ىرگەتاسى 1911 جىلى قالانعان پلزەن قالاسىنىڭ كومانداسى – ءوز ەلىنىڭ داڭقتى ۇجىمدارىنىڭ ءبىرى. اتالعان كلۋبتىڭ اكادەمياسىنان 2003 جىلعى «التىن دوپ» يەگەرى پاۆەل نەدۆەد, ءوز زامانىندا الەمنىڭ ەڭ ۇزدىك قاقپاشىلارىنىڭ ءبىرى بولعان پەتر چەح جانە تاعى باسقا تانىمال فۋتبولشىلار تۇلەپ ۇشقان. ءبىر عاسىردان اسا تاريحى بار «ۆيكتوريا» 1990 جىلدان بەرى چەحيا چەمپيوناتىندا التى مارتە توپ جارىپ, ەكى مارتە چەحيا كۋبوگى مەن سۋپەركۋبوگىن جەڭىپ العان. سونىمەن قاتار جىل سايىن ەۋروكۋبوكتىڭ ءارتۇرلى ليگالارىندا توپتىق كەزەڭدە ويناپ كەلەدى.
ەلوردالىق ۇجىم بۇعان دەيىن چەحيا كوماندالارىمەن ءتۇرلى تۋرنيرلەردە ويناعانىمەن, «ۆيكتوريا» كلۋبىمەن العاش رەت جاسىل الاڭدا جولىقتى. دەگەنمەن چەحيالىقتار ءبىر ماۋسىمدا ءۇشىنشى رەت قازاقستان كوماندالارىمەن جولدارى ءتۇيىسىپ وتىر. ەڭ وكىنىشتىسى, سونىڭ بارلىعىندا دا پلزەن كومانداسىنىڭ باعى جانعان. بيىلعى ەۋروكۋبوك ويىندارىنىڭ ىرىكتەۋ كەزەڭىندە «ۆيكتوريا» قوستانايدىڭ «توبىلىمەن» جولىعىپ, ەكى رەتتە دە جەرلەستەرىمىزدى قاپى قالدىرىپ كەتتى. قوستانايدا وتكەن العاشقى ماتچتا قوناقتار 1:2 ەسەبىمەن جەڭىسكە جەتسە, ءوز الاڭىنداعى قارىمتا ويىندا «توبىلدىڭ» قاقپاسىنا جاۋاپسىز ءۇش گول سوققان ەدى.
كونفەرەنتسيا ليگاسىنىڭ توپتىق كەزەڭىنىڭ جەرەبەسى تارتىلىپ, «ۆيكتوريا» «استانامەن» ءبىر توپقا تۇسكەندە ەل جانكۇيەرلەرى ەلوردالىقتار «توبىلدىڭ» ەسەسىن قايتارادى دەپ كۇتكەن ەدى. وكىنىشكە قاراي, «استانا» فۋتبولشىلارى جانكۇيەرلەر سەنىمىن اقتاي المادى. ءتىپتى كەشەگى ماتچ الدىنداعى ءباسپاسوز ءماسليحاتىندا «استانا» باپكەرى گريگوري بابايان «توبىلدىڭ» جاتتىقتىرۋشى قۇرامىنان «ۆيكتوريانى» «قالاي جەڭۋگە بولادى» دەپ تە اقىل-كەڭەس سۇراعانىن جاسىرماي, جالپاق جۇرتقا جايىپ سالعان ەدى. الايدا ەكى باپكەردىڭ ايلا-ءتاسىلى ءبىر چەحيالىق جاتتىقتىرۋشىنىڭ تاكتيكاسىنان اسىپ كەتە المادى.
