بىلاي قاراساڭىز, كۇلكىلى جاعداي. بىراق پاريج تۇرعىندارى ءدال قازىر شىن مانىندە كۇندىز كۇلكىدەن, تۇندە ۇيقىدان ايىرىلدى. ويتكەنى ادامدار «شاقىرىلماعان قوناقتىڭ» قاي ۋاقىتتا قاي جەردەن كەلىپ «تىستەيتىنىن» بىلمەيدى. بۇرىندارى تەك ۇيلەردەن عانا تابىلاتىن قانسورعىش جاندىك قازىر ءپاريجدىڭ مەتروسى مەن اۋەجايىنا دەيىن تاراپ, ارزان جاتاقحانالاردان باستاپ, بەس جۇلدىزدى قوناقۇيلەردى دە «مەكەنىنە» اينالدىرعان. ءتىپتى كەيبىر اقپارات اگەنتتىكتەرىنىڭ مالىمەتى بويىنشا, قاندالا پويىزبەن انگلياعا دا جەتكەن. وسىعان بايلانىستى سپورت ساراپشىلارى وليمپيادانىڭ باستالۋىنا ءبىر جىلدان از ۋاقىت قالعاندا قانسورعىشتار كوروناۆيرۋس سياقتى كەلەسى جىلى دا جارىستاردىڭ وتۋىنە كەدەرگى كەلتىرە مە ەكەن دەپ الاڭداۋشىلىق ءبىلدىرىپ وتىر.
دەگەنمەن جەرگىلىكتى بيلىك ەل تۇرعىندارىن سابىرعا شاقىرىپ, قاندالادان كەلەر ەشقانداي قاۋىپ جوق ەكەنىن ايتادى. بيلىك باسىنداعىلاردىڭ سوزىنشە, فرانتسيا استاناسىندا قانسورعىش پارازيتتەردىڭ كوبەيۋ ماسەلەسى – تەك بيىل ەمەس, جىل سايىن بولىپ تۇراتىن قۇبىلىس.
فرانتسيا دەنساۋلىق ساقتاۋ ءمينيسترى ورەللەنا رۋسسو دا مۇنىڭ قالىپتى جاعداي, دۇربەلەڭگە سالىنۋعا ەش سەبەپ جوق دەيدى. «مۇنداي زيانكەستەر, ءتۇرلى ۆيرۋستار ءومىرىمىزدىڭ ءبىر بولىگىنە اينالعانىن ءتۇسىنۋىمىز كەرەك. ول ءوزى بۇرىننان سولاي. الداعى ۋاقىتتا دا مۇنداي سىناقتى باستان وتكەرۋىمىز مۇمكىن. سوندىقتان بولماشى نارسەگە بايبالام سالۋدىڭ قاجەتى جوق. بۇكىل الەم كوروناۆيرۋس پاندەمياسىن ەڭسەرگەندە, قاندالا ماسەلەسى قيىندىق تۋدىرا قويمايدى», دەيدى ول.
مارسەل ورتالىق اۋرۋحاناسىنىڭ ەنتومولوگى جان-ميشەل بەرانجە دە ۆۆس ارناسىنا بەرگەن سۇحباتىندا قاندالا ماسەلەسى بىرنەشە جىلدان بەرى كوتەرىلىپ كەلە جاتقانىن ايتقان. ء«ار جىلى جاز سوڭىنا قاراي پاريجدە قاندالا كوبەيەتىنىن بايقايمىز. وعان شىلدە مەن تامىز ايلارىندا ادامداردىڭ ءجيى ساپارلاپ, ولاردى ءبىر ەلدەن ەكىنشى ەلگە, ءبىر جەردەن ءۇشىنشى جەرگە جۇگىمەن بىرگە تاسىمالدايتىنى سەبەپ. وسىلايشا, ءار جىلى ماۋسىمدىق كورسەتكىش بىلتىرعىعا قاراعاندا ارتا بەرەدى. بيىل جاڭا ەلەمەنت – جالپىعا ورتاق پسيحوز باستالدى. ءبىر جاعىنان بۇل دۇرىس تا شىعار. سەبەبى ادامدار ەندى بۇل ماسەلە تۋرالى حاباردار بولدى, ەندى قاندالانى جويۋعا قارسى شارالار قابىلداۋ كەرەك», دەيدى جان-ميشەل بەرانجە.
ال پاريج قالاسى مەرىنىڭ ورىنباسارى ەممانۋەل گرەگۋار قاندالامەن بايلانىستى جاعداي باقىلاۋدان شىعىپ كەتتى دەپ ەسەپتەيدى. فرانتسيا پرەمەر-ءمينيسترى ەليزابەت بورنعا جازعان حاتىندا گرەگۋار قاتاڭ شارالار قابىلداۋدى سۇراعان. «جىلدام شەشىم قابىلداپ, تەز ارادا قاندالانى جويۋ قاجەت. وليمپيا ويىندارىنىڭ باستالۋىنا از عانا ۋاقىت قالعاندا مۇنداي جاعداي ءبىزدىڭ ەلگە كەلەتىن تۋريستەر سانىنا كەرى اسەر ەتۋى مۇمكىن», دەيدى ەممانۋەل.
جەرگىلىكتى «Le Parisien» باسىلىمىنىڭ جازۋىنشا, ويىنداردى ۇيىمداستىرۋ كوميتەتىنىڭ باس اۋرۋى تەك مۇنىمەن شەكتەلمەيدى. قازىر قالادا ەگەۋقۇيرىقتار مەن شىركەيلەردىڭ دە قاپتاپ كەتكەنى بايقالادى. سونداي-اق وليمپيادانىڭ جەڭىمپازدارى مەن جۇلدەگەرلەرىن ماراپاتتاۋ ءراسىمى وتەتىن سەنا وزەنىندەگى جاعىمسىز ءيىستى كەتىرۋ ماسەلەسى ءالى دە كۇن تارتىبىنەن تۇسپەي تۇر. فرانتسيا بيلىگى بيىل سەنا وزەنىن تازالاۋعا 1 ملرد ەۋروعا جۋىق قارجى بولسە دە, ازىرگە ناتيجە بەرەر ەمەس. ال ءبىر جىلدان كەيىن بۇل وزەندە وليمپياداشىلار اشىق سۋدا جۇزۋدەن مەدالدار جيىنتىعىن ساراپقا سالادى.
مۇنىڭ الدىندا حالىقارالىق وليمپيادا كوميتەتى (حوك) فرانتسياداعى جازعى وليمپيا ويىندارىنىڭ دايىندىق بارىسىنا كوڭىلى تولمايتىنىن ايتقان ەدى.
مىنە, وليمپيا ويىندارىن وسىمەن ءۇشىنشى مارتە قابىلدايىن دەپ جاتقان فرانتسيا بىرقاتار كەلەڭسىز وقيعالار مەن ناقتى كەدەرگىلەرگە تاپ بولىپ وتىر. دەسە دە, كوروناۆيرۋس پاندەمياسى جاعدايىندا دا ۇيىمداستىرىلعان وليمپياداعا قاندالا كەدەرگى كەلتىرە الماس.
