فوتو: facebook.com/translogistika
4-6 قازان ارالىعىندا ءوز ەلىمىزدى قوسا العاندا ازەربايجان, بەلارۋس, گەرمانيا, يران, يتاليا, قحر, قىرعىزستان, ليتۆا, لاتۆيا, پولشا, رەسەي, تۇرىكمەنستان, تۇركيا, وزبەكستان, فينليانديا, ەستونيادان كەلەتىن 226 كومپانيا ءوز ستەندتەرىن ۇسىناتىن بولادى.
وسى ورايدا قازاقستان ازيا مەن ەۋروپا اراسىنداعى نەگىزگى ترانزيتتىك ورتالىق رەتىندەگى ءوز ۇستانىمىن نىعايتىپ كەلە جاتقاندىعىن ايتا كەتكەن ورىندى. قاتىسۋشىلار سانى وتكەن جىلمەن سالىستىرعاندا 40%-عا جۋىق ارتقان. كورمەنى ۇيىمداستىرۋ بارىسىنداعى تاعى ءبىر ەرەكشەلىك – گەرمانيا, قىتاي جانە تۇركيادان قاتىسىپ جاتقان كومپانيالاردىڭ كوپ بولۋى. سونداي-اق «TLO GmbH Internationale Spedition» (گەرمانيا), «ATTRADING» (پولشا), «Logitrans Lojistik A. S.», «Gurkan Nakliyat», Destan Transport» (تۇركيا) جانە باسقا دا كومپانيالار ءوز ستەندتەرىن العاش رەت ۇسىنىپ وتىر.
سونىمەن قاتار لاتۆيا, ليتۆا, فينليانديا جانە ەستونيا ەلدەرىنەن قاتىسۋشىلار كولىك جانە قويما لوگيستيكاسىنا ارنالعان تەحنولوگيالىق شەشىمدەردى ۇسىنادى. بۇل – ەلىمىزدە بيزنەستى دامىتۋعا ايتارلىقتاي قىزىعۋشىلىق بار ەكەندىگىنىڭ بىردەن-ءبىر كورسەتكىشى.
وتاندىق كومپانيالاردىڭ قاتىسۋ كورسەتكىشى شامامەن 40 پايىزدى قۇرايدى. «قازاقستان تەمىر جولىنىڭ» قۇرامىنا كىرەتىن كومپانيالار ۇلكەن ۇجىمدىق ستەندىمەن 2023 جىلعى ەكسپوزيتسيانىڭ ءسان-سالتاناتىن ودان ءارى اشا تۇسپەك. قازاقستاندىق كولىك اپتالىعى اياسىندا قىزىقتى ىسكەرلىك باعدارلاما جوسپارلانىپ وتىر. باعدارلاما شەڭبەرىندە VI حالىقارالىق «New SILK WAY» كولىك-لوگيستيكالىق بيزنەس-فورۋمى (04.10.2023, Hilton Astana) جانە «قازاقستانداعى قويما لوگيستيكاسى نارىعى», «كاسپي تەڭىزىندەگى پورتتاردى, تەرمينالداردى جانە كەمە قاتىناسىن دامىتۋ» جانە «كولىك جانە لوگيستيكا نارىعى» (4-6.10.2023, EXPO حالىقارالىق كورمە ورتالىعى) كونفەرەنتسيالارى وتەدى.
بيزنەس-فورۋمدا ساراپشىلار مەن قاتىسۋشىلار كولىك جۇيەلەرىنىڭ ىنتىماقتاستىعى مەن ينتەگراتسياسى, ورتا ءدالىز باعىتىن دامىتۋ, سونداي-اق مۋلتيمودالدى تاسىمالداۋ سالاسىنداعى جاڭا تەحنولوگيالار مەن يننوۆاتسيالار, جۇكتەردى تاسىمالداۋ تيىمدىلىگىن ارتتىرۋ جانە جەتكىزۋ جاعدايلارىن جاقسارتۋ ماسەلەلەرىن تالقىلايدى. ءىس-شاراعا 23 ەلدەن 500-دەن استام دەلەگات قاتىسادى دەپ كۇتىلىپ وتىر. ىسكەرلىك باعدارلامادان باسقا سالالىق مينيسترلىكتەر, ۆەدومستۆولار, قاۋىمداستىقتار مەن حالىقارالىق كومپانيالار باسشىلىعىنىڭ قاتىسۋىمەن ەكىجاقتى كەزدەسۋلەر مەن كەلىسسوزدەر جوسپارلانعان. ايتا كەتەرلىگى, فورۋمعا كەلۋشىلەر مەن قاتىسۋشىلاردىڭ ىڭعايلىلىعى ءۇشىن بيىل «Iteca» ءموبيلدى قوسىمشاسى ىسكە قوسىلدى.