20 مىڭعا جۋىق جانكۇيەر تاماشالاعان ەلورداداعى ماتچتى «استانا» فۋتبولشىلارى بەلسەندى باستاپ, ويىننىڭ 21-مينۋتىندا مارين توماسوۆ قارسىلاس كوماندا قاقپاشىسىنىڭ ورەسكەل قاتەلىگىنەن كەيىن كەزدەسۋدىڭ ەسەبىن اشقان ەدى. بىراق ۆار جۇيەسىندە وتىرعان تورەشىلەر باس تورەشىگە توماسوۆتىڭ گولى ويىننان تىس جاعدايدا سوعىلعانىن دەرەۋ ەسكەرتىپ, گولدى ەسەپكە الماي قويدى. ءسويتىپ, ءبىرىنشى تايم تەڭ ەسەپپەن اياقتالدى.
كەزدەسۋدىڭ ەكىنشى بولىگىندە دە گريگوري بابايان شاكىرتتەرى «ۆيكتوريا» قاقپاسىنىڭ ماڭايىنداعى قاۋىپتى شابۋىلدارىن ءبىر ساتكە دە توقتاتقان جوق. 51-مينۋتتا وڭ قاپتالدان قاقپاعا قاراي جۇيتكىپ كەلە جاتقان دەمبو داربو ءبىر قايىرىلىپ الدى دا, دوپتى اشىق تۇرعان توماسوۆقا ۇزاتتى. حورۆاتيالىق لەگيونەر ءوز ادەتىنەن جاڭىلماي, الدىمەن قارسىلاستىڭ ءبىر-ەكى قورعاۋشىسىن الداپ ءوتتى دە, دوپتى قاقپانىڭ وڭ جاق قاپتالىنا قاراي شىرەنە تەپتى. جول-جونەكەي «ۆيكتوريا» قورعاۋشىسىنا تيگەن دوپ باعىتىن وزگەرتىپ, قاقپانىڭ سول جاق بۇرىشىنان تابىلدى – 1:0.
دەگەنمەن, «استانا» جانكۇيەرلەرىنىڭ بۇل قۋانىشى ۇزاققا سوزىلمادى. اينالدىرعان ءۇش مينۋتتىڭ ىشىندە «ۆيكتوريا» فۋتبولشىلارى ەكى گول سوعىپ, تارازى باسىن وزدەرىنە اۋداردى. الدىمەن 54-مينۋتتا توماش حورا دوپتى باسىمەن يوسيپ چوندريچ قورعاعان قاقپاعا ءدال باعىتتاسا, 57-مينۋتتا لۋكاس كالۆاچ ايىپ الاڭىنىڭ سىرتىنان ءدال سوققىمەن كوزگە ءتۇستى. گريگوري بابايان تەڭ ناتيجەگە قول جەتكىزۋ ءۇشىن ەكىنشى تايمدا الاڭعا ابات ايىمبەتوۆ, ماكس ەبونگ سەكىلدى فۋتبولشىلاردى شىعارعانىمەن, ماتچ سوڭىنا دەيىن تابلوداعى كورسەتكىش وزگەرمەدى.
وسىلايشا, قاتارىنان ەكى ماتچتا جەڭىلگەن «استانا» ءوز توبىندا سوقىر ۇپايمەن كوش سوڭىندا قالىپ قويدى. ال العاشقى ەكى تۋردا 100 پايىزدىق ناتيجە كورسەتكەن «ۆيكتوريا» التى ۇپايمەن كوش باستادى. توپتاعى ەكىنشى ويىندا كوسوۆونىڭ «بالكاني» كومانداسى وسى تۋردىڭ سەنساتسياسىن جاساپ, ءوز الاڭىندا حورۆاتيانىڭ «ديناموسىن» 2:0 ەسەبىمەن تىزە بۇكتىردى. «بالكاني» ءبىرىنشى تۋردا «ۆيكتورياعا» جول بەرگەن ەدى – 1:0.
«استانا» توپتىق كەزەڭدەگى كەلەسى ويىنىن 26 قازاندا سىرت الاڭدا كوسوۆونىڭ «بالكاني» ۇجىمىمەن وتكىزەدى. ال زاگرەبتىڭ «ديناموسى» حورۆاتيادا «ۆيكتوريانى» قابىلدايدى.
