جەراستى دۇمپۋلەرى كورشىلەس بادعيس جانە فاراح پروۆينتسيالارىندا دا سەزىلگەن. ءتىپتى مۇنى تۇرىكمەنستان استاناسى اشحاباد تۇرعىندارى دا اڭعارعان. اقش گەولوگيالىق قىزمەتىنىڭ مالىمەتىنشە, گەراتتا جويقىن سىلكىنىس بىرنەشە رەت 8 مينۋتتىق جيىلىكپەن قايتالانعان. جەراستى دۇمپۋلەرىنىڭ ماگنيتۋداسى 4,6-دان 6,3 بالعا دەيىن تىركەلگەن. ال تەرەڭدىگى شامامەن 10 شاقىرىم بولعان. سوڭعى دەرەك بويىنشا اپات سالدارىنان 1300-دەن اسا ءۇي قيراعان.
تابيعي اپاتتارعا قارسى كۇرەس مينيسترلىگىنىڭ وكىلدەرى سوڭعى افتەرشوك 70 مىڭ حالقى بار زيندا جان قالاسىنىڭ سولتۇستىك-شىعىسىنان 30 شاقىرىم جەردە تىركەلگەنىن ايتتى. ءزىلزالادان اۋدانداعى ءتورت ەلدى مەكەن قاتتى زارداپ شەككەن. دۇنيەجۇزىلىك دەنساۋلىق ساقتاۋ ۇيىمى وڭىرگە جاراقاتتانعانداردى اۋرۋحاناعا ەۆاكۋاتسيالاۋ ءۇشىن 12 جاردەم كولىگىن جىبەرگەن. مارقۇمدار مەديتسينالىق مەكەمەلەر مەن اسكەري بولىمدەرگە جەتكىزىلىپ جاتىر.
قازىر پروۆينتسيادا تەلەفون بايلانىسى ءۇزىلىپ, زارداپ شەككەن اۋدانداردان تولىق اقپارات الۋ قيىنعا سوعىپ تۇر. تالاي تۇرعىن ۇيىندىلەردىڭ استىنان ءالى شىعارىلعان جوق. وڭىردە ءالى ىزدەستىرۋ-قۇتقارۋ جۇمىستارى ءجۇرىپ جاتىر. وسى ورايدا اۋعانستان بيلىگى وزگە مەملەكەتتەر مەن حالىقارالىق ۇيىمداردان كومەك سۇرادى. بۇل تۋرالى تابيعي اپاتتارعا قارسى كۇرەس مينيسترلىگىنىڭ رەسمي وكىلى جانان سايك مالىمدەدى.
«زارداپ شەككەندەرگە ءدارى-دارمەكتەر, قاجەتتى زاتتار, شاتىرلار ءالى دە جەتىسپەي جاتىر. ءبىز جويقىن جەر سىلكىنىسىنىڭ زاردابىن مەيلىنشە ازايتۋ ءۇشىن ۇلتتىق جانە حالىقارالىق ۇيىمداردان, وزگە مەملەكەتتەردەن قولدان كەلگەنشە كومەك كورسەتۋدى سۇرايمىز. ءار ەلدى قابىلداپ, قارسى الامىز», دەدى جانان سايك.
مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس قازاقستان الاپات جەر سىلكىنىسى بولعان اۋعانستانعا شۇعىل گۋمانيتارلىق كومەك جىبەرۋدى ۇيعاردى. بۇل ماسەلە ۇكىمەتتىك كوميسسيانىڭ وتىرىسىندا تالقىلاندى. ءزىلزالادان زارداپ شەككەندەرگە ازىق-ت ۇلىك تاۋارلارى, شاتىرلار, ءدارى-دارمەكتەر, كيىم-كەشەك جانە باسقا دا قاجەتتى زاتتار جىبەرىلەدى. جۇكتەر جاقىن ارادا اۋە جانە تەمىرجول كولىگىمەن جونەلتىلەدى. سونداي-اق ۇيىندىلەر استىندا قالعان ادامداردى قۇتقارۋ ءۇشىن توتەنشە جاعداي مينيسترلىگىنىڭ قۇتقارۋشىلارى, سونىڭ ىشىندە كينولوگ ماماندار دا بارماقشى.
سەيسميكالىق وقيعالاردىڭ وشاعى گەراتتا 272 مىڭ حالىق بار. ەل بيلىگى بۇل ءزىلزالانى كەيىنگى 20 جىلداعى ەڭ قاۋىپتىسى دەيدى. جەرگىلىكتى بيلىك ايماقتا ىزدەۋ-قۇتقارۋ جۇمىستارى ءالى اياقتالماعانىن ايتادى. سوندىقتان گەرات دەنساۋلىق ساقتاۋ دەپارتامەنتى وكىلى قازا تاپقانداردىڭ سانى ارتۋى مۇمكىن دەپ بولجاپ وتىر. جالپى, اۋعانستان حالقى جەر سىلكىنىسىنەن ءجيى زارداپ شەگەدى. وتكەن جىلدىڭ ماۋسىم ايىندا پاكتيكا ايماعىندا 5,9 بالدىق ءزىلزالادان مىڭنان استام ادام قازا تاۋىپ, ونداعان مىڭ حالىق باسپاناسىز قالعان ەدى.
اۋعانستانداعى جەر سىلكىنىسىنەن قازاقستان ازاماتتارى زارداپ شەككەن جوق. بۇل تۋرالى بريفينگتە سىرتقى ىستەر مينيسترلىگىنىڭ رەسمي وكىلى ايبەك سمادياروۆ مالىمدەدى.
«ديپلوماتتارىمىز زارداپ شەككەن جوق. ەلشىلىك اۋعانستان استاناسى كابۋل قالاسىندا ورنالاسقان. استاناسىندا ايتارلىقتاي تەربەلىس بولا قويمادى. زارداپ شەككەندەر مەن قازا بولعاندار اراسىنداعى قازاقستان ازاماتتارى تۋرالى اقپارات تا كەلىپ تۇسپەدى. ەشقانداي ءوتىنىش بولمادى. ەگەر قانداي دا ءبىر ءوتىنىش بولسا, جەدەل حابارلايمىز. وسى قيىن ساتتە قازا بولعاندار مەن زارداپ شەككەندەردىڭ وتباسىلارىنا, سونىمەن قاتار بۇكىل اۋعان حالقىنا شىن جۇرەكتەن كوڭىل ايتامىز. اۋعانستاننىڭ جاراقات العان بارلىق ازاماتىنا تەزىرەك ساۋىعىپ كەتۋىن تىلەيمىز», دەدى ايبەك سمادياروۆ.
