قۇجاتتى جان-جاقتى تالدادى.
– جاستار – مەملەكەتتىڭ ەڭ ماڭىزدى ستراتەگيالىق رەسۋرسى. مەملەكەت تاراپىنان جاستاردىڭ ءبىلىم, دەنساۋلىق دەڭگەيىن ارتتىرۋعا, ەڭبەككە ورنالاستىرۋ مەن بوس ۋاقىتىن ۇيىمداستىرۋعا جانە تۇتاستاي العاندا جاستاردىڭ ءوزىن-ءوزى تانۋى مەن وزدەرىن كورسەتۋىنە قاتىستى جۇيەلى ءىس-شارالار جۇرگىزىلىپ كەلەدى. جاستاردى دامىتۋ باعىتىندا مەملەكەت قولعا العان ءىس-شارالاردىڭ تيىمدىلىگىن باعالاۋ ءۇشىن وسى ساناتتاعى تۇرعىنداردىڭ الەۋمەتتىك كوڭىل كۇيىن جۇيەلى تۇردە باقىلاپ, تارازىلاپ وتىرۋ قاجەت. بۇل زەرتتەۋدىڭ وزەكتىلىگى – مەملەكەتتىك جاستار ساياساتىن جەتىلدىرۋ ءۇشىن جاستاردىڭ نەگىزگى ماسەلەلەرى مەن ۇردىستەرىنە, ەرەكشەلىكتەرىنە قاتىستى تۇراقتى ساراپتاما جاساپ وتىرۋدىڭ قاجەتتىلىگىمەن نەگىزدەلەدى. جاس وتانداستىرىمىزدىڭ سونىمەن بىرگە الەۋمەتتىك ينستيتۋتتار مەن ۇيىم ساراپشىلارىنىڭ جاستار ساياساتىنا قاتىستى مەملەكەتتىك باعدارلامالار تۋرالى وي-پىكىرلەرى مەن باعالاۋلارىن جان-جاقتى زەرتتەۋ مەملەكەتتىك جاستار ساياساتىن جۇرگىزۋدە قولعا الىنعان ءىس-شارالاردىڭ تيىمدىلىگىن ساراپتاۋدا وتە ماڭىزدى. سوندىقتان الداعى ۋاقىتتا تاعى دا وسىنداي پىكىرتالاس الاڭدارىن ۇيىمداستىرۋدى كوزدەپ وتىرمىز, – دەدى «جاستار» عىلىمي زەرتتەۋ ورتالىعىنىڭ ديرەكتورى ايسۇلۋ ەرنيازوۆا.
ساۋالداما بيىل 12 ءساۋىر مەن 5 مامىر ارالىعىندا بارلىق وڭىردە جاستار ورتاسىنداعى ەڭ وبەكتيۆتى اقپارات الۋعا مۇمكىندىك بەرەتىن «face-to-face» ادىسىمەن وتكىزىلگەن. وعان 1 243 قالا, 757 اۋىل حالقى قاتىسقان. زەرتتەۋدە الدىمەن جاستاردىڭ دەنساۋلىعى مەن بوس ۋاقىتىنا ساراپتاما جاسالىنعان.
– زەرتتەۋ ناتيجەلەرىنە سايكەس, رەسپوندەنتتەردىڭ 64,8 پايىزى دەنساۋلىعىن جوعارى دەڭگەيدە دەپ باعالاسا, شيرەك بولىگى (26,5%) جاقسى دەپ ەسەپتەيدى. 4,3 پايىزى قاناعاتتانارلىق دەپ باعالاسا, 3,1 پايىزى دەنساۋلىق جاعدايلارىن ناشار نەمەسە وتە ناشار دەپ كورسەتتى. دەنساۋلىق جايىن بارىنشا ءدال انىقتاۋ ءۇشىن ساۋالداماعا ء«سىزدىڭ جاي-كۇيىڭىز بەرىلگەن قانداي سيپاتتاما سايكەس كەلەدى؟» دەپ انىقتاۋ سۇراعى ەنگىزىلگەن بولاتىن. جاۋاپ رەتىندە جەكەلەگەن وزەكتى اسپەكتىلەر كورسەتىلدى. ساۋالعا سايكەس جاستاردىڭ 44,1 پايىزى كورۋ قابىلەتى ناشارلاۋىنا قاتىستى ماسەلە بارىن كورسەتتى. ال 29,2 پايىزى اسقازان ىشەك جولىندا ماسەلە بار دەسە, 9,2 پايىزى ارقادا (گرىجا, پروترۋزي, بەل ومىرتقا قيسايۋى) ماسەلە بارىن ايتىپ وتىر. سوزىلمالى اۋرۋ بەلگىلەرىنە بايلانىستى دارىگەردە ەسەپتە تۇرعان جاستار سانى 7,6 پايىز بولىپ شىقتى. رەسپوندەنت جاسى ۇلعايعان سايىن دەنساۋلىعىنا قاتىستى پروبلەمالىق اسپەكتىلەردى ءجيى بايقايتىنىن كورسەتتى. قالا جاستارى دەنساۋلىعىنا بايلانىستى ماسەلە بارىن ءجيى ايتادى. گەندەرلىك جاعىنان ارتىق سالماق پەن كوز ناشارلاۋىنا قاتىستى ماسەلەلەردى قىزدار ءجيى كورسەتكەن. بايقاعانىمىز, ساۋالداماعا قاتىسقان جاستاردىڭ جارتىسىنان كوبى سالاماتتى ءومىر سالتىن ۇستاناتىنىن جەتكىزدى, – دەدى «جاستار» عزو الەۋمەتتىك زەرتتەۋلەر جانە بولجاۋ باسقارماسىنىڭ باسشىسى سابينا شايمەردەنوۆا.
قۇجاتقا زەر سالساق, ەل جاستارىنىڭ شامامەن 50 پايىزى ساياسي جاڭالىقتار مەن كۇندەلىكتى وقيعالارعا قىزىعۋشىلىق بىلدىرەدى. ولاردىڭ باسىم بولىگى سەنىمدى اقپارات كوزى رەتىندە تەلەديدار, گازەت جانە راديو سەكىلدى ءداستۇرلى باق-تى تاڭداعان. ال قالعانى ءتۇرلى الەۋمەتتىك جەلىلەر مەن مەديا پورتالدى, بلوگتاردى بەلگىلەگەن. سونداي-اق رەسپوندەنتتەردىڭ كوپشىلىگى WhatsApp مەسسەندجەرىن – 98,2 جانە Instagram الەۋمەتتىك جەلىسىن 97,9 پايىز پايدالاناتىنىن كورسەتكەن.
