بيىل «تاۋەلسىزدىك ۇرپاقتارى» گرانتى بويىنشا 3 ملن تەڭگەدەن 30 جوبا قارجىلاندىرىلادى. ماقسات – بەلسەندى شىعارماشىل جاستار قاۋىمداستىعىن قالىپتاستىرۋعا باعىتتالعان جاستاردىڭ جاڭا جانە قولدانىستاعى باستامالارىن مەملەكەت تاراپىنان قولداۋ.
– گرانتتار 5 باعىت بويىنشا ۇلەستىرىلەدى. اشىپ ايتساق, عىلىمي جوبالار مەن زەرتتەۋلەردى ىسكە اسىرۋ ءۇشىن «عىلىم» سالاسىنا, ەلىمىزدىڭ مادەني مۇراسىن, ءداستۇر مەن ونەردى ىلگەرىلەتۋ ماقساتىنداعى جوبالار ءۇشىن «مادەنيەت» سالاسىنا, جاڭا IT شەشىمدەر مەن جوبالاردى, ونىڭ ىشىندە جاڭادان باستالعان ستارتاپ باستامالاردى ىسكە اسىرۋعا «اقپاراتتىق تەحنولوگيالار» باعىتىنا, ەكونوميكانىڭ باسىم سەكتورلارىندا جاڭا بيزنەس-يدەيالاردى ىسكە اسىرۋدا «بيزنەس», جاستار ءۇشىن تانىمدىق, پايدالى, قىزىقتى كونتەنت قۇرۋ جونىندەگى جوبالارعا ارنالعان «مەديا» سالاسىنداعى ۇزدىك جوبالارعا بەرىلەدى. ۇمىتكەرلەردىڭ كونكۋرستىق وتىنىمدەرى 26 قاراشاعا دەيىن ەلەكتروندىق نۇسقادا t.urpaktary2023@gmail.com پوشتاسى ارقىلى قابىلدانادى, – دەدى مادەنيەت جانە اقپارات مينيسترلىگى جاستار جانە وتباسى ىستەرى كوميتەتى توراعاسىنىڭ ورىنباسارى روللان قۇسپان.
بايقاۋ ەكى كەزەڭنەن تۇرادى. باستاپقىدا ۋاكىلەتتى ورگان كونكۋرستىق وتىنىمدەردى قابىلداسا, كەيىن وتىنىمدەر باعالانىپ, كىل مىقتىلار انىقتالادى. قازىلار القاسى قۇرامىندا ورتالىق اتقارۋشى ورگاندار, ازاماتتىق قوعامنىڭ وكىلدەرى, عالىمدار جانە گرانت باعىتتارى بويىنشا ماماندار مەن ساراپشىلار بولادى. كونكۋرستىق كوميسسيا مۇشەلەرىنىڭ سانى 5 ادامنان كەم بولمايدى.
«كونكۋرس جەڭىمپازى مىندەتتى تۇردە ارنايى گرانتتى اۋدارۋ ءۇشىن ەكىنشى دەڭگەيدەگى بانكتەردە جەكە شوت اشادى جانە ۋاكىلەتتى ورگان كونكۋرس قورىتىندىلارى تۋرالى حاتتاما نەگىزىندە بانك شوتىنىڭ ءنومىرىن ۇسىنعاننان كەيىن گرانت الۋشىمەن شارت جاساسادى. گرانت جەڭىپ العان ادام ءۇش ايدا ءبىر رەت جوبانىڭ ىسكە اسىرىلۋ بارىسى تۋرالى ۋاكىلەتتى ورگانعا ەسەپ ۇسىنادى. ۋاكىلەتتى ورگان كۇنتىزبەلىك ءبىر جىل ىشىندە گرانت قارجىسىنىڭ ماقساتتى پايدالانىلۋىن قاداعالايدى. ەگەر جەڭىمپاز گرانتتى ماقساتتى تۇردە پايدالانباسا, ۋاكىلەتتى ورگان ودان گرانت اقشاسىن قايتارۋدى تالاپ ەتۋگە قۇقىلى. گرانت الۋشى قاراجاتتى ۋاكىلەتتى ورگاننان حابارلاما العان كۇننەن باستاپ كۇنتىزبەلىك 30 كۇن ىشىندە قايتارۋعا ءتيىس. بەلگىلەنگەن مەرزىمدە قايتارماعان جاعدايدا, ولار زاڭناماعا سايكەس ءوندىرىپ الىنادى» دەلىنگەن «تاۋەلسىزدىك ۇرپاقتارى» گرانتىن بەرۋ قاعيدالارىن بەكىتۋ تۋرالى قۇجاتتا.
بۇدان بولەك, جەرگىلىكتى اتقارۋشى ورگاندارى دا «تاۋەلسىزدىك ۇرپاقتارى» گرانتىن تاعايىندايدى. اكىمدىكتەردىڭ اقپاراتىنا سايكەس, بۇگىندە ايماقتاردا 226 گرانت بەرۋ كوزدەلگەن. ازىرگە 70-ءى عانا بەرىلگەن.
– اتاپ ايتقاندا, جەتىسۋ وبلىسىندا حالىقارالىق جاستار كۇنىنە وراي 10 جوبا ۇزدىك اتانىپ, ءاربىر جوباعا 3 ملن تەڭگە مولشەرىندە گرانت بەرىلدى. ۇلىتاۋ وبلىسىندا عىلىم, مادەنيەت, اقپاراتتىق تەحنولوگيالار, بيزنەس, مەديا باعىتتارى بويىنشا 43 جاس ادامعا 1 ملن تەڭگە مولشەرىندە گرانت تابىستالدى. سونداي-اق قوستاناي وبلىسىنىڭ جاستارىنا 12 گرانت: 7 گرانت – 700 مىڭ تەڭگە, 4 گرانت – 500 مىڭ تەڭگە, 1 گرانت 200 مىڭ تەڭگە مولشەرىندە بەرىلسە, قىزىلوردا وبلىسىنىڭ 5 جاس ءوز جوبالارىن ىسكە اسىرۋ ءۇشىن 300 مىڭ تەڭگە مولشەرىندە گرانت جەڭىمپازى اتاندى. جىل اياعىنا دەيىن جاستارعا 156 گرانت بەرۋ جوسپارلانىپ وتىر. ونىڭ ىشىندە اقتوبە وبلىسىنا – 30, ماڭعىستاۋ وبلىسىنا – 25, پاۆلودار وبلىسىنا – 20, جامبىل وبلىسىنا – 15, الماتى قالاسىنا – 13, اقمولا – 11, الماتى, اتىراۋ جانە باتىس قازاقستان وبلىستارى – 10 گرانتتان, شىعىس قازاقستان وبلىسىنا – 7, شىمكەنت قالاسىنا 5 گرانت بولىنەدى, – دەدى روللان قۇسپان.
بىلتىر مەملەكەت ۇسىنعان مۇمكىندىكتى قالت جىبەرمەي, وتىنىشتەرىن جولداعاندار اراسىنان 33 ازامات جەڭىمپاز اتاندى. وسىلايشا, «عىلىم», «مادەنيەت», «اقپاراتتىق تەحنولوگيالار», «مەديا» باعىتى بويىنشا 6 جوبادان, ال «بيزنەس» سالاسىندا 9 ۇزدىك جوبا قارجىلاندىرىلعان.
داريعا قۇرمانالى,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
