شىعىس قازاقستاندا ەگىستىك القاپتارىنىڭ جالپى اۋماعى 639,8 مىڭ گەكتاردى قۇراسا, ونىڭ 290,3 مىڭ گەكتارى – ءداندى جانە بۇرشاقتى داقىلدار. اۋىل شارۋاشىلىعى باسقارماسى ماماندارى بەرگەن ستاتيستيكالىق دەرەكتەرگە كوز جۇگىرتسەك, مايلى داقىلدار 210,9 مىڭ گەكتار جەرگە ەگىلگەن. كۇنباعىس 197,2 مىڭ گەكتاردى الىپ جاتىر. ال قاراقۇمىق – 12,1 مىڭ, كارتوپ – 11,0 مىڭ گەكتار. تەڭىزدەي تولقىعان سارى دالاعا وراق ۋاقتىلى تۇسكەنىمەن, مەرزىمىندە ورىلماي جاتقانى شارۋالاردى الاڭداتادى.
ءداندى جانە بۇرشاقتى داقىلداردىڭ وبلىس بويىنشا 68,1%-ى عانا جينالدى. ورتاشا ونىمدىلىگى – گەكتارىنان 13,84 تسەنتنەر. قازىرگى تاڭدا 273,4 مىڭ توننا استىق باستىرىلدى. بىلتىر ءدال وسى ۋاقىتتا ءداندى داقىلدار تۇگەلدەي دەرلىك ورىلعان ەدى. بيىلعى وراق ماۋسىمىنا تەحنيكا تولىقتاي دايىن بولعانىمەن, كۇن رايى مۇرسات بەرمەدى. وبلىستا 2 338 كومباين بار دەسەك, ونىڭ 355 بىرلىگى – ونىمدىلىگى جوعارى شەتەلدىك كومباين.
اگرونوم مامانداردىڭ پىكىرىنشە, 30 كۇنگە سوزىلعان جاۋىن استىق ساپاسىنىڭ ناشارلاۋىنا, ونىڭ ونۋىنە, جوعارى ىلعالدىلىق پەن رەفاكتسياعا اكەلىپ سوعۋى مۇمكىن ەكەن. دەسە دە, قولدا بار تەحنيكالاردىڭ كومەگىمەن ءتۇسىمدى ساقتاپ قالۋعا تىرىسىپ جاتىر. وبلىس شارۋاشىلىقتارىندا ءارتۇرلى قۋاتتىلىقتاعى 300-دەن اسا مەحانيكالاندىرىلعان استىق تازارتۋ كەشەنى, تاۋلىگىنە 12 مىڭ توننا استىق كەپتىرە الاتىنداي 90 كەپتىرگىش جانە ليتسەنزيالانعان 5 ەلەۆاتور بار.
جاڭبىرلى كۇز اسىرەسە ەگىن شارۋاشىلىعى شالقىپ وتىرعان سامارلىقتارعا قاتتى تيگەن. قازىرگى ۋاقىتتا سامار اۋدانىنىڭ شارۋالارى استىقتىڭ 40 پايىزىن عانا جيناپ ۇلگەرگەن.
– اۋا رايىنىڭ قولايسىزدىعىنا بايلانىستى بۇگىنگى تاڭدا جينالعان استىق ءونىمى 36,7%-دى قۇراپ وتىر. كۇزگى دالا جۇمىستارىنا 1 167 توننا ارزانداتىلعان ديزەل وتىنى ءبولىندى. زاۋىتتىق ساتۋ باعاسى ليترىنە 250 تەڭگەنى قۇرادى, – دەيدى سامار اۋدانىنىڭ اكىمى نۇرلان ماحامبەتوۆ.
سونداي-اق توپىراعى قۇنارلى سامار اۋدانىندا پايدالانىلماي جاتقان 15,5 مىڭ گەكتار جەر مەملەكەت مەنشىگىنە قايتارىلدى. الداعى ۋاقىتتا تاعى دا 20 مىڭ گەكتار جەردى قايتارۋ جوسپاردا بار ەكەن. يگەرىلمەي جاتقان جەرلەر مەملەكەت مەنشىگىنە قايتارىلسا, شارۋالار ءۇشىن دە ءتيىمدى بولماق. ولاي دەيتىنىمىز, الاقانداي سامار اۋدانىندا 428 شارۋا قوجالىعى بار. سولارعا تەڭدەي ءبولىپ بەرىلسە, قوجالىق كوشى ىلگەرىلەي تۇسەر ەدى. ايتپەسە, جايىلىمدىق جەر مەن شابىندىقتان دا تارشىلىق كورىپ وتىرعان ازاماتتار بار. ايتقانداي, اۋىلشارۋاشىلىق ۇسىنعان ەسەپ-قيساپتا جوسپارداعى ءشوپتىڭ 91,9%-ى ازىرلەنىپتى. ال سۇرلەم مەن سابان ازىرلەۋدە مەجەلى جوسپاردىڭ جارتىسىنا عانا جەتكەن.
وراق ماۋسىمىنا دەپ 8,5 مىڭ توننا جەڭىلدەتىلگەن ديزەل وتىنىنا شارۋالار ءوتىنىم بەرگەن. قازىرگى تاڭدا شىلدە جانە تامىز ايلارىنا بولىنگەن ديزەل وتىنىنىڭ كولەمى تولىق يگەرىلدى. وبلىس بويىنشا جەڭىلدىكتى ديزەل وتىنىنىڭ ورتاشا باعاسى 1 ليتر ءۇشىن 250 تەڭگەنى قۇراپ وتىر. سونىمەن قاتار ەگىن جيناۋ جۇمىستارىنا 10 مىڭ توننا كولەمىندە جەڭىلدىكتى ديزەل وتىنىنا سۇرانىس حاتتار جولداندى. ءداندى جانە مايلى داقىلداردى كەپتىرۋ ءۇشىن 7 مىڭ توننا ديزەل وتىنى بولىنگەن. دەمەك تەحنيكالار ساقاداي ساي, ديزەل وتىنى جەتكىلىكتى. تەك اۋا رايى اشىق تۇرسا, قالعان ەگىن تولىقتاي ورىلۋعا ءتيىس.
شىعىس قازاقستان وبلىسى
