پرەزيدەنت «التى الاشتىڭ بالاسى باس قوسسا, ءتور – مۇعالىمدىكى» دەگەن ماعجان جۇماباەۆتىڭ ءسوزىن ايتا كەلە, حالقىمىز كەلەشەكتىڭ كىلتى – بىلىمدە ەكەنىن تەرەڭ تۇسىنگەنىن, سول سەبەپتى ۇستازدى ەرەكشە قادىرلەگەنىن اتاپ ءوتتى.
«پەداگوگ – ۇلتتىڭ جاڭا ساپاسىن قالىپتاستىرۋ ۇدەرىسىندەگى ەڭ ماڭىزدى بۋىن. سوندىقتان ءبىلىم بەرۋ جۇيەسىن جوعارى بىلىكتى ماماندارمەن تولىق قامتاماسىز ەتۋ وتە ماڭىزدى. الايدا قازىر مەكتەپتەرىمىزدە ماماندار تاپشى. بۇگىندە ەلىمىزدە 5 مىڭ پەداگوگ جەتىسپەيدى. بۇل كورسەتكىش جىلدان-جىلعا ارتىپ كەلەدى. ال پەداگوگيكا سالاسىندا وقىعان ءاربىر بەسىنشى تۇلەك ءوز ماماندىعى بويىنشا جۇمىس ىستەمەيدى. بۇعان قوسا مۇعالىمدەردىڭ 23 پايىزىندا عانا جوعارى بىلىكتىلىك ساناتى بار. مۇنىڭ ءبارى پەداگوگتەردى دايارلاۋ جانە ولاردىڭ بىلىكتىلىگىن ارتتىرۋ تاسىلدەرىن تۇبەگەيلى وزگەرتۋدى قاجەت ەتەدى», دەدى مەملەكەت باسشىسى.
پرەزيدەنت ءوز سوزىندە جوعارى وقۋ ورىندارىنداعى پەداگوگيكالىق ماماندىقتارعا قاتىستى باعدارلامالاردىڭ باسىم بولىگى زامان تالابىن ەسكەرمەيتىن بۇرىنعى ادىستەمەلەرگە نەگىزدەلگەنىن, زاماناۋي تاسىلدەر مەن تەحنولوگيانى ەنگىزە وتىرىپ, وقۋ باعدارلامالارىن قايتا قاراۋ, جاڭعىرتۋ قاجەتتىگىن اتاپ ءوتتى.
سونىمەن قوسا, مەملەكەت باسشىسى جوعارى كۋرس ستۋدەنتتەرىنىڭ پەداگوگيكالىق تاجىريبەسىنە ايرىقشا ءمان بەرىلەتىنىن, بولاشاق مۇعالىمدەر ناقتى ءبىلىم بەرۋ ۇدەرىسىنە بارىنشا تەرەڭ بويلاۋ ءۇشىن جوعارى وقۋ ورىندارى مەكتەپتەرمەن تىعىز قارىم-قاتىناستا جۇمىس ىستەۋ قاجەت ەكەنىن ايتتى.
«جىل سايىن ەلىمىزدە ماگيستر دارەجەسىن العان بىلىكتىلىگى جوعارى پەداگوگتەردىڭ قاتارى ارتىپ كەلەدى. قازىر تاڭدا ولاردىڭ سانى 21 مىڭنان استى. ولار – ءبىلىم بەرۋ ىسىنە وزىق ادىستەردى ەنگىزە الاتىن كاسىبي ماماندار. جاڭا تيپتەگى ءبىلىم بەرۋ ۇيىمدارىنىڭ بولاشاق باسشىلارىنىڭ نەگىزگى قۇرامى وسىنداي مامانداردان جاساقتالادى. جالپى, پەداگوگتەردىڭ بىلىكتىلىگىن باعالاۋ جانە ارتتىرۋ جۇيەسىن جاڭعىرتۋ قاجەت», دەدى قاسىم-جومارت توقاەۆ.
سونىمەن قاتار پرەزيدەنت سالالىق مينيسترلىك بىلىكتىلىك تالاپتارىن ءجيى وزگەرتۋ ارقىلى وقىتۋشىلارعا قىسىم جاساۋدى توقتاتۋى كەرەك ەكەنىن ايتتى.
«ويىنا نە كەلسە, سونى ىستەيتىن شەنەۋنىكتەردىڭ جۇگەنسىزدىگىنە توسقاۋىل قويۋ قاجەت. مۇعالىمدەر تىنىش, تۇراقتى جانە الاڭسىز جۇمىس ىستەۋگە قۇقىلى. پەداگوگ كادرلاردىڭ 60 پايىزعا جۋىعى وڭىرلىك جوعارى وقۋ ورىندارىندا دايارلانادى. سوندىقتان وڭىرلەر دەڭگەيىندە جاس مۇعالىمدەردى قولداۋدىڭ ماڭىزى زور. اكىمدەر پەداگوگتەردى دايارلاۋ جانە جۇمىسقا ورنالاستىرۋ ءۇشىن قولايلى جاعداي جاساۋى كەرەك», دەدى مەملەكەت باسشىسى.
