نورۆەگيالىق نوبەل كوميتەتى تەگەرانداعى ەۆين تۇرمەسىندەگى نارگيز ءموحامماديدى بەيبىتشىلىك بويىنشا نوبەل سىيلىعىنا لايىقتى دەپ ۇيعاردى. لاۋرەات 2016 جىلى ءولىم جازاسىن الىپ تاستاۋدى جاقتايتىن قۇقىق قورعاۋ قوزعالىسىن باسقارعانى ءۇشىن ءوز ەلىندە 16 جىلعا باس بوستاندىعىنان ايىرىلعان ەدى. 2020 جىلى بوساتىلعانىمەن, 2021 جىلدىڭ سوڭىنا قاراي قايتادان تۇرمەگە قامالعان.
كىل مىقتىلاردى شۆەتسيا كورولدىك عىلىم اكادەمياسى, شۆەتسيا اكادەمياسى, كارولين ينستيتۋتى جانە نورۆەگيالىق نوبەل كوميتەتى التى ءتۇرلى سالا بويىنشا تاڭدايدى. سىيلىق فيزيكا, حيميا, ادەبيەت, مەديتسينا, ەكونوميكا جانە بەيبىتشىلىك بويىنشا ەڭ تابىستى دەپ تانىلعان تۇلعالارعا نەمەسە ۇيىمدارعا بەرىلەدى.
بيىل فيزيكا سالاسىندا نوبەل سىيلىعى اتومدار مەن مولەكۋلالارداعى ەلەكترونداردى زەرتتەگەن عالىمدارعا بۇيىرعان. وگايو ۋنيۆەرسيتەتىنەن (اقش) پەر اگوستيني, ماكس پلانك ينستيتۋتىنان فەرەنتس كراۋس جانە ميۋنحەندەگى ليۋدۆيگ-ماكسيميليان ۋنيۆەرسيتەتىنەن (گەرمانيا) جانە لۋند ۋنيۆەرسيتەتىنەن (شۆەتسيا) ەنن ل-يۋلە نوبەل سىيلىعىنىڭ لاۋرەاتتارى اتاندى.
ال فيزيولوگيا نەمەسە مەديتسينا بويىنشا حالىقارالىق سىيلىق ماجار بيوحيميگى مەن امەريكالىق ازاماتقا پاندەميا كەزىندە «Pfizer» جانە «Moderna» ۆاكتسينالارىن جاساۋعا سەپ بولعان تەحنولوگياسى ءۇشىن بەرىلگەن.
«كاتالين كاريكو مەن دريۋ ۆايسماننىڭ اشقان جاڭالىقتارى 2020 جىلدىڭ باسىنداعى پاندەميا كەزىندە COVID-19-عا قارسى ءتيىمدى مرنق ۆاكتسينالارىن جاساۋدا شەشۋشى ءرول اتقاردى», دەدى نوبەل كوميتەتى.
ادەبيەت بويىنشا نوبەل سىيلىعىن نورۆەگ جازۋشىسى يۋن فوسسە الدى. ماراپات اۆتوردىڭ شىعارمالارىندا سويلەۋ قۇقىعىنان ايىرىلعان ادامداردىڭ ىشكى داۋىسىنا ەرەكشە نازار اۋداراتىنى ءۇشىن ۇسىنىلعان. ونىڭ ەڭ العاش 1983 جىلى «قىزىل, قارا» پروزاسى كوپشىلىككە جول تارتقان. بۇگىندە روماندارى الەمنىڭ بىرنەشە تىلىنە اۋدارىلعان. تەاتر ساراپشىلارىنىڭ سوزىنشە, فوسسە شىعارمالارىنىڭ سيۋجەتىن كەيىپكەرلەردىڭ كۇشىنە ەمەس, وزىنە سەنىمسىزدىگى, ولىمنەن قورقۋى, كۇماندانۋى سىندى ءالسىز تۇستارىنا نەگىزدەپ قۇرايدى.
«فوسسە – ەۋروپا تەاترلارىندا ەڭ سۇرانىسقا يە دراماتۋرگتەردىڭ ءبىرى. ونىڭ مودەرنيزمگە جاقىن تۋىندىلارى, ادامنىڭ ىشكى ۇرەيىنە نەگىزدەلگەن پەسالارى تانىمال بولۋىنا ىقپال ەتتى», دەدى نوبەل كوميتەتىنىڭ ادەبيەت باعىتى بويىنشا توراعاسى اندەرس ولسسون.
كۆانتتىق نۇكتەلەردى اشۋعا جانە سينتەزدەۋگە قاتىسقان ءۇش عالىم حيميا سالاسى بويىنشا ۇزدىك دەپ تانىلدى. وسىلايشا, نوبەل سىيلىعىن امەريكا عالىمدارى مۋنگي باۆەندي, لۋيس بريۋس جانە رەسەيلىك الەكسەي ەكيموۆ الدى.
ەندى ەكونوميكا بويىنشا سىيلىق بۇگىن بەلگىلى بولادى. سالتاناتتى ماراپاتتاۋ ءراسىمى ءداستۇر بويىنشا نوبەل ومىردەن وتكەن كۇنى 10 جەلتوقساندا ۇيىمداستىرىلادى. سىيلىقاقى سوماسى 11 ميلليون شۆەد كرونىن قۇرايدى.
