فوتو: boxingkazakhstan
حانچجوۋداعى جازعى ازيا ويىندارىنداعى باسسىزدىق بوكستان باستالدى. اسىرەسە تورەشىلەردىڭ جارتىلاي فينالدىق جەكپە-جەكتە اسلانبەك شىمبەرگەنوۆتى جاپون بوكسشىسى سەۆون وكازاۆاعا جىعىپ بەرگەنى داۋ تۋدىردى. قازىلاردىڭ بەلدەن باسقان باسسىزدىعىنا قاتىستى قازاقستان بوكس فەدەراتسياسىنىڭ پرەزيدەنتى كەڭەس راقىشەۆ مالىمدەمە جاسادى.
«بوكستان الەم چەمپيونى, ۇلتتىق قۇرامانىڭ كاپيتانى اسلانبەك شىمبەرگەنوۆتىڭ جاپون بوكسشىسىنا قارسى جارتىلاي فينالدىق ايقاستا تورەشىلەردىڭ ادىلەتسىز شەشىم شىعارعانى جانىمىزعا باتتى. اسلانبەك ءۇش راۋند بويى انداعايلاپ شابۋىلدادى, بارىن سالىپ توپەلەدى. سوققىلارى دا ءدال ءتيىپ جاتتى, قاي قىرىنان العاندا دا قارسىلاسىنان باسىم ءتۇسىپ ەدى. بىراق تورەشىلەر شەشىمىمەن رينگتەگى رەفەري وكازاۆانىڭ قولىن كوتەردى. بۇعان دەيىن دە باسىنان داۋ ارىلماعان بوكستىڭ اينالاسىنداعى شۋعا قاتىستى, تورەشىلەردىڭ تىزەگە باسۋىنا بايلانىستى حالىقارالىق بوكس قاۋىمداستىعىنا (IBA) حالىقارالىق وليمپيادا كوميتەتى (حوك) از شاعىمدانباپ ەدى. جازعى ازيا ويىندارىندا حوك-ءتىڭ ءوزى سوراقى ارەكەتكە باردى. حانچجوۋداعى جازعى ازيا ويىندارىنىڭ جارتىلاي فينالىندا تورەشىلەر تىم شەكتەن شىعىپ, ساناعا سىيمايتىن شەشىم قابىلدادى. مۇنداي باسسىزدىققا بايلانىستى قازاقستان بوكس فەدەراتسياسى حوك-ءتىڭ تورەشىلەرىنە قارسىلىعىن رەسمي جولدايدى. جەرەبەنى دە وزدەرىنە وڭتايلى ەتىپ بۇرمالادى, كىل مىقتىلاردى ءبىر توپقا تاستاپ, وزدەرىنىڭ جاقتاسقان بوكسشىلارىنىڭ جولىنا «قىزىل كىلەم» توسەگەندەي بولىستى. حوك وتكىزەتىن مۇنداي سايىستاردا تورەشىلەردىڭ شەشىمىنە ەشقانداي شاعىم قابىلدانبايدى. قازاقستان قاي كەزدە دە بوكستىڭ دەرجاۆاسى سانالعان ەل. ءبىز مۇنداي باسسىزدىققا كەلىسە المايمىز. ءبىزدىڭ كاپيتاندى وسىلاي اياقتان شالسا دا سىندىرا المايدى. ول بۇدان دا ماڭىزدى دودالاردا كوك تۋىمىزدى جەلبىرەتەتىنىنە سەنەمىن», دەدى كەڭەس راقىشەۆ.
بوكستان ۇلتتىق قۇراما كاپيتانى اسلانبەك شىمبەرگەنوۆتىڭ جارتىلاي فينالدا سۇرىنگەن ايقاسىنا قاتىستى باس باپكەر مىرزاعالي ايتجانوۆ تا پىكىر ءبىلدىردى. «اسلانبەك بارىن سالدى, تورەشىلەر جەڭىستى بەرمەدى. قارسىلاسى دا وڭاي بوكسشى ەمەس, الەم چەمپيونى», دەدى م.ايتجانوۆ.
بوكس سپورتىنىڭ باسىندا بۇل كۇندە الاعاي دا بۇلاعاي زامان ورناپ تۇر. تورەشىلەردىڭ بۇرا تارتۋى, جەكپە-جەكتەردىڭ ساتىلۋى, ساياساتتىڭ سالقىنى دا از ءتيىپ جاتقان جوق. ءتىپتى ءبىر كەزدە عاسىرلىق تاريحى بار بوكستى جازعى وليمپيادا ويىندارىنىڭ ساناتىنان سىزىپ تاستاۋ كەرەك دەگەن ماسەلە دە دۇركىن-دۇركىن كوتەرىلدى. باس باپكەر ايتجانوۆ مىرزاعالي مىرزا قىتايعا اتتاناردا «بىزگە جۇكتەلگەن مىندەت – ءتورت جولداما يەلەنۋ», دەپ ەدى. ءۇمىت اقتالمادى, ماقسات ورىندالمادى.
