سەناتور ءلاززات رىسبەكوۆا كەزدەسۋ بارىسىندا مەملەكەت باسشىسى قاسىم-جومارت توقاەۆتىڭ حالىققا جولداۋىندا ورتا كاسىپكەرلىكتى دامىتۋ ماسەلەسىنە نازار اۋدارىپ, ولاردىڭ قازىرگى قارقىنى تومەن ەكەندىگىن اتاپ وتكەنىن ەسكە سالدى.
«قازىرگى ۋاقىتتا شاعىن جانە ورتا بيزنەستى دامىتۋدا ءبىزدىڭ ەلىمىزدە بىرقاتار ماسەلە مەن كەدەرگى بار. ولاردىڭ ىشىنەن شوب بانكتەرىنىڭ كرەديت بەرۋىن تومەندەتۋ, قىمبات قارجىلاندىرۋ جانە كەپىلمەن قامتاماسىز ەتۋگە قويىلاتىن تالاپتاردىڭ ارتۋى, اينالىمداعى قارجىنىڭ تاپشىلىعى, وتكىزۋ نارىعىنىڭ شەكتەلۋى, سالىق جۇكتەمەسىنىڭ جوعارىلىعى, سالىقتىق جانە كەدەندىك اكىمشىلەندىرۋ ماسەلەلەرى سياقتى جۇيەلى ماسەلەلەردى ءبولىپ كورسەتۋگە بولادى», دەدى ءلاززات رىسبەكوۆا.
ۇلتتىق ەكونوميكا مينيسترلىگىنىڭ كاسىپكەرلىكتى دامىتۋ ساياساتى دەپارتامەنتىنىڭ ديرەكتورى ەريك جامبىلوۆ ءوز كەزەگىندە پارلامەنتشىلەرگە شوب دامىتۋ جونىندە قابىلدانىپ جاتقان شارالار تۋرالى ايتىپ بەردى. ونىڭ ايتۋىنشا, مەكەمە الداعى قۇرىلىمدىق ەكونوميكالىق رەفورمالاردىڭ نەگىزگى اۋقىمىن انىقتادى, مۇندا باستى مىندەتتەردىڭ ءبىرى – وتاندىق كاسىپكەرلەردى دامىتۋ جانە قولداۋ. ول ءۇشىن بيزنەستىڭ ورتا سەگمەنتىنە, كەشەندى سالىق رەفورماسىنا, مەملەكەتتىڭ ەكونوميكاداعى ۇلەسىن قىسقارتۋعا نازار اۋدارا وتىرىپ, دامىتۋ بويىنشا جۇمىس جۇرگىزىلەتىن بولادى.
كەزدەسۋ بارىسىندا اۋىل شارۋاشىلىعى, ساۋدا جانە ينتەگراتسيا, ەڭبەك جانە الەۋمەتتىك قورعاۋ مينيسترلىكتەرىنىڭ, سونداي-اق «دامۋ» كاسىپكەرلىكتى دامىتۋ قورىنىڭ وكىلدەرى بايانداما جاسادى.
