ناۋقاندى ۇيىمداستىرۋ جانە وتكىزۋ شەڭبەرىندە ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆ جانە وسك مۇشەلەرى ءسابيلا مۇستافينا مەن اسىلبەك سماعۇلوۆ پاۆلودار, جەتىسۋ, الماتى, قىزىلوردا وبلىستارىنا باردى. ساپاردىڭ نەگىزگى ماقساتى الداعى اكىمدەردى تىكەلەي سايلاۋدى وتكىزەتىن اۋداندىق سايلاۋ كوميسسيالارىنا باسا نازار اۋدارا وتىرىپ, وڭىرلىك سايلاۋ ورگاندارىنا ادىستەمەلىك جانە پراكتيكالىق كومەك كورسەتۋ جانە وقىتۋ بولىپ وتىر.
وسك توراعاسىنىڭ ورىنباسارى پاۆلودار وبلىسىن ارالاۋ بارىسىندا اقتوعاي, جەلەزين, شارباقتى اۋداندارىنىڭ سايلاۋ ورگاندارىنىڭ قاراشا ايىندا وتەتىن سايلاۋعا دايىندىعىمەن تانىستى. اۋداندىق اۋماقتىق, ۋچاسكەلىك كوميسسيالارعا وتكىزىلگەن ترەنينگتەرگە قاتىسقان كونستانتين پەتروۆ نەگىزىنەن تاجىريبەلىك كەيستەردى پىسىقتاۋعا نازار اۋداردى. جەرگىلىكتى ماماندارعا سايلاۋدى تاعايىنداۋدان باستاپ, داۋىس بەرۋ كۇنىنە دەيىنگى نەگىزگى كەزەڭدەردى ءتۇسىندىردى. ترەنينگتەرگە سايلاۋ كوميسسيالارىنىڭ بارلىق مۇشەسى قاتىستى. سونىمەن قاتار جۇمىس ساپارى بارىسىندا ول پاۆلودار وبلىسىنىڭ وبلىستىق, قالالىق, اۋداندىق اۋماقتىق سايلاۋ كوميسسيالارىنىڭ مۇشەلەرىمەن كەزدەسىپ, سايلاۋ ناۋقانىن دايىنداۋ, حالىقتى اقپاراتتاندىرۋ, ۋچاسكەلىك سايلاۋ كوميسسيالارىنىڭ مۇشەلەرىن وقىتۋدى جالعاستىرۋ ماسەلەلەرىن تالقىلادى.
وسك مۇشەسى ءسابيلا مۇستافينا جەتىسۋ وبلىسىنىڭ كەربۇلاق, سارقان اۋداندارىندا وتكەن ۋچاسكەلىك سايلاۋ كوميسسيالارى مۇشەلەرىنىڭ وقىتۋ سەمينارلارىنىڭ جۇمىسىنا قاتىستى. سەمينار بارىسىندا سايلاۋ كۇنى ۋچاسكەلىك سايلاۋ كوميسسياسىنىڭ جۇمىس الگوريتمى تالقىلاندى, سونداي-اق ۋچاسكەلىك سايلاۋ كوميسسيالارىنىڭ سۇراقتارىنا جاۋاپ بەرىلدى.
ءىس-شاراعا ەكى اۋداننان ۋچاسكەلىك سايلاۋ كوميسسيالارىنىڭ 282 مۇشەسى جانە وبلىستىڭ اۋداندىق اۋماقتىق سايلاۋ كوميسسيالارىنىڭ 8 توراعاسى, سونداي-اق اۋداندىق اۋماقتىق سايلاۋ كوميسسيالارىنىڭ 14 مۇشەسى قاتىستى. الداعى اكىمدەر سايلاۋىن وتكىزۋگە دايىندىق اياسىندا 26 قىركۇيەكتەن باستاپ الماتى وبلىسىنىڭ بالقاش جانە جامبىل اۋداندارىندا سايلاۋ كوميسسيالارىنىڭ مۇشەلەرى ءۇشىن «قازاقستان رەسپۋبليكاسى اۋداندارىنىڭ, وبلىستىق ماڭىزى بار قالالارىنىڭ اكىمدەرىن قاناتقاقتى رەجىمدە سايلاۋ جونىندەگى سايلاۋ ۇدەرىسىنىڭ ەرەكشەلىكتەرى» اتتى كوشپەلى وقىتۋ سەمينارلارىنىڭ تسيكلى باستالدى.
