كولىك مينيسترلىگى اۆتوموبيل جولدارى كوميتەتىنىڭ توراعاسى تولەگەن ابدۋللين مينيسترلىك پەن اكىمدىكتەر ازىرلەگەن ءىس-قيمىل جوسپارىن باياندادى.
قازاقستانداعى جەرگىلىكتى ماڭىزى بار اۆتوجولدار مەن ەلدى مەكەندەر كوشەلەرىنىڭ جالپى ۇزىندىعى 131 مىڭ شاقىرىمدى قۇرايدى, ونىڭ 70 مىڭ شاقىرىمى – وبلىستىق جانە اۋداندىق جولدار.
بيىل جەرگىلىكتى ماڭىزى بار اۆتوجولدار مەن ەلدى مەكەن كوشەلەرىن كۇتىپ ۇستاۋعا جەرگىلىكتى بيۋدجەتتەن 76 ملرد تەڭگە ءبولىندى. 270 ارنايى كوممۋنالدىق مەكەمە تارتىلدى. ارنايى تەحنيكانىڭ 9,6 مىڭ بىرلىگى مەن 22 مىڭ جول قىزمەتكەرىن جۇمىلدىرۋ كوزدەلگەن.
قىس مەزگىلىندە قاۋىپسىز جانە ۇزدىكسىز جول قوزعالىسىن قامتاماسىز ەتۋ ءۇشىن 13 مىڭ توننا جانار-جاعارماي جانە 332 مىڭ توننا كوكتايعاققا قارسى ماتەريالدار ازىرلەندى. اتاپ ايتقاندا, 51 مىڭ توننا تۇز, 141 مىڭ توننا قۇم, 139 مىڭ توننا ۇنتاق, 804 توننا رەاگەنت, 2,3 مىڭ توننا بەنزين, سونداي-اق 10,3 مىڭ توننا ديزەل وتىنى.
كولىك مينيسترلىگىنە قاراستى اۆتوموبيل جولدارى كوميتەتىنىڭ توراعاسىنىڭ ايتۋىنشا, وبلىستار مەن الماتى جانە شىمكەنت قالالارىنىڭ اكىمدىكتەرى ءىىم جانە تجم اۋماقتىق بولىمشەلەرىمەن كەلىسىلگەن جول كارتالارىن بەكىتتى. قازىرگى ۋاقىتتا وڭىرلەردە وسى باعىتتاعى جۇمىستار كۇشەيتىلگەن.
كەڭەس قورىتىندىسى بويىنشا پرەمەر-ءمينيستردىڭ ءبىرىنشى ورىنباسارى قاجەتتى قاراجاتتى قاراستىرا وتىرىپ, اۆتوموبيل جولدارىن دايىنداۋعا باقىلاۋدى كۇشەيتۋ بويىنشا بىرقاتار تاپسىرما بەردى. ىشكى ىستەر جانە توتەنشە جاعدايلار مينيسترلىكتەرىنە قولايسىز كۇن رايى جاعدايلارىندا كولىك قۇرالدارىنىڭ قاۋىپسىز جانە ۇزدىكسىز ءجۇرۋىن قامتاماسىز ەتۋ بويىنشا اۋماقتىق بولىمشەلەر مەن جەرگىلىكتى اتقارۋشى ورگانداردىڭ ءوزارا ءىس-قيمىلىنىڭ ناقتى الگوريتمىن بەلگىلەۋ تاپسىرىلدى.
