ون توعىز جاستاعى ەكى بويجەتكەنگە الدىن الا ءسوز بايلاسقان ءبىر توپ اداممەن بىرىگىپ اسا ءىرى كولەمدەگى ەسىرتكى زاتتارىن زاڭسىز يەمدەنگەن, تاسىمالداعان, ساقتاعان, ونى ەلەكتروندى اقپارات كوزدەرى ارقىلى ساتپاق بولعان دەگەن ايىپ تاعىلىپ وتىر. سوت ولاردىڭ وتكەن جىلدىڭ قىركۇيەگى مەن وسى جىلدىڭ قاڭتارى ارالىعىنداعى كەزەڭدە قوستاناي الەۋمەتتىك-تەحنيكالىق كوللەدجىنىڭ 3-كۋرسىندا وقي ءجۇرىپ, ەسىرتكى زاتتارىن زاڭسىز يەمدەنگەنىن, ساقتاعانىن جانە ونى ساتۋ ءۇشىن قوستاناي قالاسىنىڭ ءار بۇرىشىنا تاسىمالداپ, الدىن الا بەلگىلەنگەن قۇپيا ورىندارعا جاسىرىپ قويىپ كەتىپ وتىرعانىن انىقتادى.
كوللەدج ستۋدەنتتەرى انگەلينا انتيپەنكو مەن اناستاسيا ساۆوستيانوۆا بىرگە پاتەر جالداپ تۇرعان. ارنايى سايت ارقىلى بەيتانىس وپەراتورمەن بايلانىسقان انگەلينا وعان جەكە كۋالىگىندەگى مالىمەتتەرىن ءوزى جىبەرىپ, ەسىرتكى تاسىمالداۋمەن اينالىسۋعا كەلىسىم بەرگەن. ودان كەيىن بۇل ىسىنە قۇربىسى اناستاسيانى تارتقان. بويجەتكەندەردىڭ وزدەرىنىڭ ايتۋىنشا, ولاردى مۇنداي اۋىر قىلمىسقا بارۋعا بۇرىن وزدەرىمەن بىرگە تۇرعان ماريا ەرماكوۆا ەسىمدى بويجەتكەن يتەرمەلەگەن. قارىزعا العان ازىق-ت ۇلىگى مەن كوممۋنالدىق قىزمەت اقىسىن تولەي الماي تىعىرىققا تىرەلگەن ستۋدەنتتەر ماريا ەرماكوۆانىڭ «سەندەردى ەشكىم ەشقاشان ۇستاي المايدى, قايتا قارىزدارىڭنان قۇتىلىپ, پايدا تاباسىڭدار», دەگەن سوزىنە سەنىپ, كەلىسىم بەرگەن كورىنەدى.
وسىلايشا, بەيتانىس وپەراتور ەكى ستۋدەنتكە حابارلاما ارقىلى ەسىرتكى جاسىراتىن ورىندى كورسەتەدى. تاپسىرمانى ورىنداعان سوڭ قىزدار وزدەرى ەسىرتكى جاسىرعان ورىندى سۋرەتكە ءتۇسىرىپ, سكرينشوتىن الگى وپەراتورعا جىبەرىپ وتىرعان. ستۋدەنتتەر اتقارعان جۇمىستىڭ ارقايسىسى مىڭ تەڭگەدەن ءبىر جارىم مىڭ تەڭگەگە دەيىن باعالانعان. انتيپەنكو مەن ساۆوستيانوۆا ءبىرازدان سوڭ بۇل «بيزنەستەن» باس تارتپاق بولعان ەكەن, الايدا ولاردىڭ الەۋمەتتىك جەلى ارقىلى جۇمساپ, تابىسقا كەنەلتىپ وتىرعان «جارىلقاۋشىسى» «ورمانعا اپارىپ كومىپ كەتەمىز, جاقىن تۋىستارىڭدى جازالايمىز», دەپ قورقىتقان.
پوليتسيا ستۋدەنتتەردى 2023 جىلدىڭ 11 قاڭتارىندا كوپقاباتتى ءبىر ءۇيدىڭ كىرەبەرىسىنە ەسىرتكى جاسىرىپ جاتقان جەرىنەن ۇستادى. بويجەتكەندەر ەسىرتكىنى كوبىنە وسىنداي كوپقاباتتى ۇيلەردىڭ كىرە بەرىسىنىڭ كوزدەن تاسا ءبىر بۇرىشىنا نەمەسە پوشتا جاشىگىنىڭ ىشىنە تاستاپ كەتىپ وتىرعان.
قىزداردىڭ جەكە باسىن ءتىنتۋ بارىسىندا ا.ساۆوستيانوۆانىڭ ۇستىندەگى كۇرتەنىڭ وڭ قالتاسىنان – 20, سول قالتاسىنان 30 تۇيىنشەك اق ءتۇستى ۇنتاق زات شىققان. ودان كەيىن ستۋدەنتتەر تۇرىپ جاتقان جالدامالى پاتەرگە ءتىنتۋ جۇرگىزگەن پوليتسيا سالماعى 100 گر «مەفەدرون» ەسىرتكىسى سالىنعان پلاستيكالىق تارەلكە, ەلەكتروندى تارازى, ەكى ۇيالى تەلەفون, بارسەتكاعا سالىنعان 12 تۇيىنشەك ەسىرتكى جانە ەسىرتكى سالۋعا ىڭعايلى كوپتەگەن ZIP پاكەتىن تاپقان.
وبلىستىق پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ اعا جەدەل ۋاكىلى, پوليتسيا پودپولكوۆنيگى ايگۇل ەرادىلوۆانىڭ ايتۋىنشا, سوتقا دەيىنگى تەرگەۋ جۇمىستارى بارىسىندا ستۋدەنتتەر جالداپ تۇرعان پاتەردەن تاركىلەنىپ الىنعان ايعاقتاردىڭ «يدەيا» ينتەرنەت دۇكەنىنەن ساتىپ الىنعانى انىقتالعان. بۇل زاتتاردى بەلگىسىز بىرەۋلەر پەتروپاۆل قالاسىنداعى قۇپيا ورىندارعا قالدىرىپ كەتىپ وتىرعان. ودان ءارى «يدەيا» تەلەگرام دۇكەنى ارقىلى وزگە وڭىرلەرگە تاراتپاق بولعان. قوستانايدا تارالعان ەسىرتكى – سونىڭ ءبىر ۇشىعى عانا.
اشىق سوت وتىرىسىندا پروكۋرور سوتتالۋشىلارعا 11 جىل باس بوستاندىعىنان ايىرۋ جازاسىن تاعايىنداۋدى سۇراعان. الايدا قىلمىستىق جاۋاپكەرشىلىكتى جەڭىلدەتەتىن بىرقاتار جايتتى ەسكەرگەن سوت بويجەتكەندەردى 10 جىلعا باس بوستاندىعىنان ايىرۋ تۋرالى ۇكىم شىعاردى. سوت ۇكىمى ءالى زاڭدى كۇشىنە ەنە قويعان جوق.
پوليتسيا دەپارتامەنتىنىڭ مالىمەتىنشە, ەسىرتكى قىلمىسىنا قارسى كۇرەس باسقارماسىنىڭ قىزمەتكەرلەرى جىل باسىنان بەرى زاڭسىز ەسىرتكى اينالىمىنا قاتىستى 237 قىلمىستى انىقتاپ, 340 كگ ەسىرتكى زاتتارىن تاركىلەگەن.
قوستاناي وبلىسى