مۇنان كەيىن وسك مۇشەسى ءسابيلا مۇستافينا الماتى وبلىسىنىڭ بالقاش, جامبىل اۋداندارىندا وقىتۋ سەمينارلارىنا قاتىستى. سەمينارلار اياسىندا سايلاۋ كوميسسيالارىنىڭ جۇمىسىن ۇيىمداستىرۋ, داۋىس بەرۋ ءتارتىبى جانە سايلاۋدا داۋىس بەرۋ قورىتىندىسىن شىعارۋ, سايلاۋ زاڭناماسىن بۇزعانى ءۇشىن جاۋاپكەرشىلىك ماسەلەلەرى قارالدى. سونداي-اق «داۋىس بەرۋ كۇنى» ىسكەرلىك ويىندارى وتكىزىلدى, وندا سايلاۋ قۇجاتتارىن رەسىمدەۋگە, سايلاۋ كوميسسيالارى مۇشەلەرىنىڭ مىنەز-قۇلقىنا, داۋىس بەرۋ كۇنى ىقتيمال جانجالدى جاعدايلاردى شەشۋگە ەرەكشە نازار اۋدارىلدى. سەمينار قورىتىندىسى بويىنشا وقۋعا قاتىسۋشىلاردىڭ سايلاۋ زاڭناماسىن قانشالىقتى بىلەتىنى تەستىلەۋ ارقىلى تەكسەرىلدى.
وسك مۇشەسى اسىلبەك سماعۇلوۆ قىزىلوردا وبلىسىنىڭ سىرداريا, شيەلى اۋداندارىنا ينسپەكتسيالىق ساپارمەن باردى. ول قاناتقاقتى سايلاۋ وتكىزۋدىڭ ەكى اۋدانىندا ورنالاسقان بىرنەشە سايلاۋ ۋچاسكەسىن قاراپ, دايىندىق بارىسىن تالداپ, ىسكەرلىك ويىنىن وتكىزۋ تاجىريبەسىن قاداعالادى. جيىندا داۋىس بەرۋ كۇنى ۋچاسكەلىك سايلاۋ كوميسسياسى مۇشەلەرىنىڭ جۇمىسى جان-جاقتى تالداندى. كوميسسيا مۇشەلەرىمەن سايلاۋ وتكىزۋدىڭ وزەكتى ماسەلەلەرىن تالقىلاعان اسىلبەك سماعۇلوۆ سايلاۋدى اشىق جانە ۇلتتىق زاڭنامانىڭ تالاپتارىنا سايكەس وتكىزۋدىڭ ماڭىزدىلىعىن اتاپ ءوتتى.
سونىمەن قاتار وسك مۇشەسى سىرداريا, شيەلى اۋداندارىنداعى جەرگىلىكتى اتقارۋشى جانە قۇقىق قورعاۋ ورگاندارى وكىلدەرىنىڭ قاتىسۋىمەن وتكەن سەمينار-كەڭەستەرگە قاتىستى. سەمينارلاردا جەرگىلىكتى اتقارۋشى جانە قۇقىق قورعاۋ ورگاندارىنىڭ, پروكۋراتۋرانىڭ وكىلدەرى ءسوز سويلەپ, سايلاۋعا دايىندىق جۇمىستارىنىڭ بارىسى, ناۋقاندى وتكىزۋ كەزەڭىندە زاڭدىلىقتىڭ ساقتالۋى, سايلاۋ كۇنى قوعامدىق ءتارتىپتى قورعاۋدى قامتاماسىز ەتۋ تۋرالى باياندادى. ءىس-شارالارعا سايلاۋ كوميسسيالارىنىڭ 250-گە جۋىق مۇشەسى قاتىستى.
