دەپۋتات ەلدەگى تەرىس يسلامدىق سالافيتتىك اعىم ۇلتتىق جانە مەملەكەتتىك مۇددەگە قاتەر ءتوندىرىپ تۇرعانى تۋرالى وتكەن اپتادا جولدانعان دەپۋتاتتىق ساۋالدار ەرىككەننىڭ ەرمەگى ەمەس ەكەنىن ايتىپ, قازاقستان قوعامىنا دەڭدەپ ەنىپ بارا جاتقان ءتۇرلى «يزمدەردىڭ» الدىن الۋ ءۇشىن جاندارمەن ازاماتتىق الاڭداۋشىلىقتان تۋىنداعان ارەكەت ەكەنىن ايتتى.
«مەملەكەتىمىزدىڭ تۇتاستىعى مەن قاستەرلى ءدىلىن, ۇرپاعىمىزدىڭ بولاشاعىن قاتەرگە بايلاپ بەرە المايمىز. ءبىز ۇلتتىق قادىر-قاسيەتىمىزدى ساقتايمىز دەسەك, مەملەكەتتىڭ ىشىنە ىرىتكى سالعان جات ءدىني اعىمدى سانادان دا, اۋىل-قالادان دا قۋىپ شىعۋعا مىندەتتىمىز. بىراق دەپۋتاتتاردىڭ دابىلىن «يسلام دىنىنە قارسى شىقتى» دەپ الدەكىمدەر الەۋمەتتىك جەلىدە ءوڭىن اينالدىرىپ, دابىرا سالىپ ءجۇر. ەسكەرتەيىن, ءبىز يسلامعا, ەلدەگى ءابۋ حانيفا ءماسحابىنا قارسى ەمەسپىز, سالافيزم-ۋاحابيزم سالاسىنا قارسىمىز», دەدى ەرمۇرات باپي.
پرەمەر-ءمينيستردىڭ ورىنباسارى تامارا دۇيسەنوۆا دەپۋتاتتاردىڭ ۇسىنىستارىن قولدايتىنىن جەتكىزدى.
«تامىز ايىنان بەرى وسى ماسەلەمەن شۇعىلدانۋدى باستاپ, تەولوگتاردى, ءدىني بىرلەستىكتەر وكىلدەرىن شاقىردىم. ولاردىڭ دا ويلارى سىزدەرمەن مازمۇنداس, ۇسىنىستاردى ولار دا قولداپ وتىر», دەگەن ۆيتسە–پرەمەر ت.دۇيسەنوۆا: «بىرىنشىدەن, الەۋمەتتىك جەلىلەردە ءارتۇرلى دىندەردى ناسيحاتتايتىن كونتەنتتەرگە توسقاۋىل قويا الماي وتىرمىز. ەكىنشىدەن, ءبىزدىڭ قوعامدا ءدىني ساۋاتتىلىقتىڭ تومەندىگى ايقىن بايقالىپ وتىر. ءتىپتى, مەملەكەتتىك ورگانداردا وسى جۇمىستاردى رەتتەيتىن ۇيىمداردا ءھام ۇيىمداستىرۋ جۇمىستارىندا ءالى شالالىقتار بار. مەكتەپتەگى حيدجاب ماسەلەسىندە مەملەكەتتىك ورگانداردىڭ تولىق جاۋاپ بەرمەۋى ۇلكەن پىكىر-تالاسقا الىپ كەلدى», دەدى.
ونىڭ سوزىنشە, زاڭعا وزگەرىستەر ەنگىزىلەدى. زەردەلەۋ بارىسىندا شەتەل تاجىريبەلەرى دە سارالانعان.
«بۇگىندە بۇل ۇلكەن ماسەلەگە اينالىپ وتىر. ساۋد ارابياسىنىڭ وزىندە دە ءدىني بىرلەستىكتەردى مەملەكەتتىك رەتتەۋ فۋنكتسيالارى كۇشەيتىلىپ جاتىر. زاڭعا وزگەرىس ەنگىزۋ كەرەك. مەملەكەتتىڭ زايىرلى قاعيداتتارىن نىعايتۋ جانە ءدىني بىرلەستىكتەردىڭ مەملەكەتتىك رەتتەۋ ماسەلەلەرىن كۇشەيتۋگە وزگەرىس ەنگىزۋىمىز قاجەت», دەدى تامارا دۇيسەنوۆا.
