مادەنيەت جانە اقپارات مينيسترلىگىنىڭ قولداۋىمەن «قازاقستاننىڭ ەكولوگيالىق قورى» «كاسىپكەرلىكتى دامىتۋعا باعىتتالعان مەملەكەتتىك جانە جەكە قولداۋ شارالارى تۋرالى اۋىلدىق اۋماقتارداعى جاستاردىڭ حاباردارلىعىن ارتتىرۋ» جوباسىن ىسكە اسىرىپ كەلەدى. باعدارلاما اياسىندا اۋىلداردا ارنايى جاستار ءۇشىن كاسىپكەرلىكتى دامىتۋ جونىندەگى مەملەكەتتىك جانە جەكە قولداۋ شارالارى تۇسىندىرىلەتىن بۇرىشتار ۇيىمداستىرىلادى. سونداي-اق قوعام بەلسەندىلەرى كەيبىر وبلىستارعا قاراستى اۋىلدىق جەرلەردە NEET ساناتىنداعى ازاماتتارعا ارنالعان كوشپەلى دارىستەر مەن سەمينارلار وتكىزەدى. وسىلايشا ەڭبەك نارىعىنداعى ترەندتەر مەن پەرسپەكتيۆالى كاسىپتەر تۋرالى جان-جاقتى اقپارات بەرىلىپ كەلەدى.
«جوبا اياسىندا ءبىز NEET جاستارىنىڭ ۇلەسى جوعارى وڭىرلەردەگى اۋىلداردا تۇراتىن جاستارعا ارناپ قىسقامەرزىمدى كۋرستاردى ۇيىمداستىرامىز. مۇندا 35 جاسقا دەيىنگى جاستار جۇمىس ىزدەۋ, بيزنەس جۇرگىزۋ داعدىلارىن, سونداي-اق تسيفرلىق داعدىلاردى تەگىن مەڭگەرەدى. كۋرس تىڭداۋشىلارىنا SMM, تارگەت, ماركەتينگ, ينتەرنەت-كوممەرتسيا, كاسىپكەرلىك, بيزنەس-جوسپار ازىرلەۋ نەگىزدەرى, ءتۇرلى مەملەكەتتىك باعدارلامالار تۋرالى ايتىپ بەرەمىز. بۇگىنگە دەيىن ءبىزدىڭ كۋرستاردان ماڭعىستاۋ وبلىسىنىڭ قاراقيا اۋدانىنا قاراستى اۋىلداردىڭ جاستارى ءوتتى. 200-دەن اسا ادام وقۋمەن قامتىلدى. جاقىن ارادا وقىتۋ شارالارىن تۇركىستان وبلىسىنىڭ شاردارا اۋدانى مەن شىمكەنت قالاسىندا وتكىزۋدى جوسپارلاپ وتىرمىز», دەدى جوبا جەتەكشىسى ايگۇل ابدۋاليەۆا.
بۇگىندە جاستارعا «قازاقستاننىڭ ەكولوگيالىق قورى» 60-تان استام كەڭەس بەرگەن. جوبا جۇمىسى كەلەر جىلدىڭ اياعىندا قورىتىندىلانباقشى. وعان دەيىن ەكى قولعا ءبىر كۇرەك تاپپاي سەبەپسىز سەندەلگەندەرگە, باسپاناسىز ساندالعاندارعا اقپاراتتىق كومەك +7 771 072 47 90 نومىرىنە قوڭىراۋ شالۋ ارقىلى دا قولجەتىمدى.
«جەدەل جەلىنىڭ كومەگىمەن جىل سوڭىنا دەيىن اۋىلدىق جەرلەردە تۇراتىن جاستارعا 100-دەن استام كەڭەس بەرۋدى جوسپارلاپ وتىرمىز. بۇگىنگە دەيىن ءبىز 65 ادامعا ءتيىستى كونسۋلتاتسيا بەردىك. جاستاردى نەگىزىنەن «باستاۋ بيزنەس» گرانتتارىن, جىلدىق 2,5 پايىز جەڭىلدىگى بار شاعىن نەسيە الۋ ماسەلەسى قىزىقتىرادى», دەدى ا.ابدۋاليەۆا.
